શરમજનક / VIDEO: અમદાવાદની કોલેજના પ્રિન્સિપાલને પગે પડાવનાર નેતાને ABVPએ કર્યો સસ્પેન્ડ, શિક્ષણ જગતમાં આક્રોશ

• ABVPએ સાલ કોલેજમાં થયેલી ઘટનાને શરમજનક ગણાવી
• પ્રિન્સિપાલને પગે પડાવનાર ABVP નેતાને સસ્પેન્ડ કરાયો
• કોલેજના પ્રિન્સિપાલનો પગે લાગતો વીડિયો કર્યો હતો વાયરલ

અમદાવાદમાં ABVPના વિદ્યાર્થી નેતાઓની અવારનવાર દાદાગીરી સામે આવતી રહે છે. ત્યારે તાજેતરમાં જ શહેરની સાલ કોલેજમાં બનેલી એક ઘટનાના કારણે શિક્ષણ જગતમાં ભારે આક્રોશ જોવા મળી રહ્યો છે. જેમાં કોલેજમાં વિદ્યાર્થિનીની હાજરી મુદ્દે રજૂઆત કરવા ગયેલા ABVPના વિદ્યાર્થી નેતાએ ગુરુને પગે પડાવતો વીડિયો વાયરલ કર્યો હતો. જો કે, ABVP કાર્યકર્તા અક્ષત જયસ્વાલને સસ્પેન્ડ કરી દેવાયો છે.

પરિષદની તમામ જવાબદારીમાંથી અક્ષત જયસ્વાલને સસ્પેન્ડ કરી દેવાયો

ABVP કાર્યકર્તા અક્ષત જયસ્વાલને સસ્પેન્ડ કરાયો. પરિષદની તમામ જવાબદારીમાંથી તેને મુક્ત કરાયો છે. ABVPએ સાલ કોલેજમાં થયેલી આ ઘટનાને શરમજનક ગણાવી છે. કોલેજના પ્રિન્સિપાલનો પગે લાગતો વીડિયો વારયલ થયા બાદ આ એક્શન લેવાયું.

સાલ કોલેજ કેમ્પસમાં થયેલી ઘટના નિંદનીય: ABVP

ABVPના મહાનગર મંત્રીએ જણાવ્યું કે, સાલ કોલેજ કેમ્પસમાં થયેલી આ ઘટના નિંદનીય છે. આવી કોઈ પણ ઘટનાનું ABVP સમર્થન નથી કરતું. ABVPનું પ્રતિનિધિમંડળ આચાર્ય સાથે મળીને પોતાની ભૂલનો સ્વીકાર પણ કરશે. આની અંદર સંડોવાયેલા કાર્યકર્તા અક્ષત જયસ્વાલને પણ વિદ્યાર્થી પરિષદ દ્વારા દરેક જવાબદારીમાંથી મુક્ત કરવામાં આવ્યો છે. આ અંગે NSUIના નેતા ભાવિક સોલંકીએ જણાવ્યું કે, ABVP દ્વારા દાદાગીરીના અનેક કિસ્સાઓ સામે આવ્યા છે, જેમાં GLS કોલેજમાં રેગિંગની ઘટના ઘટી હતી. ABVP પોતાનું વર્ચસ્વ જમાવવા માટે આ પ્રકારની દાદાગીરી કરી રહ્યું છે. આ પ્રકારની ઘટના બદલ પોલીસ ફરિયાદ થવી જોઈએ.

વિદ્યાર્થી નેતાની આ હરકતથી શિક્ષણ જગતમાં ભારે આક્રોશ

અમદાવાદમાં ABVPના વિદ્યાર્થી નેતાઓ બેફામ બની ગયા છે. ત્યારે સમગ્ર ઘટના એવી હતી કે, અમદાવાદમાં આવેલી સાલ કોલેજમાં ABVPના વિદ્યાર્થી નેતાની ખુલ્લેઆમ દાદાગીરી જોવા મળી રહી છે. જેનો વીડિયો પણ વાયરલ થયો છે. ગુરુના ચરણે પડવાની જગ્યાએ ગુરુને જ ABVPના વિદ્યાર્થી નેતાએ પગે પડાવ્યાં. જેને લઇને ABVPના વિદ્યાર્થી નેતાની આ હરકતથી શિક્ષણ જગતમાં ભારે આક્રોશ જોવા મળ્યો છે. શિક્ષાના મંદિરમાં પણ ABVPના નેતાઓએ ગુરુનુ સન્માન ન જાળવ્યું.

ABVP નેતા અક્ષતે આ ઘટનાનો વીડિયો વાયરલ કર્યો હતો

ઉલ્લેખનીય છે કે, ABVPના વિદ્યાર્થી નેતા છેલ્લાં ઘણા સમયથી વિવાદમાં આવતા રહે છે. ત્યારે સસ્પેન્ડ કરાયેલા ABVP નેતા અક્ષત જયસ્વાલની દાદાગીરીથી આચાર્યની સાથે વિદ્યાર્થીઓ પણ પરેશાન હતા. એમાંય પાછું જાણે કે મોટું પરાક્રમ કર્યું હોય તેમ ABVP નેતા અક્ષતે આ ઘટનાનો વીડિયો પણ વાયરલ કર્યો છે. ત્યારે હાલ તો ABVPએ પોતાના વિદ્યાર્થી નેતાને સસ્પેન્ડ કરીને મામલો શાંત કરવાનો પ્રયાસ કર્યો છે.

સળગતા સવાલ?

• ABVPના વિદ્યાર્થી નેતા ગુરૂથી પણ મોટા ક્યારે થઇ ગયા?
• ગુરૂનું અપમાન કરતા ABVPના વિદ્યાર્થી નેતા વિદ્યાર્થીઓના હિતનું રક્ષણ કેવી રીતે કરશે?
• કોલેજોમાં તોડફોડ કરતા આવા વિદ્યાર્થી નેતા પર પગલાં ક્યારે લેવાશે?