Ahmedbad News: અમદાવાદ APMC પર ગંભીર આરોપ લાગ્યો છે. એવું કહેવામાં આવી રહ્યું છે કે APMCએ લોનનું દેવું ભરપાઈ કરવા પતરાના શેડની 10-10 લાખ રૂપિયાની ઉઘરાણી શરૂ કરી છે.
લોન ચુકવવા APMCનું તરકટ
દેવું ભરપાઈ કરવા ગેરકાયદે ઉઘરાણી
શેડના નામે 10-10 લાખની કરી ઉઘરાણી
AMCની મંજૂરીની ઐસી-તૈસી
અમદાવાદના કમોડ ખાતે આવેલી APMC વિવાદમાં આવી છે. આ APMC માર્કેટ જમાલપુર APMCની અંડરમાં જ આવે છે. આ APMCના વહીવટી તંત્ર પર એવો આરોપ લાગી રહ્યો છે કે 200 કરોડની લોનનું દેવું ભરપાઈ કરવા માટે અમદાવાદ APMCએ નવો પેતરો રચ્યો છે. એગ્રીકલ્ચર ઝોનમાં જ શેડ ઉભા કરવા માટે APMCએ 10-10 લાખનું ઉઘરાણું શરૂ કર્યું છે.
AMCએ આપી નથી મંજૂરી
અમદાવાદના લાંભા અને કમોડ નજીક એગ્રીકલ્ચર ઝોનમાં ખુલ્લા મેદાનમાં શાકભાજી માર્કેટ ચાલી રહી છે, ત્યાં હવે શેડ ઉભા કરવામાં આવી રહ્યા છે. સવાલ એ છે કે આ શેડની અમદાવાદ મ્યુનિસિપલ કોર્પોરેશને મંજૂરી આપી નથી. બીજી મહત્વની વાત એ છે કે આ જમીનની ઉપર પણ મોટી લોન ચાલી રહી છે.
10-10 લાખનું ઉઘરાણુ્ં શરૂ કરાયાનો આરોપ
TP સ્કીમ કે પ્લાન પાસ વિના જ એગ્રીકલ્ચર ઝોનમાં બાંધકામ કરવા એક ત્રાગું રચાયું છે. માત્ર એક પતરાના શેડના 10-10 લાખ ડિપોઝિટનું ઉઘરાણું શરૂ કરવામાં આવ્યું છે. APMC અને ટીપી સ્કીમમાં એગ્રીકલ્ચર ઝોન હોવાથી અહીં કોઈ બાંધકામ થઈ શકે નહીં, આ નિયમ છે. ત્યારે આ લાંભા નજીક જ એગ્રીકલ્ચર ઝોનમાં ખુલ્લા મેદાનમાં શેડ ઉભા કરવાની વાત સામે આવી રહી છે.
AMCની મંજૂરી નથી છતા ઉઘરાણી
કોરોના કાળમાં આ જમીન આપવામાં આવી હતી, કોરોનાકાળમાં APMCએ લાંભા પાસેના એગ્રીકલ્ચર ઝોનમાં હંગામી વ્યવસ્થા કરી હતી. પરંતુ ત્યારબાદ કોઈ પ્લાન પાસ કરાવ્યા વિના, પાર્કિંગની વ્યવસ્થા વિના, AMCની મંજૂરી વગર કોઈ પરવાનાથી આ શડે બનાવવામાં આવી રહ્યા છે? આ એક સવાલ છે.
અમદાવાદ APMCનો મોટો કારસો
મહત્વની વાત છે કે અમદાવાદ શહેરની આસપાસ ખાનગી APMCનો દબદબો હવે વધી રહ્યો છે. ત્યારે શાકભાજીના હોલસેલ વેપારીઓએ ખાનગી APMC તરફ દોટ મૂકી છે. જેના પરિણામે APMCની આર્થિક સ્થિતિ ડગમગી ગઈ છે. અમદાવાદ APMCને લોન પેટે લગભગ 200 કરોડનું દેવું છે અને આ દેવું ભરવા માટે હવે APMCએ નવો પેતરો રચ્યો છે.
સળગતા સવાલ
- એગ્રીકલ્ચર ઝોનમાં કોની મંજૂરીથી શેડ ઉભા કર્યા?
- TP સ્કીમ પડી નથી તો બાંધકામ કઈ રીતે કર્યું?
- AMCની મંજૂરી વગર બાંધકામ થયું અને AMCને ખબર નથી?
- અમદાવાદ APMCના સત્તાધીશો કાયદાથી પર છે?
- પ્લાન પાસ નથી, પાર્કિંગ નથી, અને લાખોની ઉઘરાણી કેવી રીતે?
- નાના વેપારીઓને લૂંટાતા કોણ રોકશે?
- અહેવાલ બાદ કોઈ કાર્યવાહી થશે?