અમદાવાદ / અખાડામાં થયેલા ઝઘડામાં કોચ અને વિદ્યાર્થીએ એક બીજા પર છરી હુલાવી

ગોમતીપુરમાં આવેલ ધુળાભાઇ પટેલની ચાલીમાં રહેતા અને શેઠ સી.એલ.વિદ્યાલયમાં પ્યૂન તરીકે નોકરી કરતા અને બાપુનગરમાં આવેલ લાલબહાદુર શાસ્ત્રી સ્ટેડિયમમાં ચાલતા અખાડાના કોચ બલવંત હરિલાલ યાદવે બે ભાઇઓ વિરુદ્ધમાં ગોમતીપુર પોલીસ સ્ટેશનમાં હત્યાની કોશિશની ફરિયાદ કરી છે. 

આક્ષેપ પ્રમાણે અખાડામાં કુસ્તી શીખવા માટે તેમની ચાલીમાં રહેતો રાહુલ અને તેનો ભાઇ રોહિત આવે છે. બે દિવસ પહેલા સવારે અગિયાર વાગ્યાની આસપાસ બલવંત બાળકોને ટ્રેનિંગ આપતો હતો ત્યારે રાહુલે કુસ્તી શીખતા અન્ય એક યુવક શોએબ સાથે ઝઘડો કર્યો હતો. જેમાં બલવંતે રાહુલને ઠપકો આપ્યો હતો અને ઝઘડો નહીં કરવાનું કહ્યુ હતું.

ગઇકાલે બલવંત તેના ઘર પાસેથી પસાર થતો હતો ત્યારે રાહુલ અને રોહિત છરી અને લોખંડનો ડંડો લઇને આવ્યા હતા અને હુમલો કરી દીધો હતો. રાહુલ અને રોહિતે બલવંત પર ઉપરાછાપરી છરીઓના ઘા ઝીંક્યા હતા અને લોખંડની પાઇપો મારી હતી. ઇજાગ્રસ્ત બલવંતને સારવાર માટે હોસ્પિટલમાં ખસેડાયો હતો બીજી તરફ રાહુલે બલવંત અને તેના ભાઇ જશવંત વિરુદ્ધમાં ગોમતીપુર પોલીસ સ્ટેશનમાં હત્યાની કોશિશની ફરિયાદ કરી છે. રોહિત અને રાહુલને ઇજા પહોંચતા સારવાર માટે હોસ્પિટલમાં ખસેડવામાં આવ્યા છે. પોલીસે સામસામે હત્યાની કોશિશનો ગુનો દાખલ કરીને તપાસ શરૂ કરી છે.