અમદાવાદ: શહેરની સિવિલ હોસ્પિટલમાં આવેલા ટ્રોમા સેન્ટરના પાર્કિંગમાં ફરી એક વાર ડોક્ટર પર હુમલાની ઘટના બની છે. ત્યારે આજે વહેલી સવાર બનેલી ઘટના છે. જેમાં ટ્રોમા સેન્ટરના પાર્કિંગમાં સાથી ડોક્ટરો સાથે ઊભેલા જુનિયર ડોક્ટર પર હેલ્મેટ પહેરીને આવેલા બે અજાણ્યા શખસોએ હુમલો કર્યો હતો.
આ હુમલામાં ઇજાગ્રસ્ત ડોક્ટરને સારવાર અર્થે તાત્કાલિક હોસ્પિટલમાં ખસેડાયા હતા. હુમલાખોરો હુમલો કરી નાસી ગયા હતા. સમગ્ર ઘટના જાણ થતાં શાહીબાગ પોલીસનો કાફલો ઘટનાસ્થળે પહોંચી ગયો હતો.
સતત બીજા દિવસે ડોક્ટર પર હુમલાની ઘટના બનતાં જુનિયર ડોક્ટરો ફરી એક વાર હડતાળ પર ઊતરી ગયા છે. તેઓની એક જ માગ છે કે ડોક્ટરો પર કરાતા હુમલાને રોકવામાં આવે અને આવાં તત્વો સામે કડકમાં કડક કાર્યવાહી કરવામાં આવે. તેવી માંગ કરવામાં આવી રહી છે.
મહત્વનું છે કે બુધવારે મોડી રાત્રે સિવિલ હોસ્પિટલના ટ્રોમા સેન્ટરમાં દર્દીનાં સગાંએ ઓપરેશન થિયેટરમાં જઇને કેટલાક ડોક્ટરો સાથે મારામારી કરી હતી. જેને લઇને કાલ સવારથી રેસિડેન્ટ ડોક્ટરો હડતાળ પર ઊતરી ગયા હતા. ડોક્ટરોની એક જ માગ હતી કે માર મારનાર શખસોની વિરુદ્ધમાં ફરિયાદ નોંધી તેઓની તાત્કાલિક ધરપકડ કરવામાં આવે.
ડોક્ટરોની હડતાળને પગલે ઉચ્ચ પોલીસ અધિકારીઓ ઘટનાસ્થળે પહોંચી ગયા હતા અને આરોપીઓને પકડવાની ખાતરી આપી તાત્કાલિક બે આરોપીઓની ધરપકડ કરી લેતાં ડોક્ટરોએ સાંજ સુધીમાં હડતાળ સમેટી લીધી હતી.
ઉલ્લેખનીય છે કે બીજી તરફ જુનિયર ડોક્ટરોને જાણ થતાં તેઓ પણ હોસ્પિટલમાં દોડી આવ્યા હતા અને હડતાળ પર ઊતરી ગયા હતા. તેઓની એક જ માગ છે કે ડોક્ટરો પર હુમલાની ઘટના રોકી આવાં તત્ત્વો સામે કડક કાર્યવાહી કરવામાં આવે.