ટેસ્ટિંગ / અમદાવાદમાં જે વિસ્તાર સૌથી સુરક્ષિત હતો તે જ બન્યો હવે કોરોના હોટસ્પોટ છતાં તંત્ર હજુ આ મામલે બેદરકાર

• અમદાવાદમાં બોપલ-ઘુમા વિસ્તાર કોરોનાના હોટસ્પોટ બન્યા
• બોપલ-ઘુમામાં અનેક સોસાયટીઓમાં કોરોનાગ્રસ્ત દર્દી
• કેસની સંખ્યા વધુ છતા ટેસ્ટિંગ માટે ડોમ ઓછા

હાલ અમદાવાદમાં બોપલ-ઘુમા વિસ્તાર કોરોનાને લઇને નવા હોટસ્પોટ બન્યાં છે. આ વિસ્તારની અનેક સોસાયટીમાં કોરોનાગ્રસ્ત દર્દીઓ જોવા મળી રહ્યાં છે. લોકડાઉન દરમિયાન શહેરમાં બોપલ-ઘુમા સલામત વિસ્તાર હતા. જો કે દિવાળી બાદ આ વિસ્તારોમાં કોરોનાગ્રસ્તોની સંખ્યા સતત વધી છે. બોપલ-ઘુમામાં અંદાજે 2 લાખ લોકોની વસ્તી છે. 

હાલમાં જ બોપલ વિસ્તારમાં આવેલ સફલ પરિસર-1 અને 2 માં કોરોનાના 60 જેટલા એકટીવ કેસ સામે આવતા તંત્ર એકશન મોડમાં જોવા મલ્યું. જ્યારે ઇસ્કોન પ્લેટિનમમાં કોરોનાના 78 કેસ સામે આવ્યાં છે. તો બીજી તરફ તંત્રએ સ્વાતિ ફલોરેન્સમાં કેસ વધતા માઇક્રો કન્ટેન્ટમેન્ટ જાહેર કર્યું છે. 

જો કે શહેરમાં બોપલ-ઘુમા કોરોનાનું નવું હોટસ્પોટ બનવા છતાં વધતા કોરોના કેસ સામે તંત્રની બેદરકારી સામે આવી છે. આ વિસ્તારોમાં માત્ર ફી ટેસ્ટિંગ માટે બનાવેલા ડોમ બંધ હાલતમાં જોવા મળ્યાં છે.

આ ડોમમાં રોજ 2 કલાક જ ટેસ્ટિંગ કરવા માટે આવે છે. ત્યારે ફ્રી ટેસ્ટિંગ માટે બનાવેલા ડોમ પર લોકોને ટેસ્ટ કરાવ્યા વગર પરત જવાનો વારો આવી રહ્યો છે. ત્યારે સવાલ થાય છે કે આમ કઇ રીતે જીતીશું કોરોના સામે ?

છેલ્લાં 5 દિવસમાં ગુજરાતમાં રોજના 1400થી વધુ કેસ

મહત્વનું છે કે ગુજરાતમાં કોરોનાની વણસી રહેલી પરિસ્થિતિને પગલે રાજ્ય સરકારે અમદાવાદમાં 2 દિવસનું કર્ફ્યુ લગાવ્યા બાદ ચાર મહાનગરોમાં અચોક્કસ મુદ્દતનો રાત્રિ કર્ફ્યૂ  પણ લાગુ કરી દીધો છે. રાજ્યમાં કોરોનાના આંકડાની વાત કરીએ તો છેલ્લાં 5 દિવસમાં 1400થી વધુ રોજના કેસ આવી રહ્યાં છે. 

અમદાવાદમાં પરિસ્થિત વધારે ખરાબ

જ્યારે અમદાવાદ જિલ્લાની વાત કરીએ તો અહીં રોજના 300થી વધુ કેસ થઈ ગયા છે. છેલ્લાં 5 દિવસમાં 1507 કેસ નોંધાયા છે, જ્યારે 24ના મોત થયા છે. અમદાવાદમાં કુલ મૃતાંક 1969 પર પહોંચ્યો છે ત્યારે તંત્રએ અહીં આકરા પગલા લેવાની ફરજ પડી છે. 

દિવાળીના તહેવારો બાદ ગુજરાતમાં સ્થિતિ વણસી 

દિવાળીના તહેવારો બાદ ગુજરાતમાં કોરોનાના કેસમાં તોતિંગ ઉછાળો જોવા મળી રહ્યો છે. અમદાવાદમાં સ્થિતિ ફરી ભયજનક બનતા મનપા દ્વારા 2 દિવસનો કર્ફયુ લાદવામાં આવ્યો છે જેનો 2  દિવસ સુધી કડક રીતે અમલ કરવામાં આવ્યો હતો. જો કે, રાજ્યના મુખ્યમંત્રી વિજય રૂપાણીએ ગઇકાલે પ્રજાજોગ સંબોધનમાં જણાવ્યું હતું કે, અમદાવાદમાં આવતીકાલથી કર્ફ્યુ પુરો થશે અને જનજીવન રાબેતા મુજબ થશે તેવી જાહેરાત કરી હતી. સાથે યુવાનોને પણ બિન જરૂરી ઘરની બહાર ન નીકળવા માટે અપીલ કરી હતી.  

24 કલાક દરમિયાન 13 દર્દીઓના થયાં મોત 

રાજ્ય સરકારના આરોગ્ય વિભાગ દ્વારા જાહેર કરવામાં આવેલ કોરોનાના આંકડા પ્રમાણે રવિવારે રાજ્યમાં 1495 કેસ નોંધાયા છે.નોંધનીય છે કે, કોરોના વાયરસના નવા કેસની સામે આજે 1167 દર્દીઓ સાજા થતા કુલ સાજા થયેલા દર્દીઓનો આંકડો 1,79,953 પર પહોંચ્યો છે. 24 કલાક દરમિયાન 13 દર્દીઓના કોરોનાને કારણે મોત થતા કુલ મૃત્યુઆંક 3859 પર પહોંચ્યો છે.