શહેરમાં છેલ્લા થોડા સમયથી ભેજાબાજ અવનવી તરકીબ અજમાવી લોકો સાથે છેંતરિપંડી આચરી રહ્યા હોવાના કિસ્સા સામે આવી રહ્યા છે ત્યારે આવો વધુ એક કિસ્સો મણિનગરમાં એક વૃદ્ધ રિક્ષાચાલક સાથે બન્યો છે.
ભેજાબાજ ગઠિયો હું હાઇકોર્ટ જજ બારોટ સાહેબનો પુત્ર છું અને દવા માટે પૈસાની જરૂર તેમ કહી વૃદ્ધ િરક્ષાચાલક પાસેથી રૂ.૩પ હજાર લઇ ફરાર થઈ ગયો હતો.
જમાલપુરના ગોળલીમડા પાસેના સાગર ટાવરમાં રહેતા ૬૩ વર્ષીય ફારુક નજીર મોહંમદ છીપાએ મણિનગર પોલીસ સ્ટેશનમાં ગઠિયા વિરુદ્ધ ફરિયાદ નોંધાવી છે. ફારુકભાઈ રિક્ષા ચલાવી પોતાનું અને પરિવારનું ગુજરાન ચલાવે છે.
તા. ૧ર-૧૧-ર૦ર૦ના રોજ ફારુકભાઈ ગુજરાત કોલેજ બ્રિજ નીચે પેસેન્જરની રાહ જોઈ બેઠા હતા. તે દરમિયાન બાઈક લઈ એક યુવક ફારુકભાઈ પાસે આવ્યો હતો. યુવકે ફારુકભાઈને કહ્યું કે હું દૂધ લઈ પરત આવું પછી તમને ફોન કરું એટલે સોસાયટી પાસે આવી જજો. મારે મણિનગર થઈ ગોતા જવાનું છે, ત્યારબાદ ત્યાંથી પાછા આવવાનું છે. યુવકે આમ કહી ફારુકભાઈનો મોબાઈલ નંબર લીધો હતો.
થોડીવાર બાદ આ યુવકે હાથથી ઈશારો કરી ફારુકભાઈને બોલાવતાં તેઓ ત્યાં ગયા હતાં. ફારુકભાઈએ યુવકને બેસાડી રિક્ષા મણિનગર રેલવે સ્ટેશન તરફ લીધી હતી.
મણિનગર રેલવે સ્ટેશન સામેના કોમ્પ્લેક્સ નજીક રિક્ષા ઊભી રખાવી યુવકે કહ્યું કે હું દવા લઈને આવું છું, પૈસા ખૂટે તો આપજો. હું તમને આપી દઈશ. યુવકે આમ કહી દસ મિનિટ પછી પરત રિક્ષા પાસે આવીને ફારુ્કભાઈને કહ્યું કે અહીંયાં દવા નથી મળતી, આપણે એલજી હોસ્પિટલ જવું પડશે. ત્યારબાદ એલજી હોસ્પિટલ પહોંચતાં યુવકે ફારુકભાઈને વાત કરી કે મારે દવા લેવા માટે પૈસા ખૂટે છે, તમારી પાસે કેટલા કેશ પડ્યા છે.
ફારુકભાઈએ રૂ. પાંચ હજાર હોવાનું કહ્યું હતું. યુવકે ફારુકભાઈને કહ્યું કે હું જેવો તેવો માણસ નથી, નિવૃત્ત હાઇકોર્ટ જજ બારોટ સાહેબનો પુત્ર છું. તમારા પૈસા કયાંય નહીં જાય એમ કહી યુવકે કોઇને ફોન કરી ફારુકભાઈ લો મારા પિતા સાથે વાત કરો તેમ જણાવ્યું હતું. ફારુકભાઈએ ફોન પર વાત કરતાં સામેની વ્યક્તિએ કહ્યું કે હું નિવૃત્ત હાઇકોર્ટ જજ બારોટ સાહેબ છું. મારા પુત્રને પૈસા ખૂટે તો આપજો, તમે ઘરે તેને મૂકવા આવશો ત્યારે તમને પૈસા આપી દઈશ. સામેની વ્યક્તિએ આમ કહી ફારુકભાઈને વિશ્વાસ અપાવ્યો હતો.
યુવક ફારુકભાઈ પાસેથી રૂ. પાંચ હજાર રોકડા લઈ ગયા બાદ પરત આવ્યો અને બોલ્યો, હજુ પૈસા ખૂટે છે. તમારી પાસે બીજા પૈસા છે. ફારુકભાઈએ ના પાડતાં યુવકે તમારી સાથે ડેબિટ કાર્ડ હોય તો આપો, જેટલા પૈસાની જરૂર હશે તે ઉપાડી તમને પરત કરી દઈશ. ત્યારબાદ યુવક એટીએમ અને પિન નંબર લઈને ગયો હતો.
ફારુકભાઈના મોબાઈલ નંબર પર થોડીવાર બાદ ટુકડે ટુકડે રૂ.૩૦ હજાર ઉપડ્યાના મેસેજ આવ્યા પણ યુવક ઘણા સમય સુધી પરત આવ્યો ન હતો, જેથી ફારુકભાઈ છીપાએ એલજી હોસ્પિટલ સ્ટોર આસપાસ તપાસ કરી પણ યુવક મળી આવ્યો નહોતો. આથી પોતાની સાથે રૂ.૩પ હજારની ઠગાઈ થયાની વૃદ્ધ રિક્ષાચાલકને જાણ થઇ હતી. ફારુકભાઈને રાજસ્થાનના નાગોર ખાતે સામાિજક કામે જવાનું હોવાથી જે તે સમયે ફરિયાદ કરી ન હતી, જેથી ગઈ કાલે મણિનગર પોલીસ સ્ટેશનમાં ફરિયાદ નોંધાવી હતી.