અમદાવાદ / ફેક કોલથી યુવતીએ જાળમાં ફસાવી આટલા લાખ ખંખેર્યા  

બોડકદેવના સીમંધર ટાવરમાં રહેતા માર્કંડેય ઓઝા સાણંદ ખાતે એક ખાનગી કંપનીમાં નોકરી કરે છે. ઓકટોબર-2017માં  માર્કંડેય પર એક અજાણ્યા નંબર પરથી ફોન આવ્યો હતો. ફોન કરનાર યુવતીએ  કહ્યું કે હું એચડીએફ બેન્ક લાઈફ ઇન્સયોરન્સમાંથી બોલું છું. એચડીએફસી લાઈફ ઇન્સ્યોરન્સની પો‌લિસી લેવાથી માર્ચ-2018માં 13 ટકા વ્યાજ અને ૨૫ ટકા બોનસ તમારા બેન્ક એકાઉન્ટમાં જમા થશે.  આમ કહીને યુવતીએ પોલિસી આપવાની ઓફર કરી હતી.

વધુને વધુ લાલચે ફસાયો
ત્યારબાદ  માર્કંડેયે એક લાખ રૂપિયાની પો‌લિસી તેમના નામ પર લીધી હતી. તેના થોડા દિવસ પછી યુવતીએ ફરી ફોન કરીને પત્નીના નામની પોલિસી લેવા કહ્યું. જેના છ મહિનાના મેડિકલ બિલના રૂપિયા કંપની તરફથી આપવામાં આવશે. આથી માર્કંડેયે બીજા રૂપિયા જમા કરાવ્યા હતા. થોડા દિવસ પછી ફરી ફોન આવ્યો કે તમારા પ્રીમિયમના રૂપિયા એજન્ટને મળે છે તે તમને મળશે, ત્રીજી એક પોલિસી લઇ લો, તો તમારા બધા રૂપિયા તમારા એકાઉન્ટમાં આવી જશે.  

અજાણી યુવતી સહિત ચાર શખ્સ વિરૂધ્ધ નોંધાવી ફરિયાદ
તે પછી અન્ય ચાર યુવકોએ માર્કંડેયને પોલિસીના નામ પર સ્કીમ આપતાં તેમણે વિશ્વાસમાં આવી  જઇ મે-2019 સુધીમાં ટુકડે ટુકડે 10.20 લાખ રૂપિયા યુવતી તેમજ અન્યના ખાતામાં ટ્રાન્સફર કરી દીધા હતા, જોકે  માર્કંડેય પર એક દિવસ આરબીઆર ઓફિસર વાત કરું છું તેમ કહીને ચાર લાખ રૂપિયા માગતા હોવાનો ફોન આવ્યો. માર્કંડેય સાથે છેતરપિંડી થઇ હોવાથી તેમણે વસ્ત્રાપુર પોલીસમાં અજાણી યુવતી સહિત અન્ય ચાર  શખ્સ વિરુદ્ધમાં ફરિયાદ નોંધાવી છે. હાલ પોલીસે જે નંબર પરથી ફોન આવ્યો હતો તેના પર તપાસ હાથ ધરી છે.