અમદાવાદ / મેઘાણીનગરના ચમનપુરામાં પોલીસની મેગા ડ્રાઇવ, બુટલેગરોમાં ફફડાટ

200 પોલીસ કર્મીઓ દ્વારા સર્ચ ઓપરેશન
ઉલ્લેખનીય છે કે, આજે મોડી સાંજે અમદાવાદ શહેરના મેઘાણીનગર ખાતે આવેલ ચમનપુરામાં અમદાવાદ પોલીસ દ્વારા એક દરોડા પાડવાની કામગીરી હાથ ધરવામાં આવી હતી. આ દરોડામાં શહેરના જેમાં ડીસીપી, એસીપી, પીઆઇ સહિતના કુલ 200થી વધુ પોલીસ કર્મીઓ જોડાયા હતા. 

આપને જણાવી દઇએ કે,  થોડા દિવસો અગાઉ મેઘાણીનગર વિસ્તારમાં બુટલેગરો દ્વારા કરાયેલ બાળકીની હત્યા બાદ પોલીસ સફાળી જાગી હતી અને સક્રિય થઈ હતી અને એકાએક ચમનપુરમાં દરોડા પાડીને દારુનું વેચાણ કરતા લોકો પર તવાઇ બોલાવી હતી. 

મોડી રાતે પોલીસ દ્વારા કરાયું હતું સર્ચ ઓપરેશન
મોડી રાતે પોલીસે મેઘાણીનગર વિસ્તારમાં આકસ્મિક સર્ચ ઓપરેશન હાથ ધરતા બુટલેગરોમાં પણ ફફડાટ સામે આવ્યો હતો. પોલીસના સર્ચની જાણ થતા કેટલાક બુટલેગરો ફરાર પણ થયા હતા. તો પોલીસે મોડી રાતે કરેલી આ કાર્યવાહીમાં દારૂનો મોટો જથ્થો પણ જપ્ત કર્યો છે.

બાળકીની થઇ હતી હત્યા
મેઘાણીનગર વિસ્તારમાં એક ઘરમાં બુટલેગર સતિષ અને તેના સાથીઓ હુમલો કર્યો હતો. આ દરમિયાન એક મહિલાને ઈજા થઈ હતી. 20 દિવસની બાળકી ગંભીર રીતે ઈજાગ્રસ્ત થઈ હતી. બાળકીનુ સારવાર દરમિયાન મોત થયું હતું. આ મામલે 5 આરોપીઓ સામે ફરિયાદ થઈ હતી.

જે મામલે પોલીસે અત્યાર સુધી સતીષ હિતેશ અને લખનની ધરપકડ કરી છે. જો કે હજી સુધી આ હત્યા કેસમાં 2 આરોપીઓ ફરાર છે. હાલમાં પોલીસ દ્વારા આરોપીઓની શોધખોળ કરવામાં આવી રહી છે.