શાહપુર વિસ્તારમાં ટ્રાફિક પોલીસ ફરજમાં રૂકાવટ કરીને ગેરવર્તન કરનારાં શાહપુરના કોંગ્રસના મહિલા કોર્પોરેટર મોનાબેન પ્રજાપતિ સહિત નવ લોકો વિરુદ્ધ ફરિયાદ નોંધાઈ છે.
બુખારાની પોળ પાસે એક અડચણરૂપ બને તે રીતે રોડ પર બાઈક મૂકી દેવામાં આવ્યું હતું, જેથી બાઈકચાલક હાજર ન હોવાથી પોલીસ દ્વારા બાઈકને ટ્રોઈગ કરવામાં આવ્યું હતું અને ત્રિપાઠી હોલ પાસે ટોઇંગ વાહન જતાં બાઈકચાલક દંપતી ત્યાં વાહન લેવા માટે આવ્યું હતું ત્યારે ટ્રાફિક પોલીસે દંપતીએ ૩પ૦ રૂપિયા દંડ ભરતાં વાહન આપ્યું હતું.
જે બાબતે નંદકિશન અને તેમનાં પત્ની દિવ્યાબહેને ટ્રાફિક પોલીસ હેડ કોન્સ્ટેબલ અને પોલીસ કર્મચારીઓને કહ્યું કે અમારા વિસ્તારમાં વાહન ટોઇંગ કરવા કેમ આવો છો, મુસ્લિમ વિસ્તારમાં કેમ જતા નથી તેમ કહીને ઝઘડો કરીને આસપાસના માણસોને બોલાવી લીધા હતા.
નંદકિશને તેના ભાઈ વિશાલ રાઠોડ તથા આસપાસના રહીશો તેમજ કોર્પોરેટર મોનાબહેન પ્રજાપતિ, તેમના પતિ ભૂપેશભાઈ પ્રજાપતિ તેમજ બીજા અન્ય માણસોએ ભેગા થઇને ટ્રાફિક પોલીસ સાથે ધક્કામુક્કી પોલીસની કાર આગળ બાંકડા મૂકીને રોડ ઉપર ઊભા રહીને રસ્તો બંધ કરીને ટ્રાફિકની કામગીરી અટકાવીને બોલાચાલી કરી હતી.
પોલીસે નંદકિશન, તેમનાં પત્ની દિવ્યાબહેન, નંદકિશનના ભાઈ વિશાલ, કોર્પોરેટર મોનાબહેન પ્રજાપતિ, તેમના પતિ ભૂપેશભાઈ પ્રજાપતિ, સુરેશભાઈ બારોટ, ભરતભાઈ ભાવસાર, નિખિલ બારોટ, સ્વપ્નિલ, જેડીઆઈ વ્યાસ વિરુદ્ધમાં ગુનો દાખલ કર્યો છે.