રજૂઆત / ઢોર નિયંત્રણ કાયદાના વિરોધમાં અમદાવાદમાં આવતીકાલે આંદોલન, માલધારી મહાપંચાયતના નેજા હેઠળ અપાશે આવેદન

• ઢોર નિયંત્રણ કાયદાના વિરોધમાં આંદોલન
• રાજ્યના તમામ જિલ્લાઓમાં કલેકટરને આવેદનપત્ર આપશે
• માલધારી મહાપંચાયતના નેજા હેઠળ આવેદન પત્રો અપાશે

છેલ્લા ઘણા સમયથી રાજ્યમાં રખડતા ઢોરોનો ત્રાસ વધી ગયો છે. મહાનગરોમાં રખડતા ઢોરોને કારણે લોકો ત્રાહિમામ પોકારી ઉઠ્યા છે. ઘણી જગ્યાએ તો રખડતા ઢોરોનો આતંક એવો વધી ગયો છે કે જીવ ગુમાવવાના પણ બનાવો બન્યા છે. અવારનવાર પાલિકામાં રજૂઆતો કરવામાં આવી પરંતુ અત્યાર સુધી કોઇ નક્કર પગલા લેવાતા ન હતા. પરંતુ હવે રાજ્ય સરકાર આ મામલે સજાગ થઇ ગઇ છે. શહેરી વિસ્તારોને રખડતા પશુઓથી મુક્ત કરવાનું બિલ ગત 31 માર્ચના રોજ ગુજરાત વિધાનસભામાં રજૂ કરાયું હતું. વિધાનસભા ગૃહમાં અડધી રાત સુધી ચર્ચા થયા બાદ કોંગ્રેસના વિરોધ વચ્ચે બિલ ગૃહમાં પસાર કરવામાં આવ્યું. ત્યારે આ બિલનો માલધારી સમાજ ભારે વિરોધ કરી રહ્યું છે, અને ગાયો માટે યોગ્ય વ્યવસ્થા પહેલા કરવા તીવ્ર માંગ અને આંદોલનની ચીમકી ઉચ્ચારી છે.

રાજ્યના તમામ જિલ્લાઓમાં કલેકટરને આવેદનપત્ર આપશે
ઢોર નિયંત્રણ કાયદાના વિરોધમાં હવે ગુજરાતભરના માલધારીઓ આર પારની લડાઈના મૂડમાં છે. ત્યારે આજે કોંગ્રેસના ધારાસભ્ય રઘુ દેસાઈ, લાખા ભરવાડની આગેવાનીમાં કોંગ્રેસ નેતા કાર્યકર્તા સહીત માલધારી આગેવાનો મોટી સંખ્યામાં ભેગા મળી કાયદા વિરોધ કરશે તેમજ આજે અમદાવાદ કલેકટરને આવેદનપત્ર પણ આપશે. સાથે રાજ્યના તમામ જિલ્લાઓમાં કલેકટરને આવેદનપત્ર આપવાના કાર્યક્રમ પણ યોજાશે. હવે શહેરી વિસ્તારમાં રખડતા ઢોર નિયંત્રણ કાયદા વિરોધમાં માલધારી મહાપંચાયતના નેજા હેઠળ આ આંદોલનને આગળ ધપાવવામાં આવશે.

આગામી સમયમાં 5 લાખ માલધારી ગાંધીનગરમાં ભેગા થશે
હાલ ગુજરાતમાં ચૂંટણી પહેલા આંદોલનની મોસમ ચાલી રહી છે. એક આંદોલન માંડ થાળે પડે ત્યાં બીજી તૈયાર હોય તેવી સ્થિતિ પેદા થઈ ગઈ છે. હવે રખડતાં ઢોરનું બિલ વિધાનસભામાં પસાર થયું છે જે હવે આગામી સમયમાં અમલમાં પણ આવી જશે. ત્યારે આ બિલના વિરોધમાં માલધારી સમાજના આગેવાનો મેદાને પડ્યા છે અને મોટા પાયે આંદોલન કરવાની ચીમકી ઉચ્ચારી છે. માલધારી સમાજના આગેવાનોનું કહેવું છે કે સાધુ-સંતો સાથે અમે ચર્ચા કરી તેમની જ આગેવાની હેઠળ હવે ગાંધીનગરમાં 5 લાખ જેટલા માલધારીઓ ભેગા કરી સરકારના આ બિલનો પુરજોશથી વિરોધ કરીશું. 

ઢોર નિયંત્રણ બિલમાં શું છે જોગાવાઇ

• શુક્રવારે વિધાનસભામાં 6થી 7 કલાકની ચર્ચા બાદ બિલ થયું પાસ
• લાંબી ચર્ચા બાદ દંડની રકમમાં કરવામાં આવ્યો ઘટાડો
• અગાઉ બિલમાં 10 હજારથી 50 હજાર રૂપિયાના દંડની હતી જોગવાઈ
• ચર્ચા બાદ દંડની રકમ 5 હજારથી 25 હજાર રૂપિયા કરવામાં આવી
• શહેરી વિસ્તારોમાં પશુ રાખવા માટે પશુપાલકે લાઇસન્સ લેવું પડશે
• મંજૂરીથી રાખેલા તમામ ઢોરને ટેગ લગાવવી પડશે
• કાયદાના ભંગ બદલ થઈ શકે છે જેલની સજા
• લાયસન્સ મળ્યાના 15 દિવસમાં પશુને ટેગ લાવવાની રહેશે
• પ્રતિબંધિત વિસ્તારમાં ઘાસનું વેચાણ નહીં કરી શકાય
• પશુ પકડવા ગયેલા કર્મચારીઓ પર હુમલો કરવાના કેસમાં થશે કડક કાર્યવાહી