વિવાદ / વિદ્યાર્થીઓનાં સપનાનું વિમાન ક્રેશ, સ્કૂલની બેદરકારીથી ઉડાનને લાગી ઝંઝાર!

તસ્વીરમાં દેખાતી અમદાવાદ એરોનોટિક એવિએશન સ્કૂલ વારંવાર વિવાદમાં આવતી રહે છે. અહીં વિદ્યાર્થીઓ સોનેરી ભવિષ્યનાં સપના જોઈને પ્રવેશ મેળવતાં હતાં. અહીં આવતા વિદ્યાર્થીઓને આભને આંબવાનાં અરમાનો હતાં. પાયલોટ બનવા આ સ્કૂલમાં એડમિશન લેતાં વિદ્યાર્થીઓ અને તેમનાં વાલીઓને એમ હતું કે અહીં અભ્યાસ કર્યા બાદ સોનાનો સૂરજ ઉગશે. એ માટે જ તો કેટલાંય વિદ્યાર્થીઓએ અહીં લાખો રૂપિયા ખર્ચીને એડમિશન લીધું હતું.

 

વિદ્યાર્થીઓએ અહીં પાયલટ બનવાની તાલીમ પણ લીધી. બસ હવે માત્ર તેઓ પોતાનાં ફ્લાઈંગ સર્ટિફિકેટ મળવાની રાહ જોઈ રહ્યાં હતાં. પરંતુ જ્યારે તેમને ખ્યાલ આવ્યો કે પોતાને ટ્રેનિંગ સર્ટીફિકેટ માટે સ્કૂલ સંચાલકોની નહીં પરંતુ મહેસાણા નગરપાલિકાની મહેરબાનીની જરૂર પડશે ત્યારે તેમનાં સપનાનું વિમાન ધડામ કરતું નીચે ઉતરી ગયું.

કેમ કે વાત એમ છે કે, વિદ્યાર્થીઓને આ સ્કૂલમાંથી શૈક્ષણિક યોગ્યતાનું પ્રમાણપત્ર મળે તે પહેલાં તો આ સ્કૂલનાં બાકી વેરાનાં કારણે મહેસાણા નગરપાલિકાએ સ્કૂલનું બિલ્ડિંગ જ સીલ કરી દીધું અને વિદ્યાર્થીઓનાં ઓરિજિનલ ડોક્યુમેન્ટસ એ બિલ્ડિંગમાં જ સીલ થઈ ગયાં. પરિણામે વિદ્યાર્થીઓ પાસે નોકરી માટે સાથે રાખવા જેવો કોઈ આધાર ન બચ્યો. છેલ્લાં 6 માસથી આ વિદ્યાર્થીઓ પોતાની તાલીમનો રેકોર્ડ અને અન્ય અસલ દસ્તાવેજ પરત મેળવવા ટ્રેનિંગ કંપની અને વિવિધ સરકારી કચેરીઓનાં ધક્કા ખાઈ રહ્યાં છે. જો કે કંપનીએ બાકી વેરો નહીં ભરતા નગરપાલિકા સીલ ખોલવા તૈયાર નથી અને આ તરફ વિદ્યાર્થી તેમની તાલીમનો રેકોર્ડ રજૂ ન કરે ત્યાં સુધી તેમને કોઈ નોકરી આપે તેમ નથી.

મહેસાણા એરપોર્ટ પર ચાલતી અમદાવાદ એરોનોટિકલ એવીએશન નામની ટ્રેનિંગ સ્કૂલ આ સ્થળે 2017થી પાયલટની ટ્રેનિંગ આપી રહી છે. આ સ્કૂલનો 5 કરોડ 27 લાખ જેટલો વેરો બાકી છે. એવિએશન સ્કૂલ સાથે મહેસાણા નગરપાલિકાને વેરા બાબતે છેલ્લાં ઘણા સમયથી વિવાદ ચાલી રહ્યો છે. પહેલી વખત નોટિસ જારી કરાયાં પછી જવાબ ન આપવાથી અને બે વખત ચેક બાઉન્સ થવાથી કંપની કેસ હારી ગઈ છે.

જો કે વિદ્યાર્થીઓનાં ભવિષ્ય અંગે પ્રશ્નો થવાંથી અગાઉ સીલ ખોલી દેવાયું હતું. પરંતુ તે ઘટનામાંથી સ્કૂલ સંચાલકોએ કોઈ ધડો લીધો નહીં અને આજ પર્યંત વેરો ભર્યો નહીં. આથી  એવિએશન સ્કૂલને નગરપાલિકાએ સીલ મારી દીધું છે જેમાં 50 જેટલાં વિદ્યાર્થીઓનાં ઓરિજિનલ ડોક્યુમેન્ટ પણ ફસાઈ ગયાં છે. જેનાં કારણે તાલીમ લીધાં બાદ પણ વિદ્યાર્થીઓ ડોક્યુમેન્ટનાં અભાવે નોકરીથી વંચિત રહ્યાં છે. ત્યારે આ વિદ્યાર્થીઓ મહેસાણા નગરપાલિકા પાસે પોતાનાં ભવિષ્યની ચિંતા વ્યક્ત કરવા માટે દોડી આવ્યાં હતાં. ત્યારે હવે જોવાનું એ રહે છે કે, નગરપાલિકા અને એવિએશન સ્કૂલ સાથે મળીને આ વિદ્યાર્થીઓનાં હિતમાં કેવો નિર્ણય કરે છે.