ભૂગોળ બદલાશે / આપણા અમદાવાદનું 100 ચો.કિમીનું વિસ્તરણ થશે, જાણો કયા વિસ્તારોનો થશે સમાવેશ

આગામી દિવસોમાં અમદાવાદ નવું વિસ્તરશે. બોપલ-ઘુમા નગરપાલિકા ઉપરાંત સનાથલ, વિસલપુર, અસલાલી, ગેરતનગર, બિલાસિયા, રણાસણ, સુઘડ, ખોરજ, ખોડિયાર, ઝુંડાલ, કોટેશ્વર, ભાટ, ચિલોડા-નરોડા (સિટી), કઠવાડા અને અમિયાપુર ગ્રામ પંચાયત ઉમેરાશે. શહેરના વિસ્તારમાં ૧૦૦ ચો.કિ.મી.થી વધુનો ઉમેરો થશે. છેલ્લે વર્ષ ર૦૦૭માં મ્યુનિસિપલ હદ વિસ્તારનો વધારો થયો હતો. આમ લગભગ ૧૭ વર્ષ પછી શહેરનું ભૌગોલિક વિસ્તરણ થશે.

વર્ષ ર૦૦૭માં ઔડા લિમિટની વેજલપુર, કાળી, રાણીપ, સરખેજ, ઘાટલોડિયા, ચાંદલોડિયા સહિતની સાત નગરપાલિકા તેમજ વસ્ત્રાલ, વસ્ત્રાપુર સહિત ૩૪ ગ્રામ પંચાયત ઉમેરાઇ હતી. આની અગાઉ વર્ષ ૧૯૮૭માં નરોડા, કુબેરનગર, નિકોલ સહિતના વિસ્તારો ઉમેરાતાં શહેરનું ક્ષેત્રફળ વધીને ૧૯૦ ચો.કિ.મી. થયું હતું. એટલે ફકત ૬૮ વર્ષમાં શહેરનાે વિસ્તાર વધીને પ૬૬ ચો.કિ.મી. થશે.

આ ઉપરાંત શહેરના કોર્પોરેટર અને વોર્ડની સંખ્યામાં પણ નવા વિસ્તારો ઉમેરાશે એટલે વધારો થશે. વર્ષ ૧૯પ૧થી ૧૯૬પના સમયગાળામાં શહેરમાં માત્ર ૬૪ કોર્પોરેટર અને ૧પ વોર્ડ હતા. વર્ષ ૧૯૮૭થી વર્ષ ૧૯૯૪માં ૧ર૯ કોર્પોરેટર અને ૪૩ વોર્ડ હતા.

જ્યારે ર૦૧૦ પછી ૧૯ર કોર્પોરેટર અને ૬૪ વોર્ડ હતા, પરંતુ વર્ષ ર૦૧૬માં કોર્પોરેટરની સંખ્યા જેમની તેમ રાખીને વોર્ડની સંખ્યા ૬૪માંથી ૪૮ કરાઇ હતી. આમ અત્યારે શહેરના કોર્પોરેટર ૬૪માંથી વધીને ૧૯ર અનેે વોર્ડ ૧પમાંથી વધીને ૪૮ થયા હોઇ આ બાબત અમદાવાદ કૂદકે અને ભૂસકે વિકાસ પામી રહ્યું છે તેની ગવાહી પૂરે છે.