દેશભરમાં આજે જ્યારે કે લોકો ધામધૂમ પૂર્વક ઉત્તરાયણનો તહેવાર ઉજવી રહયા છે ત્યારે અમદાવાદમાં આ તહેવારની ઉજવણીને રાજકીય રંગ પણ લાગ્યો છે, અમદાવાદ શહેર કોંગ્રેસ તરફથી ખેડૂત કાયદા પ્રત્યે મોદી સરકારનો વિરોધ અને ખેડૂતોનું સમર્થન કરવા માટે એક નવતર પ્રયોગ કરાયો છે.
અમદાવાદમાં જામ્યો ઉત્તરાયણનો રંગ,
રાજકીય નેતાઓ પણ ઉડાવી રહ્યા છે રાજકીય પતંગ,
કોર્પોરેશનની ચૂંટણીમાં ભાજપની પતંગ કાપીશું : શહેર કોંગ્રેસ પ્રમુખ
ગુજરાતના અન્ય દરેક શહેરની માફક આજે અમદાવાદની રોનક પણ કઈંક અલગ છે, અહીં લોકો ધામધૂમ પૂર્વક ઉત્તરાયણને માણી રહયા છે, સિને કલાકારો, જાણીતા ગાયક કલાકારો અને ક્ષેત્રની સેલેબ્સ સહિત રાજકીય નેતાઓ પણ આજે ઉત્તરાયણ મનાવી રહયા છે.
જો કે અમદાવાદ શહેર કોંગ્રેસે આજે પતંગો ચગાવીને ખેડૂત કાયદાઓ પ્રત્યે મોદી સરકારના વિરોધ અને ખેડૂતોને સમર્થન આપવાની રણનીતિ ઘડી હતી, જેના અન્વયે એવા પતંગો તૈયાર કરાયા છે જેમાં ખેડૂતોનું અપમાન નહિ સહે હિન્દુસ્તાન અને ખેડૂત બચાવો, દેશ બચાવો જેવા નારા છપાવ્યા છે.
ખેડૂત કાયદાઓ મુદ્દે કર્યો સરકારનો વિરોધ
અમદાવાદમાં શહેર કોંગ્રેસ દ્વારા આજે એક નવતર રીતે દિલ્હીની બોર્ડર પર છેલ્લા પોણા બે મહિનાથી આંદોલન ચલાવી રહેલા ખેડૂતોને સમર્થન જાહેર કરાયુ હતું, આ માટે તેમણે ખેડૂતોના સમર્થનના નારા વળી પતંગો તૈયાર કરાવી છે અને દરેક વોર્ડમાં તેને ચગાવવાની યોજના બનાવી છે. મહત્વનું છે કે હવે થોડા સમયમાં જ અમદાવાદ મ્યુ.કોર્પની ચૂંટણીઓ આવી રહી છે ત્યારે અમદાવાદ કોંગ્રેસ શહેર પ્રમુખે જણાવ્યું હતું કે તેમને વિશ્વાસ છે કે આવનારી ચૂંટણીમાં કોંગ્રેસ ભાજપનો પતંગ કાપી નાખશે.
નોંધનીય છે કે હજુ થોડા દિવસો પહેલા જ ભાજપના પૂર્વ અમદાવાદ શહેર મેયર બીજલ પટેલ દ્વારા એવા મતલબનું નિવેદન કરાયું હતું કે સ્થાનિક સ્વરાજની ચૂંટણીઓની તારીખ ભાજપ સંગઠન દ્વારા નક્કી કરવામાં આવે છે જેને લઈને ઘણો વિવાદ થયો હતો, જો કે આવનારી ચૂંટણીમાં કોનો પતંગ મનપાના આક્ષમાં ચગશે તેનો નિણર્ય તો અમદાવાદની જનતા જ કરશે.