અમદાવાદ: રાજ્યમાં ધીમા પગલે ઠંડીનું આગમન થયું છે. રાતે ઠંડીનો ચમકારો જોવા મળે છે અને દિવસે ગરમી અનુભવાતી હોવાથી લોકો પર ડબલ સિઝનનો માર પણ જોવા મળ્યો. રાજ્યમાં નવ શહેરનું તાપમાન 20 ડિગ્રીથી નીચુ નોંધાયું છે.
રાજ્યમાં ગાંધીનગરમાં 15.2 ડિગ્રી તાપમાન નોંધાયુ છે અને ગાંધીનગર ઠંડીમાં ઠુઠવાયું છે. તો અમદાવાદમાં 16.2 ડિગ્રી તાપમાન નોંધાયુ છે.
મહત્વની વાત છે કે બપોરે ગરમી અને રાતે ઠંડીના પગલે લોકો પર ડબલ સિઝનની પણ અસર જોવા મળી છે. તો બીજી તરફ ઠંડીના ધીમા આગમન બાદ શહેરના પાર્ક પણ ઉભરાયા છે. લોકો વોકિંગ યોગા અને વિવિધ કસરતો માટે વહેલી સવારથી પાર્કમાં ઉમટી રહ્યા છે.
જમ્મૂ-કશ્મીરમાં થઇ ભારે હિમવર્ષા
જમ્મૂ-કશ્મીરમાં છેલ્લા કેટલાંક દિવસથી હિમવર્ષા થઈ રહી છે. કશ્મીરના મોટાભાગના વિસ્તારોમાં સફેદી છવાયેલી છે. ત્યારે સહેલાણીઓમાં પણ ઉત્સાહનો માહોલ છે.
ઉલ્લેખનીય છે કે કશ્મીરના રાજોરીમાં મુગલરોડ ખાતે ભારે હિમવર્ષાના પગલે JCB દ્વારા બરફ ખસેડવાની કામગીરી હાથ ધરાઈ છે. હિમવર્ષાના પગલે સમગ્ર વિસ્તારમાં વાહન વ્યવહાર ઠપ્પ થયો છે. જો કે હિમવર્ષા બાદ કશ્મીરના સૌંદર્યમાં પણ વધારો થયો છે. જ્યાં નજર પહોંચે ત્યાં બસ બરફ જ નજરે પડી રહ્યો છે.