વિદેશ જવા ઇચ્છુક લોકોએ ચેતવાની જરૂર છે. ટોળકીએ એક કે બે નહિ પરતું 100થી વધુ લોકો સાથે ઠગાઈ કરી છે
વિદેશની ઘેલછામાં છેતરપિંડીનો ભોગ
કેનેડામાં વર્ક પરમિટના નામે કરોડોનું ફુલેકુ
પાટીદાર સમાજના યુવાનોને બનાવ્યા ભોગ
વર્તમાન સમયમાં લોકો વિદેશ જવાની ઘેલછામાં ક્યાંકને ક્યાંક ચૂક કરી બેસતા હોય છે અને તેના કારણે જ છેતરપિંડી કરતા લોકો ફાવી જતા હોય છે. આવી જ વધુ એક ઘટના અમદાવાદમાં સામે આવી છે. જેમાં એક ટોળકી ફક્ત પાટીદાર સમાજના યુવાનોને કેનેડા વર્ક પરમિટ વિઝા વ્યાજબી ભાવે આપવાનું કહીને છેતરપિંડી આચરતી હતી.
કેનેડાના વર્ક પરમિટ મેળવવાની લાલચ ભારે પડી
આર્થિક ગુના નિવારણ શાખાની કસ્ટડીમાં રહેલા કલ્પેશકુમાર પટેલ પત્ની હીના પટેલ, બાબુ પટેલ અને ઋત્વિક પટેલે પોતાના સમાજના લોકોનો વિશ્વાસ કેળવી વિદેશ જવાના વર્ક પરમિટના વિઝા આપવાનું કહી કરોડો રૂપિયાનો ફૂલેકું ફેરવ્યુ છે. આ ટોળકી ફક્ત પાટીદાર સમાજના યુવાનોને કેનેડા વર્ક પરમિટ વિઝા વ્યાજબી ભાવે આપવાનું કહીને છેતરપિંડી આચરતી હતી .જેને લઈને આરોપીઓએ ઇન્ડિયા લાર્જેસ્ટ કોમ્યુનિટી એપ કુટુંબ નામનો વોટ્સએપ પર પાટીદાર સમાજનું ગ્રુપ બનાવ્યું હતું. આ ગ્રુપમાં કેનેડાના વર્ક પરમિટ મેળવવાની લાલચ આપીને અનેક લોકો સાથે છેતરપીંડી આચરવામાં આવી છે.
કેવી રીતે લોકોને જાળમાં ફસાવતા
વિઝા કોભાંડનો મુખ્ય સૂત્રધાર કલ્પેશ પટેલ અંબાજી ખાતે એસટી ડેપોમાં ડેપો મેનેજર તરીકે અધિકારી છે આ આરોપી અને તેની પત્ની હિનાએ કેનેડા વર્ક પરમિટ વિઝાના નામે 8.50 લાખના ખર્ચની વાત કરીને લોકો પાસેથી પ્રોસેસ ફી લઈને અઢી લાખ રૂપિયા પડાવ્યા હતા. કલ્પેશ પટેલે લોકો પાસેથી ચેક મેળવીને પોતાની પત્ની હીનાના એકાઉન્ટમાં અને અન્ય આરોપીઓના એકાઉન્ટમાં રૂપિયા જમા કર્યા હતા. આરોપીઓએ કેનેડાના વર્ક પરમીટ વિઝા આપવાના બદલે કમિશન માટે અને વિઝિટિર વિઝા ફાઇલની પ્રોસેસ શરૂ કરી હતી પરંતુ વિઝિટિર વિઝા પણ નહીં મળતા અંતે ભોગ બનનારને ઠગાઈની જાણ થતા તેમણે આર્થિક ગુના નિવારણ શાખા ખાતે બે દંપતિ સહિત 6 આરોપી વિરુદ્ધ ફરિયાદ નોંધાવી હતી. આર્થિક ગુના નિવારણ શાખાએ દંપતી સહિત 4ની ધરપકડ કરી છે.
હજુ 2 આરોપી ફરાર
આ વિઝા કૌભાંડમાં ગણપત પટેલ અને શ્વેતા પટેલ બંને ફરાર છે. મહેસાણાના આ દંપતીએ અને અન્ય એજન્ટો સાથે મળી કમિશન માટે ખોટા LMAI લેટરો આપી તેમજ ભોગ બનનારનું મેડિકલ તથા બાયોમેટ્રિક ટેસ્ટ કરાવ્યું હતું. પરંતુ વર્ક પરમિટ વિઝા નહીં અપાવીને છેતરપિંડી હાજરી હતી હાલમાં પોલીસે ફરાર દંપતીની શોધખોળ શરૂ કરી છે.