ગજબ / વરસાદમાં અમદાવાદના તમામ રોડ ધોવાઈ ગયાં પરંતુ આ 2 રોડ અડીખમ, જાણો રહસ્ય

• અમદાવાદના અનેક રસ્તાઓ વરસાદને કારણે ધોવાયા 
• 40 વર્ષથી અડીખમ ઉભા છે સીજી રોડ અને આશ્રમ રોડ

અમદાવાદમાં આજથી વર્ષો પહેલા બનેલા સીજી રોડ અને આશ્રમરોડ હજુ યથાવત છે જેની એક કાંકરી પણ ઊખડી નથી ત્યારે બીજી તરફ અદ્યતન જમાનામાં શહેરમાં અન્ય વિસ્તારોમાં બનતા રોડનું આયુષ્ય એક વર્ષ કરતાં પણ ટૂંકુ થઈ રહ્યું છે. 

બે રોડ એવા જે 40 વર્ષે પણ નવા જેવા જ લાગે 

અમદાવાદ શહેરના રોડ રસ્તા આમ તો રાજ્યના તમામ નગર અને મહાનગરોના રોડ રસ્તાનું  પ્રતિનિધિત્વ કરે છે. દર વર્ષે અમદાવાદ શહેરમાં કરોડો રૂપિયાના ખર્ચે રોડ બને છે. પરંતુ  વરસાદમાં મોટાભાગમના રોડ ધોવાઈ જાઈ છે. જો કે શહેરમાં સીજી રોડ અને આશ્રમરોડ આ બે રોડ એવા છે જેને ગમે તેવા ભારે ચોમાસામાં પણ કદીયે નુકસાન થયું નથી. આજથી  40 વર્ષ પહેલા બનાવેલા આ સી જી રોડ અને આશ્રમરોડ પરથી અનેક ચોમાસાના પાણી પસાર થઈ ગયા છે પરંતુ રોડની એક કાંકરી પણ ખરી નથી. 
 
1960માં બનાવવામાં આવ્યો રોડ

શહેરનો  સીજી  રોડ 1960માં બનાવવામાં આવ્યો હતો. અગ્રણી ઉધ્યોગપતિ ચીમનલાલ ગિરધરલાલના નામ પરથી આ રોડનું નામ સી.જી. રોડ રાખવામાં આવ્યું છે. આ રોડ જોઈને લોકોને સવાલ થાય છે કે, વર્ષો પહેલા બનેલો આ રોડ આજે પણ સલામત છે તો વર્તમાન સમયમાં એ  જ મટીરિયલથી  બનતા રોડ ટૂંકાગાળામાં તૂટી જાય છે. કદાચ એક જ રોડ પર વારંવાર પૈસા કમાવવા માટે કોન્ટ્રાક્ટરો ઈરાદાપૂર્વક રોડનું બાંધકામ કાચું રાખે છે તેવી શંકા નાગરિકોમાં સામાન્ય બની છે. 

અનેક ચોમાસાની થપાટ ખાધી છતા રોડની નથી ધોવાઇ કાંકરી 

સીજી રોડની ગુણવત્તા જેવી જ ગુણવત્તા અમદાવાદ શહેરના આશ્રમરોડની છે. આશ્રમ રોડ કોચરબ આશ્રમથી ગાંધી આશ્રમને જોડે છે. દાયકાઓથી અનેક ચોમાસાની થપાટો ખાધા બાદ પણ આ રોડ આજે પણ વાહનચાલકો માટે સલામત રહ્યો છે. અનેક ભારે ચોમાસામાં પણ આશ્રમરોડની કાંકરી પણ ધોવાઈ નથી. 

40 વર્ષ પહેલા બનેલા રસ્તા આજે પણ અડીખમ 

આજે ટેકનોલોજીનો વિકાસ ચરમસીમાએ પહોંચ્યો છે અને રોડ માટેના કાચા મટીરિયલની ગુણવત્તા પણ સમૃદ્ધ બની છે તો પણ વર્તમાન સમયમાં બનતા રોડ કેમ ટકી શકતા નથી તે સવાલ દરેકને થઈ રહ્યો છે. પરંતુ  એ  વાત પણ એટલી જ સ્પષ્ટ છે કે, આજે ભ્રષ્ટાચાર આમ નાગરિકો સુધી ગુણવત્તા અને ટકાઉવિકાસના ફળ પહોંચવા દેતો નથી. આજથી ચાલીસ વર્ષ પહેલા બનેલા રોડમાં વપરાયેલા મટીરિયલમાં ભ્રષ્ટાચારની માટી ઉમેરાઈ ન હતી તેના કારણ આજે પણ એ રોડ સલામત છે.  

સવાલ દાનતનો છે 

કહેવાય છે કે ડામર અને પાણીને બનતું નથી અને અધિકારીઓ અને કોન્ટ્રાક્ટરો પણ  ભ્રષ્ટાચાર છૂપાવવા આ જ વાત આગળ ધરે છે. પરંતુ સીજી રોડ અને આશ્રમરોડ  માટે પણ એ જ ડામર વપરાયો હતો. જે હાલના કોન્ટ્રાક્ટરો  વાપરી રહ્યા છે. ત્યારે કહેવાનું મન થાય છે કે, રોડ માટે જેટલો  શુદ્ધ ડામર જોઈએ એટલી જ શુદ્ધ દાનત પણ જોઈએ. જેનો સદંતર અભાવ હાલ વર્તાઈ રહ્યો છે. નહીંતર સીજી રોડ કે આશ્રમરોડ બનાવવા માટે ટેકનોલોજી ક્યાં ઓછી છે. સવાલ દાનતનો છે.