વાઇબ્રન્ટમાં મહેમાનો માટે મુકાશે આ ચાનું મશીન: ત્રણ મિનિટમાં બની જાય છે એક કપ ચા, કોફી, સૂપ, દૂધ, બોર્નવિટા પણ બનાવી શકાય છે
મશીન નહીં આ છે ચાનો ખજાનો
એન્જિનિયર મિત્રોની અનોખી કમાલ
1000 પ્રકારની ચા બનાવતું બનાવ્યું મશીન
ટેક્નોલોજી અને વિજ્ઞાનનો કોઈ તોડ નથી. રોજ નવી ટેક્નોલોજી વિકસી રહી છે. રોજ જવા સંશોધનો થઈ રહ્યા છે. તેવામાં હાલ અમદાવાદ 10 યુવાનોએ તો અનોખી જ કમાલ કરી નાખી છે. કારણ કે, તેમણે એવું મશિન બનાવ્યું છે. જે મશિનમાં 1 હજાર પ્રકારની ચા બની શકે છે. અને તે પણ માત્ર આંગળીના ટેરવે.
1000 પ્રકારની ચા બનાવી શકાય
ગુજરાતીઓની સવાર ચા વીના તો ન ઊગે. ઘરે ચા ન બને તો કીટલીએ જાય. પરંતુ ચા તો જોઈએ જ. બાકી દિવસ ખરાબ જાય. આવી માન્યતા છે. લોકો ઘરની, કીટલીની, હોટલની અને કેફેની ચા પીવા પણ ટેવાયેલા હોય છે, જ્યારે કેટલાક લોકોને ઓફિસ અને કામના સ્થળે પણ વારંવાર ચા પીવાની ટેવ હોય છે. ત્યારે જ આપણે ત્યાં ચાના ઉત્પાદન, પ્રોસેસથી લઈ ચા બનવા સુધી લાખો પરિવારો રોજગારી મેળવે છે. પરંતુ અમદાવાદના 10 એન્જિનિયર યુવાનોએ તો જાણે કમાલ જ કરી નાખી છે. કારણ કે, તેમણે લોકોની જરૂરિયાતોને ધ્યાનમાં રાખીને 1000 પ્રકારની ચા બનાવવાનું એક કસ્ટમાઇઝ મશીન બનાવ્યું છે.
કેવું છે મશીન
આ મશિનની ખાસિયત અંગે વાત કરીએ તો. સૌથી પહેલી ખાસિયત તો એ છેકે, મશિનમાં 1000 પ્રકારની ચા બની શકે છે. આ કસ્ટમાઇઝ મશીનમાં એક સાથે 2 લિટર જેટલી ચા બનાવી શકાય છે. અને આ 2 લિટર ચા 15 થી 18 મિનિટમાં જ તૈયાર પણ થઈ જાય છે. મશીનમાં કુલ 8 બકેટ આપવામાં આવ્યાં છે, જેમાંથી અલગ અલગ પ્રકારનાં ચા, દૂધ, કોફી અને સૂપ બની શકે છે. આ મશિનને કોઈપણ વ્યક્તિ મોબાઈલથી ઓપરેટ કરી શકે છે.
મોબાઈલ એપ્લિકેશનથી ઓપરેટ થાય છે
મહત્વની વાત એ છે કે, આ મશીન મોબાઈલથી પણ ઓપરેટ થાય છે. અને તેના માટે તમારે માત્ર એક ચા બનાવવાની એપ્લિકેશનમાં ડાઉનલોડ કરવી પડશે. આ એપ્લીકેશનની મદદથી તમે તમારા ટેસ્ટ પ્રમાણેની ચા બનાવી શકો છો. અને ટાઈમ અને ટેસ્ટ પણ નક્કી કરી શકો છે. એટલે કે, આ મશિન નહીં પરંતુ ચાના રસીકો માટે ખજાનો છે. હાલ આ મશીનની ડિમાન્ડ પણ વધી રહી છે. અત્યાર સુધીમાં 100 જેટલાં મશીન અમેરિકા અને કેનેડામાં એક્સપોર્ટ પણ કરવામાં આવ્યાં છે. અને આગામી સમયમાં આ મશીન વાઇબ્રન્ટ ગુજરાત સમિટમાં પણ મૂકવામાં આવશે, જ્યાં મહેમાનો 1000 પ્રકારની ચાની મજા માણી શકશે.