અમદાવાદમાં કાયદો અને વ્યવસ્થા સામે સવાલ ઉઠાવતી વધુ એક હત્યાની ઘટના સામે આવી છે. જેમાં આરોપીઑએ છરી વડે હુમલો કરતાં યુવકનું સારવાર દરમિયાન મોત નીપજ્યું હતું.
અમદાવાદના પૂર્વ વિસ્તારમાં ખેલાયો ખૂની ખેલ
છેડતી બાબતે ઠપકો આપવા જતાં છરીના ઘા ઝીંકયા
સારવાર દરમિયાન પિતરાઈ ભાઈનું મોત
અમદાવાદના પૂર્વ વિસ્તારમાં વધુ એક હત્યાની ઘટના પ્રકાસમાં આવતા સનસનાટી મચી જવા પામી છે. જેમાં દીકરીને હેરાન ન કરવા બાબતે યુવકને યુવતીના પિતા અને પિતરાઈ ભાઈ સમજાવવા ગયા હતા. આ દરમિયાન યુવતીના પિતા અને પિતરાઈ ભાઈ પર યુવકે ઉશ્કેરાઈ છરીથી જીવલેણ હુમલો કર્યો હતો. જેમાં પિતરાઈ ભાઈનું સારવાર દરમિયાન મોત નીપજતા મામલો હત્યામાં પલટાયો હતો.જેને લઈને બાપુનગર પોલીસે હત્યાનો ગુનો દાખલ કરી આરોપીની ધરપકડ કરી છે અને ફરાર આરોપીને દબોચી લેવા કાર્યવાહી આગળ ધપાવી છે.
દીકરીને હેરાન ન કરવા માટે સમજાવતા આરોપીઑ છરી વડે તુટી પડ્યા
અમદાવાદના પૂર્વ વિસ્તારમાં ખૂની ખેલ ખેલાયો હોવાંની ઘટના સામે આવી છે. બાપુનગર પોલીસ ઝપટે ચડેલા આરોપી અજય દંતાણીએ પોતાના મિત્રો સાથે મળીને એક નિર્દોષ યુવકની હત્યાને અંજામ આપ્યો હતો. બાપુનગર વિસ્તારમાં રહેતા વિજય દંતાણી નામના વ્યક્તિને પત્નીએ જણાવ્યું હતું કે તેઓની દીકરીને અજય દંતાણી નામનો યુવક અવારનવાર હેરાન કરે છે. આ દરમિયાન વિજય દંતાણી પોતાના ભત્રીજા અનિલ સાથે બાપુનગર તરફથી પસાર થઈ રહ્યા હતા આ વેળાએ રસ્તામાં અજય દંતાણી તેના બે મિત્રો સાથે ઊભો હતો. જેથી વિજય દંતાણીએ દીકરીને હેરાન ન કરવા માટે અજય પાસે જઇ અજયને સમજાવ્યું હતું અને ઠપકો આપ્યો હતો. આ દરમિયાન બોલાચાલી ઉગ્ર થતા અજય દંતાણી અને તેની સાથેના બે મિત્રોએ છરીના ઘા મારી વિજય દંતાણી અને તેઓના ભત્રીજા અનિલને ગંભીર ઇજાઓ પહોંચાડી હતી.
બે આરોપીઓ ફરાર
હુમલો કર્યા બાદ અજય અને તેના મિત્રો ફરાર થઈ ગયા હતા જેથી વિજય દંતાણી અને તેઓના ભત્રીજાને હોસ્પિટલમાં સારવાર માટે ખસેડવામાં આવતા બાપુનગર પોલીસે હત્યાના પ્રયાસનો ગુનો દાખલ કર્યો હતો.જોકે સારવાર દરમિયાન અનિલ દંતાણી નામના યુવકનું મોત નીપજતા બાપુનગર પોલીસે અગાઉ દાખલ કરેલા હત્યાના પ્રયાસના ગુનામાં હત્યાની કલમો હેઠળ રિપોર્ટ કરી મુખ્ય આરોપી અજય દંતાણીની ધરપકડ કરી છે. મહત્વનું છે કે આ ગુનામાં હજુ પણ બે આરોપીઓ ફરાર હોય તેઓને ઝડપી લેવા માટે પોલીસે કવાયત તેજ કરી છે.