ચિંતાજનક / મે મહિનામાં અમદાવાદમાં કોરોનાના કુલ મોત પૈકી 34% દર્દીઓને અન્ય કોઈ રોગો નહોતા!

કેટલા દર્દીઓને કયા રોગોની સમસ્યા હતી?

કો મોર્બિડ દર્દીઓમાં 33% દર્દીઓને ડાયાબિટીઝ હતો જયારે 29% લોકોને ડાયાબિટીઝ અને હાયપરટેન્શન બંને રોગો હતા. 22% લોકોને હાયપરટેન્શન હતું જયારે 8% લોકોને હૃદય રોગની સમસ્યા હતી જયારે 4% લોકોને કિડનીના રોગો અને 4% લોકોને સ્ક્રીઝોફ્રેનિયા જેવા માનસિક રોગો જયારે 1%થી ઓછા લોકોને થાઇરોઇડની સમસ્યા હતી. (આંકડા: ટાઈમ્સ ઓફ ઇન્ડિયા)

હોસ્પિટલમાં એડમિટ થવાના પ્રથમ દિવસે જ મોત થઇ જાય તેનો દર ઘટી રહ્યો છે

અધિકારીઓના કહેવા પ્રમાણે શહેરમાં વધતી જતી જાગૃતિ અને મેડિકલ સાધનોની વધતી ઉપલબ્ધતાને પગલે દર્દીના હોસ્પિટલમાં એડમિટ થવાના પ્રથમ દિવસે જ મોત થઇ જાય તેનો દર ઘટી રહ્યો છે. જેમ કે 30 એપ્રિલ સુધી 147 કોરોનાગ્રસ્ત દર્દીઓના મોત નોંધાયા હતા જેમાંથી 17% દર્દીઓ હોસ્પિટલ આવ્યાના પ્રથમ દિવસે મૃત્યુ પામ્યા હતા. જયારે મે મહિનામાં આ આંકડો ઘટીને 7.6% થઇ ગયો છે. 

કો મોર્બિડિટી ધરાવતા દર્દીઓ માર્ચ અને એપ્રિલ મહિનામાં વધુ સમય હોસ્પિટલાઇઝ રહેતા હતા

AMCના એક સિનિયર સત્તાધીશના કહેવા પ્રમાણે કો મોર્બિડિટી ધરાવતા દર્દીઓ માર્ચ અને એપ્રિલ મહિનામાં વધુ સમય હોસ્પિટલાઇઝ રહેતા હતા. આ સમય મે મહિનામાં સારો એવો ઘટ્યો છે. જો કે તેમાં કેટલાક અપવાદ કેસો પણ છે. જેમ કે જમાલપુરના 42 વર્ષીય દર્દીને પુરા 28 દિવસ હોસ્પિટલમાં રાખવા પડ્યા હતા. એ જ પ્રમાણે જીવરાજ પાર્કમાં રહેતા 60 વર્ષીય અને ગોમતીપુરમાં રહેતા 75 વર્ષીય દર્દીને 24 દિવસ હોસ્પિટલમાં રાખવા પડ્યા હતા. 

સિવિલની મોતના આંકડાઓ ચિંતાજનક

સિવિલ હોસ્પિટલ તેના અણઘડ વહીવટ અને અવ્યવસ્થા માટે કુખ્યાત છે. અહીં દર્દીઓની સારસંભાળ, સારવાર, તેમનો ડેટા, મોતના આંકડા વગેરે ઉપર વારંવાર સવાલો ઉભા થયા છે. તંત્રએ પોતે જાહેર કરેલા આંકડાઓ અનુસાર સિવિલમાં 20 મે સુધી 459 દર્દીઓના મોત થયા છે. આ મોતના આંકડામાં કોરોના સિવાયના દર્દીઓના મોતના આંકડા પણ સામેલ છે.