અમદાવાદ / શું આંતરિક ખેંચતાણ છે જવાબદાર! શહેર અને જિલ્લા પ્રમુખનું નામ નક્કી કરવામાં પણ હાઇકમાન્ડ અવઢવમાં.....

• આઠ મહાનગર અને 33 જિલ્લા પ્રમુખના નામની જાહેરાતને લઇને વિલંબ
• પક્ષમાં નારાજગીનો આંતરિક ગણગણાટ શરૂ
• જિલ્લા કક્ષાએ નારાજગીનો સૂર ઊઠી રહ્યો હોવાનું જાણવા મળ્યું

મુદત પર મુદતના તાલ સાથે જિલ્લા ભાજપ પ્રમુખના લિસ્ટમાં આંતરિક ખેંચતાણના કારણે નામ બદલાઈ ગયાં હોવાની પણ ચર્ચા ચાલી રહી છે. ભાજપના સંગઠન પર્વમાં પહેલી વાર આંતરિક નેતાગીરી અથવા જૂથવાદના કારણે તાલુકા, નગર પ્રમુખ અને જિલ્લા ભાજપ પ્રમુખનું કોકડું ગૂંચવાયું છે.
 

બે માસ પહેલાં જિલ્લા મથકો અને મહાનગરમાં પ્રદેશ ભાજપમાંથી મોકલવામાં આવેલા નિરીક્ષકો અને પ્રભારી મંત્રીની હાજરીમાં તાલુકા-જિલ્લા અને મહાનગર પ્રમુખ માટે સેન્સ લેવાયા હતા. ત્યારબાદ એક યાદી બનાવાઈ હતી, જે પ્રદેશ કાર્યાલય કમલમમાં પહોંચાડવામાં આવી હતી. આ તબક્કે વર્ષ ર૦૧૯ના અંતમાં જાહેરાત થઇ જશે તેવી ગણતરીઓ ચાલી રહી હતી.

કમલમમાં મોકલાયેલી યાદીમાં આખરી બદલાવના ભાગરૂપે કેટલાંક નામ બદલવામાં આવ્યાં હોવાની શક્યતાની જાણકારીના પગલે પક્ષમાં જિલ્લા કક્ષાએ નારાજગીનો સૂર ઊઠી રહ્યો હોવાનું જાણવા મળે છે. હવે પહેલાં પ્રદેશ પ્રમુખ અને ત્યારબાદ જિલ્લા અને મહાનગરના પ્રમુખની પસંદગીની જાહેરાત થાય તેવી શક્યતા છે.