અમદાવાદના જશોદાનગરમાં પ્રેમી યુગલ સુરક્ષા મુદ્દે પ્રશ્ન ઉભા થયા છે. બે વર્ષ પહેલા થયેલા લગ્નજીવનમાં હજુ પણ યુવતીનો પરિવાર હેરાન કરી રહ્યો છે. પોતાના પરિવારથી પરેશાન યુવતી VTV પાસે પહોંચી છે. પોતાની સુરક્ષાના મામલે યુવતી અને તેનો પતિએ VTV સમક્ષ પોતાની આપવીતી સંભળાવી છે.
યુવતીએ કહ્યું કે, તેના માતા-પિતા અમારા લગ્નને સ્વીકાર કરતા નથી. અને અવાર-નવાર મારા સાસરે આવી મને માર મારી રહ્યા છે. યુવતી દ્વારા એક વીડિયો પણ જાહેર કરાયો છે. જેમાં યુવતીના કહેવા પ્રમાણે તેમના મમ્મી અને કાકા-કાકી, સગી બહેન, કાકાનો છોકરો સાથે મળી તેમના પર હુમલો કર્યો હતો. તો યુવકે પણ કહ્યું કે, તેમના પરિવારને લાંબા સમયથી ભય લાગી રહ્યો છે.
અનેક વિભાગમાં પ્રેમી યુગલે કરી છે ફરિયાદ
VTV સમક્ષ યુવતી અને તેના પતિએ પોલીસ ફરિયાદ અંગે જણાવ્યું છે. યુવતીએ કહ્યું કે, અમારે બંનેને સંરક્ષણની જરૂર છે. અમે મહિલા આયોગ, ગૃહપ્રધાન અને દિલ્હી સુધી રજૂઆત કરવામાં આવી છે. યુવતીનું કહેવું છે કે, અનેક જગ્યાએ રજૂઆત બાદ વિશ્વાસ મળ્યો નથી.
યુવતીના પરિવારે પ્રેમી યુગલના આક્ષેપો નકાર્યા
VTV સાથે વાત કરતા યુવતીના પિતાએ પોતાની દિકરીના આક્ષેપ નકાર્યા હતા. સાથે ધમકી આપવા કે, માર મારવાની વાતને પણ નકારી હતી. ઉલટા યુવતી પર ઘરમાંથી નાણાં લઈ જવાના આક્ષેપ કર્યા છે. યુવતીના પિતાએ કહ્યું કે, મારી દિકરી સાત લાખ જેટલી રકમ અને સોનું લઈને ચાલી ગઈ છે.