સાવધાન / અમદાવાદની આ એક જ બિલ્ડીગમાં જ 260 ઘર માઈક્રોકન્ટેમેન્ટ ઝોનમાં, એકસાથે 30 કોરોનાગ્રસ્ત

• અમદાવાદમાં કોરોના બન્યો બેકાબૂ
• સાઉથ બોપલનો ગાલા આર્યા સ્કિમમાં ફરી બની સુપર સ્પ્રેડર
• ગાલા આર્યા કોરોનાના કેસોનો રાફડો ફાટ્યો

અમદાવાદમાં કોરોના બેકાબૂ બની રહ્યું છે. સાઉથ બોપલના ગાલા આર્યા સ્કિમ ફરી સુપર સ્પ્રેડર બની રહ્યું છે. ગાલા આર્યા કોરોનાના કેસોનો રાફડો ફાટ્યો છે. ગાલા આર્યાના 260 ઘરો માઇક્રો કન્ટેન્ટમેન્ટ ઝોનમાં મુકાયા છે. તો 780 લોકો માઇક્રો કન્ટેન્ટમેન્ટ ઝોનમાં રખાયા છે. ગાલા આર્યાના 30 લોકો હાલ કોરોના સંક્રમિત છે. 

આજે ગુજરાતમાં કોરોનાનો મહાવિસ્ફોટ જોવા મળ્યો. રાજ્યમાં અત્યાર સુધીના સૌથી વધુ કેસ આજે નોંધાયા છે. 24 કલાકમાં રાજ્યમાં કોરોનાના નવા પોઝિટિવ કેસ 1640 કેસ નોંધાયા છે. આ પહેલા 26મી નવેમ્બરે સૌથી વધુ કેસ 1607 કેસ નોંધાયા હતા. આ સાથે જ રાજ્યમાં હવે એક્ટિવ કેસની સંખ્યા 7 હજાર 847 છે. તો 24 કલાકમાં 4 દર્દીના મૃત્યુ થતાં મૃત્યુઆંક વધીને 4454 થયો છે.

જ્યારે આજે એક જ દિવસમાં સ્વસ્થ થનારા દર્દીની સંખ્યા 1110 છે. રાજ્યમાં અત્યાર સુધીમાં સ્વસ્થ થનારા દર્દીની સંખ્યા 2 લાખ 76 હજાર 348 થઇ છે. વાત મહાનગરોની કરીએ તો, અમદાવાદમાં 24 કલાકમાં નવા 483 કેસ નોંધાયા છે. સુરતમાં 483, વડોદરા શહેરમાં 139 અને ગ્રામ્યમાં 20,રાજકોટમાં 126 અને ગ્રામ્યમાં 26 કેસ નોંધાયા છે. કોરોનાના વધતા કેસની સાથે રાજ્યમાં કુલ 73 દર્દી વેન્ટિલેટર પર છે. રાજ્યમાં એક માત્ર પોરબંદર જિલ્લામાં કોરોનાનો એક પણ નવો કેસ નથી નોંધાયો. આ સિવાય રાજ્યના તમામ જિલ્લામાં કોરોના  ફરી ઘાતકી રીતે પ્રસરી રહ્યો છે.

ઉલ્લેખનીય છે કે, 19 માર્ચ 2020ના રોજ ગુજરાતમાં પ્રથમ કેસ નોંધાયો હતો. જ્યારે કોરોના પોતાની ઊંચાઈ પર હતો અને જ્યારે ગુજરાતમાં સૌથી વધુ કેસ 27 નવેમ્બર 2020ના રોજ 1607 નોંધાયા હતા. આવામાં આજના કેસનો આંકડો આ આંકડાને પાર પહોંચ્યો છે અને 1640 કેસ નોંધાતા ચિંતાનો માહોલ વધી ગયો છે.