અમેરિકાના પ્રમુખ ડોનાલ્ડ ટ્રમ્પના પ્રવાસ પહેલાં સુરક્ષા મામલાની કેબિનેટ કમિટી (CCS)એ ભારતીય નૌસેના માટે અમેરિકા પાસેથી 24 મિલ્ટરોલ હેલિકોપ્ટર 'રોમિયો' ખરીદવાનો નિર્ણય લીધો છે. સીસીએએ ગઈ કાલે 2.6 અબજ ડોલરના આ સંરક્ષણ સોદાને મંજૂરી આપી દીધી હતી. ટ્રમ્પના બે દિવસના ભારત પ્રવાસ દરમિયાન આ સોદા પર અંતિમ મહોર વાગે તેવી શક્યતા છે.
ટ્રમ્પના પ્રવાસ પહેલા સુરક્ષા મામલાની કેબિનેટ કમિટી US પાસેથી 24 'રોમિયો' હેલિકોપ્ટર ખરીદશે
સીસીએએ ગઈ કાલે 2.6 અબજ ડોલરના આ સંરક્ષણ સોદાને મંજૂરી આપી દીધી
USએ પણ દિલ્હીની વાયુ સરહદને વધુ સુરક્ષિત કરવા માટે મિસાઈલ શીલ્ડ સિસ્ટમનો પ્રસ્તાવ મૂક્યો
આ 'રોમિયો' હેલિકોપ્ટર ભારતીય નૌસેનાના જંગી કાફલામાં સામેલ થશે, જે સબમરીન પર હુમલા માટે આધુનિક હથિયારોથી સજ્જ હશે. અમેરિકાની કંપની લોકહીડ માર્ટિન દ્વારા બનાવવામાં આવેલા એમએચ-60 'રોમિયો' હેલિકોપ્ટર એન્ટી-સબમરીન અને એન્ટી-સરફેસ (શિપ) વોરફેર માટે ઉપયોગમાં લેવામાં આવે છે. 25 ફેબ્રુઆરીએ વડા પ્રધાન નરેન્દ્ર મોદી અને ડોનાલ્ડ ટ્રમ્પની ઉપસ્થિતિમાં આ ડિફેન્સ ડીલ પર હસ્તાક્ષર થાય તેવી સંભાવના છે.
અમેરિકાએ પણ દિલ્હીની વાયુ સરહદને વધુ સુરક્ષિત કરવા માટે મિસાઈલ શીલ્ડ સિસ્ટમનો પ્રસ્તાવ મૂક્યો છે. અમેરિકા તરફથી ભારતને નેશનલ એડવાન્સ્ડ સરફેસ ટુ એર મિસાઈલ સિસ્ટમ (એનએએસએએમએસ) આપવા પર પણ વાત આગળ વધી રહી છે. આ સિસ્ટમથી દિલ્હીને તમામ જોખમથી સુરક્ષિત રાખી શકાશે. આ સિસ્ટમની અંદાજિત કિંમત 1.8 અબજ ડોલર છે. આ ડીલ અંગે અમેરિકી કોંગ્રેસને પણ જાણકારી આપવામાં આવી હતી.
અમેરિકા પાસેથી 24 એડવાન્સ્ડ એમએચ-60 'રોમિયો' હેલિકોપ્ટરની આ ડીલ નેવી માટે ખૂબ મહત્ત્વની ગણાય છે. કેમ કે નેવીનાં કેટલાંક જહાજ બહુ જલદી સમુદ્રમાં ઊતરવાનાં છે, પરંતુ આ માટે કોઈ સક્ષમ હેલિકોપ્ટર હજુ આપણી પાસે નથી.
આ ડીલ હેઠળ ભારત 24 એમએચ-60 રોમિયો હેલિકોપ્ટર માટે શરૂઆતમાં 15 ટકા રકમની ચુકવણી કરશે. ડીલ થયા બાદ તેની પહેલી ખેપ બે વર્ષની અંદર મળશે. ત્યારબાદ બેથી પાંચ વર્ષની અંદર બાકીનાં તમામ હેલિકોપ્ટર ભારતને મળી જશે. આ ઉપરાંત બંને દેશ વચ્ચે ઇન્ટિગ્રેટેડ એર ડિફેન્સ વેપન સિસ્ટમ ખરીદવા માટે પણ મંત્રણા થઈ શકે છે.