ક્રાઈમ ન્યૂઝ / હું આખા પોલીસ સ્ટેશનનો રાજા છું, તારી શું હેસિયત છે, તું તો નોકરાણી છે

• ASI પુત્રી ગુમ કેસ : સાસરિયાના ત્રાસથી આત્મહત્યાના રસ્તે ગઈ સોનલ!
• 5 દિવસથી ગુમ સોનલનો કોઈ પતો નહીં
• પિતાને આત્મહત્યા કરી રહ્યાની મોકલી હતી ઓડિયો 

અમદાવાદમાં સામે આવેલા સાસરિયાના ત્રાસથી છેલ્લા 5 દિવસથી ગુમ એક દીકરી જેણે પોતાના પિતાને અંતિમ ઓડિયો ક્લિપ મોકલેલી અને તેમાં સાસરિયાના ક્રૃર ચહેરાનો પર્દાફાશ કર્યો છે. સાથે-સાથે તે દીકરી એટલી કંટાળી ચૂકી હતી કે તેણે ઓડિયો ક્લિપમાં પિતાને એવું પણ કહ્યું કે, હવે હું જીવતી નહીં રહું. ગુમ સોનલની એક સુસાઈડ નોટ પણ મળી આવી છે જેમાં તેનું દર્દ છલકાઈ આવે છે. 

સોનલ ગઢવીએ ઓડિયો-ક્લિપ મોકલી હતી
આવી જ હૃદય કંપાવનારી અને દર્દ ભરી ઘટના અમદાવાદમાં સામે આવી છે. જ્યાં શહેરના નવા નરોડામાં રહેતા અને સાબરમતી રિવરફ્રન્ટ પોલીસ સ્ટેશનમાં ફરજ બજાવતા ASIની પુત્રી સોનલ  છેલ્લા 5 દીવસથી ગુમ છે અને તેની કોઈ ભાળ મળી નથી. સોનલ ગઢવીએ બે પાનાંની સુસાઇડ નોટ અને સાસરિયાંના ત્રાસથી કેનાલમાં પડી આત્મહત્યા કરવાની ઓડિયો-ક્લિપ મોકલી હતી. જે ઓડિયો ક્લિપ જેણે પણ સાંભળી તેનાં રુવાટાં ઉભા થઈ ગયા. 

ઓડિયો ક્લિપના આધારે સાસરિયા સામે ફરિયાદ 
સોનલ ગઢવીની તેના પિતા દ્વારા છેલ્લા પાંચ દિવસથી શોધખોળ કરવામાં આવી રહી છે છતાં તેનો કોઈ પત્તો નથી લાગી રહ્યો. ત્યારે તેના પિતાએ પતિ અને સાસરિયાં સામે કૃષ્ણનગર પોલીસ સ્ટેશનમાં ફરિયાદ નોંધાવી છે. પોલીસ ફરિયાદ પ્રમાણે સાસરિયાં સોનલને અવારનવાર માનસિક ત્રાસ આપતાં હતાં. પતિ મોબાઈલમાં ગંદી ક્લિપ જોઈ એવું કરવા મજબૂર કરતો હતો. મકાન નામે કરવા બાબતે પણ ત્રાસ આપી સસરા પોતે પીઆઇ હોવાથી બધા દાવપેચ જાણે છે અને એવો નિકાલ કરીશું કે અમારું નામ નહીં આવે તેવી રીતે ત્રાસ આપ્યો હતો. કૃષ્ણનગર પોલીસે પોલીસકર્મી સસરા પ્રતાપદાન ગઢવી સહિત 8 લોકો સામે શારીરિક-માનસિક ત્રાસ સહિતનો ગુનો નોંધી તપાસ શરૂ કરી છે.

પતિ વીડિયો જોઈને સૃષ્ટિ વિરૂદ્ધનું કરતો હતો કૃત્ય
પોલીસ ફરિયાદ પ્રામણે, ASI ગિરીશદાન ગઢવીની પુત્રી સોનલ ગઢવીના 2007માં ધર્મેન્દ્રદાન ગઢવી સાથે લગ્ન થયા હતા. લગ્નમાં રીતરિવાજ મુજબ 40 તોલા સોનું અને રોકડા રૂપિયા આપ્યાં હતાં. સોનલ સાસરિયામાં સંયુક્ત કુટુંબમાં રહેતી હતી. બે વર્ષ સુધી લગ્નજીવન સારું ચાલ્યું હતું. પ્રથમવાર ગર્ભવતી થતાં મિસકેરેજ થયું હતું, જેથી સાસરિયાંને ગમ્યું ન હતું. 2011માં ફરી ગર્ભવતી થતાં દીકરીનો જન્મ થયો હતો, જે સાસરિયાંને ગમ્યું ન હતું. સાસુ- સસરા પહેલા ખોળે દીકરો જોઈતો હતો એવું કહી મેણાંટોણાં મારતાં હતાં. બીજી વાર દીકરાનો જન્મ થયા બાદ તેઓ કલોલ ખાતે રહેવા ગયા હતા, જ્યાં અવારનવાર તેની પાસે દહેજમાં સામાન માગવામાં આવતો હતો. આમ સોનલે અંતે કંટાળીને પોતાની પિતાના નામે એક ઓડિયો ક્લિપ મોકલી અને ત્યારથી તે ગુમ છે. 

કેમ સોનલને નથી શોધી શક્તિ પોલીસ?
સવાલ અહીં એ થાય કે, શું આજના સમયમાં પણ દહેજના લાલચૂઓ બેઠા છે..? શું હજૂ આપણા સભ્ય સમાજમાં દીકરા-દીકરીની ઘેલછા રહેલી છે? PIની ખુરસી પર બેઠા છો તો કોઈને પણ ડરાવશો? શું ખાખી વરદીનો આટલી ખરાબ રીતે ઉપયોગ થાય છે? 5 દિવસ થયા છતાં કેમ સોનલનો નથી લાગતો પત્તો? શું સોનલે સાચે જ આત્મહત્યા કરી લીધી છે? આવા લાલચૂ સાસરિયાના લોકોને કેવી સજા થવી જોઈએ? સવાલો અનેક છે.. પરંતુ હાલ સોનલનો પત્તો લગાવવો ખુબ મહત્વનો છે. ત્યારે જોવાનું એ રહેશે કે, પોલીસને સોનલને શોધવામાં ક્યારે સફળતા મળે છે.