અમદાવાદ / મોબાઇલ એપ ઓપન કરો અને સિવિલની એપોઇન્ટમેન્ટ મેળવો

અસારવા ખાતે આવેલી સિવિલ હોસ્પિટલ દેશની સૌથી મોટી હોસ્પિટલમાં ગણવામાં આવે છે. ૨૨૦૦ એકરમાં ફેલાયેલી આ હોસ્પિટલમાં રોજ ત્રણ હજારથી વધુ દર્દીઓ આવે છે. દર્દીઓને અલગ અલગ સરવાર લેવાની હોવાથી તેઓને અલગ અલગ વોર્ડમાં જવું પડતું હોય છે અને લાંબી લચક લાઇનોમાં ઊભા રહેવું પડતું હોય છે. જેના કારણ દર્દી તેમજ તેમનાં સગાંવહાલાંઓનો સમય વેડફાય છે. ઘણી વખત દર્દીઓને હોસ્પિટલમાં ધક્કો પણ પડતો હોય છે. દર્દીઓને લાઇનમાં ઊભા રહેવું પડે નહીં તેમજ તેમને હાલાકીનો સામનો કરવો પડે નહીં તે માટે હવે ઓનલાઇન અેપોઇન્ટમેન્ટ સિસ્ટમને વધુ સારી રીતે અપગ્રેડ કરવાનું આયોજન તંત્ર દ્વારા લેવામાં આવ્યું છે. 

દર્દીઓનો સમય ન બગડે અને હોસ્પિટલમાં સરળતાથી સારવાર મળી રહે તે હેતુથી આરોગ્ય વિભાગે સિવિલ હોસ્પિટલમાં ઓનલાઇન એપોઇન્ટમેન્ટ સિસ્ટમ શરૂ કરી હતી. 
વર્ષે ૧ર લાખ દર્દીની ઓપીડી ધરાવતી સિવિલ હોસ્પિટલમાં ઓનલાઇન એપોઇન્ટમેન્ટ સિસ્ટમને શરૂ થયે બે વર્ષ થયાં હોવા છતાં માત્ર ગણ્યાગાંઠયા લોકોએ આ સિસ્ટમનો લાભ લીધો છે. તેથી હાલમાં આ સિસ્ટમ તદ્દન નિષ્ફળતાના આરે છે. આ સિસ્ટમનો ઉપયોગ વધુ લોકો કરે તે માટે હવે તંત્ર મોબાઇલ એપ્લિકેશન પર આ સુવિધા શરૂ કરશે. 
ગૂગલ પ્લે સ્ટોરમાં જઇને કોઇ પણ વ્યકિત સિવિલ હોસ્પિટલની એપ્લિકેશન આસાનીથી ડાઉનલોડ કરી શકશે અને ત્યારબાદ ડોક્ટરની ઓનલાઇન અેપોઇન્ટમેન્ટ લઇ શકશે. એપ્લિકેશનમાં કોઇપણ દર્દી કે તેનાં સગાંવહાલાં હોસ્પિટલમાં ટ્રીટમેન્ટ માટે આવવાનો સમય જાતે જ નક્કી કરી શકશે.  આ સિવાય હોસ્પિટલના ડોક્ટર કયા સમય પર હાજર છે તેની પણ વિગતો ઓનલાઇન જોઇ શકશે. દર્દીને ઓનલાઇન અેપોઇન્ટમેન્ટ દ્વારા મળેલા ટાઇમ પર જ સારવાર આપવામાં આવશે તેવો પ્રયાસ થઇ રહ્યો છે. 

ઉલ્લેખનીય છે કે સિવિલ હોસ્પિટલની ઓનલાઇન અેપોઇન્ટમેન્ટ માટેની આ એપ્લિકેશનમાં જીપીએસ ટ્રેકિંગ પણ મૂકવામાં આવશે. જે દર્દીઓનાં સગાંવહાલાંઓ પણ ઉપયોગ કરી શકશે. દર્દી જ્યારે સિવિલ હોસ્પિટલમાં સારવાર માટે દાખલ થાય છે ત્યારે તેનાં સગાંસંંબંધીઓ તેની ખબરઅંતર પૂછવા માટે સિવિલ હોસ્પિટલમાં આવે છે. ૨૨૦૦ એકરમાં સિવિલ હોસ્પિટલ ફેલાયેલી હોવાથી દર્દી કયા વોર્ડમાં દાખલ થયો છે તે શોધવામાં સમય લાગી જતો હોય છે અથવા તો સિક્યોરિટી ગાર્ડ કે પછી હોસ્પિટલમાં ફરજ બજાવતા કર્મચારીઓને પૂછવું પડતું હોય છે. આવનારા દિવસોમાં જો કોઇ દર્દીના સગાંસંબંધી હોસ્પિટલમાં આવશે તો એપ્લિકેશન દ્વારા તેને કયા વોર્ડમાં જવું છે તે જીપીએસ દ્વારા જાણી શકાશે. સિવિલ હોસ્પિટલના સુપરિન્ટેન્ડેટ એમ.એમ.પ્રભાકરે જણાવ્યું છે કે એપ્લિકેશન મારફતે કોઇપણ દર્દી હોસ્પિટલમાં ડોક્ટરને બતાવવા માટે ઓનલાઇન એપોઇન્ટમેન્ટ લેશે તો તેને લાઇનમાં ઊભા રહેવું નહીં પડે. 

તેમણે જણાવ્યું કે મોબાઈલમાં ઓનલાઇન એપોઇમેન્ટ માટે પહેલા સાઈનઅપ કર્યા બાદ અપોઇનમેન્ટ રજિસ્ટ્રેશન ફોર્મ ખૂલશે પરંતુ હાલમાં ટેક્નિકલ પ્રોબ્લેમના કારણે અપોઇમેન્ટ બંધ કરી છે. એપ અપડેટ કરવાની હોવાથી ટૂંક સમયમાં ફરીથી ઓનલાઇન અેપોઇન્ટમેન્ટ સિસ્ટમ શરૂ કરવામાં આવશે.