અમદાવાદની સ્કૂલોમાં ચાલતી સ્કૂલવાનનું VTVએ રિયાલિટી ચેક હાથ ધર્યું છે. જેમાં નિકોલની દેવસ્ય સ્કૂલમાં ચાલતી વાનમાં ગેરરીતિ સામે આવી છે. સ્કૂલના તમામ વાહનો મોડીફાઈડ કરવામાં આવ્યા છે.
એક પણ વાહનમાં ફાયર સેફ્ટી નહોતી જોવા મળી અને વાહનોમાં RTOનો ટેક્સ બાકી હોય તેવું પણ સામે આવ્યું છે. કેટલીક વાન પ્રાઈવેટ પાસિંગમાં ચાલે છે, તો ગેસથી ચાલતી સ્કૂલ વાનમાં પણ ફાયર સેફ્ટીની કોઈ જ સુવિધા નથી. ત્યારે RTO તંત્ર હવે રહી રહીને જાગ્યું છે.
દેવસ્ય સ્કૂલની 47 સ્કૂલ વાન ડિટેઈન કરશે. જોકે જે આ પ્રકારના દ્રશ્યો VTVના રિયાલીટી ચેકમાં સામે આવ્યા છે. જે મુજબ તંત્રને કેમ આ દ્રશ્યો ન દેખાયા. તંત્ર દ્વારા યોગ્ય તપાસ થતી હોય તો આ વાહનો કઈ રીતે ધમધમે છે. તંત્ર દ્વારા કેમ રહેમ નજર રાખવામાં આવી રહી છે.
જો કે રાજ્યના અન્ય શહેરોમાં પણ રિયાલિટી ચેકિંગ કરવામાં આવતા કેટલાંક દ્રશ્યો ચોંકાવનારા સામે આવ્યાં છે. જેમાં વડોદરા, રાજકોટ જેવા શહેરમાં બાળકોના જીવન સાથે ચેડા કરી સ્કૂલવાન ચાલકો નિયમો નેવે મૂકી ચલાવી રહ્યાં છે. સ્કૂલવાનમાં ન તો બાળકો માટે કોઇ સુરક્ષા વ્યવસ્થા જોવા મળી રહી છે કે ન તો ફાયર સેફટી.
ઉલ્લેખનીય છે કે આ અગાઉ અમદાવાદના નિકોલ વિસ્તારમાં સંકલ્પ સ્કૂલમાં RTOએ તપાસ હાથ ધરી હતી. જેમાં સ્કૂલની તમામ વાન નિયમ વિરુદ્ધ મોડીફાઈ થયેલું હોવાનું સામે આવ્યું હતું. RTOના નિયમો નેવે મુકીને તમામ ગાડીમાં વધુ બાળકો બેસાડવા માટે વાહનો મોડીફાઈ કરવામાં આવે છે.