શહેરના ઓઢવ વિસ્તારમાં આવેલા વિરાટનગરના ગાંધીપાર્ક ચાર રસ્તા પાસે ગઇકાલે એક યુવક ઉપર સામાન્ય બાબતે તેના મિત્રે છરી વડે હુમલો કરતાં સમગ્ર વિસ્તારમાં ચકચાર મચી ગઇ છે. કોઈ કારણસર ઝઘડો કરી યુવક પર તેના મિત્રએ છરીના ઘા ઝીંકીને હત્યા કરવાની કોશિશ કરી હતી.
ઓઢવ વિસ્તારમાં આવેલ વિશાલભાઈ રબારીની ચાલીમાં રહેતા કપૂરચંદ જયસ્વાલે ઓઢવ પોલીસ સ્ટેશનમાં હત્યાની કોશિશની ફરિયાદ નોંધાવી છે. પોલીસ સ્ટેશનમાં નોંધાયેલી ફરિયાદ અનુસાર, કપૂરચંદ અને તેનો મિત્ર શૈલેશ બાઈક પર વિરાટનગર ચાર રસ્તા પાસે આવેલ ફર્નિચરની દુકાનમાં પૈસા આપવા જતા હતા અને કપૂરચંદની બાઈક પાછળ તેનો નાનો ભાઈ પણ બાઈક લઈને આવતો હતો. તેઓ રસ્તામાં સુજ્ઞાન સ્કૂલ તરફ પસાર થઇ રહ્યા હતા ત્યારે કપૂરચંદનો મોટો ભાઈ વિશાલ લોહીલુહાણ હાલતમાં હતો અને લોકોનું ટોળું ભેગું થઇ ગયું હતું.
વિશાલની પીઠમાં ડાબી બાજુ છરી ખૂંપેલી હતી, જે કપૂરચંદે પીઠમાંથી કાઢી લીધી હતી અને વિશાલના શરીરના ભાગમાં છરીના ઘા ઝીકેલા હતા તથા વિશાલ લોહીલુહાણ હાલતમાં હોવાથી તે કંઈ બોલી શકતો ન હતો. આસપાસના ભેગા થયેલા લોકો પાસેથી વિશાલને જેને છરીના ઘા માર્યા હતા તે નિકોલ વિસ્તારમાં રહેતો વિશાલનો મિત્ર રોહિત રાજબબ્બર હોવાનું જાણવા મળ્યું હતું.
રોહિત રાજબબ્બરે કોઈ કારણોસર ઝઘડો કરીને વિશાલના પેટમાં અને હાથના ભાગે છરીના ઘા ઝીંકી દીધા હતા અને ફરાર થઇ ગયો હતો. ઇજાગ્રસ્ત વિશાલને સારવાર માટે હોસ્પિટલમાં ખસેડવામાં આવ્યો હતો. ઘટનાની જાણ ઓઢવ પોલીસને થતાં તેઓ તાત્કાલિક ઘટનાસ્થળ પર પહોંચી ગયા હતા અને મિત્ર રોહિત રાજબબ્બર વિરુદ્ધમાં હત્યાનો ગુનો દાખલ કરીને તપાસ હાથ ધરી છે.