અમદાવાદ / સ્વચ્છતાના નામે ‘જેટ’ અને મ્યુનિસિપલ તંત્રની વેપારીઓ પર ‘દંડશાહી’

• દુકાનની બહાર નાનું રેપર પણ પડ્યું હોય તો આકરો દંડ ફટકારાય છે
• મંદીના માહોલમાં આડેધડ દંડનીય કાર્યવાહીથી વેપારીઓ ત્રાહીમામ્
• જેટની ટીમ અને સેનેટરી ઇન્સ્પેકટર મહિને ૬૦ લાખ જેટલો દંડ વસૂલે છે 

શહેરમાં સ્વચ્છતા મિશન હેઠળ રોડ, રસ્તાની નિયમિત સફાઇ થતી નથી. ખુદ શાસકો સફાઇ કર્મચારીઓ જે તે મસ્ટર સ્ટેશનમાં હાજરી પૂરી રફુચક્કર થઇ જતા હોવાની ગંભીર ફરિયાદ કરે છે. મ્યુનિ. કોર્પોરેશન પોતાના કર્મચારીઓને શિસ્તમાં રાખી શકતું નથી. સફાઇકામમાં ડમી કર્મચારી પણ ભાગ ભજવે છે. જોકે અત્યાર સુધી આ પ્રકારની ખુલ્લેઆમ આચારતી ગેરરીતિ સામે એક પણ કર્મચારીને સામાન્ય શો કોઝ નોટિસ પણ ફટકારાઇ નથી. 

 

બીજી તરફ શહેરના નાનાથી લઇ મોટા વેપારીને તેમની દુકાન કે ઓફિસ બહાર સંજોગોવશાત્ નાનું રેપર જેવા પડેલા સામાન્ય કચરાને લઇને મ્યુનિ. સોલિડ વેસ્ટ વિભાગ મનસ્વી રીતે પેનલ્ટી ફટકારે છે. અનેક એવા પણ કિસ્સા નોંધાયા છે કે હજુ વેપારી દુકાન કે ઓફિસનાં શટર પણ ન ખોલ્યાં હોય અને સોલિડ વેસ્ટ વિભાગના  સેનેટરી ઇન્સ્પેકટર કે પબ્લિક હેલ્થ સુપરવાઇઝર આવીને રૂ.પ હજાર સુધીના દંડની નોટિસ હાથમાં પકડાવી દે છે. આ પ્રકારનો અત્યાચાર જાણે કે ઓછો હોય તેમ જેટની ટીમ પણ ગમે ત્યારે આફતની જેમ મંદીના કાળમાં સામાન્ય વકરો મેળવવા ઝઝુમતા નાના વેપારીઓ પર ત્રાટકે છે. 

કેટલાક કિસ્સામાં જેટની ટીમ સ્થાનિક દુકાનદારને દંડની રકમ ભરવાની આનાકાની કરવાના મામલે ફટકારે પણ છે. જેટની રિક્ષામાં ટ્રાફિક પોલીસ વિભાગનો એક કર્મચારી, શહેર પોલીસનો એક હેડ કોન્સ્ટેબલ પણ બેઠા હોય સોલિડ વેસ્ટ વિભાગના સેનેટરી ઇન્સ્પેકટર રાજાપાઠમાં આવી જઇ પોલીસ જેવો રૂઆબ વેપારી પર દાખવીને તેને રીતસરના દબડાવે છે.

 

જેટની ઇલેકટ્રીક રિક્ષામાં ફરથી પ૦ રિક્ષાની ટીમ અને સોલિડ વેસ્ટ વિભાગના ૪પ૦ કર્મચારી વેપારીઓ પાસેથી હપતા ઉઘરાવે છે. જે રોડ પર નિયમિત દબાણ થતાં હોય તેની તરફ હપતા સિસ્ટમથી આ લોકો ઇરાદાપૂર્વક આંખ આડા કાન કરે છે અને ગંદકીના બહાને વેપારીઓની કનડગત કરી સોલિડ વેસ્ટ વિભાગના વરિષ્ઠ અધિકારીઓ દ્વારા રોજેરોજની વસૂલાત માટે અપાતા ટાર્ગેટને પૂર્ણ કરે છે. મ્યુનિ. સોલિડ વેસ્ટ વિભાગના વડા હર્ષદ સોલંકી સમક્ષ વેપારીઓએ દંડશાહીના મામલે વારંવાર રજૂઆત કરી છે, પરંતુ  આ ઉચ્ચ અધિકારી કોઈ પગલાં લેતા નથી.

મ્યુનિ. સોલિડ વેસ્ટ વિભાગ દ્વારા ગત તા.ર૭ જાન્યુઆરીથી ર ફેબ્રુ.-ર૦ર૦ દરમ્યાન સોલિડ વેસ્ટ વિભાગ રૂલ્સ ભંગ બદલ રૂ.૧પ લાખથી વધુની વસૂલાત કરાઇ હતી. જેમાં વેપારીઓને કચરો રોડ પર ફેંકવા, દુકાન બહાર કચરો નજરે પડવા જેવી બાબતો પર કેટલીક વખત રૂ.પ૦ હજાર સુધીનો દંડ કરાયો છે.

પબ્લિક હેલ્થ બાયલોઝ ર૦૧ર હેઠળ નોટિસ ફટકારીને વેપારીઓ પાસે કરાતી વસૂલાતનો આંકડો દર મહિને ૬૦ લાખથી વધુનો થાય છે અને જે વર્ષે દહાડે રૂ.નવ કરોડથી વધુનો થતાં મ્યુનિ. તિજોરીને આવકનું એક જાણે નવું સાધન મળી ગયું હોય તેવી રીતે સોલિડ વેસ્ટ વિભાગ વર્તી રહ્યું છે.

આ અંગે મ્યુનિ. સોલિડ વેસ્ટ મેનેજમેન્ટના વડા હર્ષદ સોલંકીને પૂછતા તેઓ કહે છે, ગંદકી મામલે દંડ તો કરાશે જ. તેમાં કોઇ પ્રકારની બાંધછોડ નહીં થાય. રૂ.પ હજાર ઉપરાંત રૂ. પાંચ લાખ સુધીનો દંડ તંત્ર કરી શકે છે. એટલે ગંદકી કરશો તો દંડાશો તેવું માનીને લોકોએ ચાલવંું પડશે.