AGR મામલે સુપ્રીમ કોર્ટ (Supreme Court) એ વોડાફોન (Vodafone) ની સોમવારે 2,500 કરોડ રૂપિયા અને શુક્રવાર સુધીમાં 1,000 કરોડ રૂપિયાની ચૂકવણીનો પ્રસ્તાવ ફગાવી દીધો છે. આ ઉપરાંત કોર્ટે કંપની વિરુદ્ધ કોઇ દંડાત્મક કાર્યવાહી ન કરવાને લઇને કોઇ રાહત પણ આપી નથી.
વોડાફોને સોમવારે 2,500 કરોડ અને શુક્રવારે 1,000 કરોડ રૂપિયાની ચૂકવણીનો પ્રસ્તાવ રજૂ કર્યો હતો
સુપ્રીમ કોર્ટે કંપની વિરુદ્ધ દંડાત્મક કાર્યવાહી ન કરવાને લઇને કોઇ રાહત આપી નથી
વોડાફોન આઇડિયાની અનુમાનિત 53,000 કરોડ રૂપિયાની ચૂકવણી બાકી છે. એજીઆર મામલામાં સુપ્રીમ કોર્ટની ફટકાર અને સરકાર દ્વારા સમય મર્યાદામાં ઢીલ ના આપવા પર ભારતી એરટેલ (Bharti Airtel) એ સોમવારે દૂરસંચાર વિભાગને 10,000 કરોડ રૂપિયાની ચૂકવણી કરી દીધી છે. કંપની દ્વારા જણાવવામાં આવ્યું છે કે, તે બાકી રાશિની ચૂકવણી પણ સ્વઆકલન બાદ કરશે.
જસ્ટિસ અરુણ મિશ્રાની અધ્યક્ષતા વાળી પીઠે વોડાફોન તરફથી રજૂ થયેલા અધિવક્તા મુકુલ રોહતગી દ્વારા સોંપવામાં આવેલા પ્રસ્તાવને સ્વીકારવાથી ઇનકાર કરી દીધો. રોહતગીએ કહ્યું કે કંપનીએ તેના પર એજીઆર (Adjusted Gross Revenue) ની ચૂકવણી માંથી સોમવારે 2,500 કરોડ રૂપિયા અને શુક્રવાર સુધીમાં 1,000 કરોડ રૂપિયા વધુ ચૂકવવાનો પ્રસ્તાવ કોર્ટ સમક્ષ રાખ્યો હતો. સાથે જ કંપનીએ અપીલ કરી કે તેમના વિરુદ્ધ કોઇ દંડાત્મક કાર્યવાહી ન કરવામાં આવે.
Airtel એ એજીઆરના 10,000 કરોડ રૂપિયા ચૂકવ્યા
એરટેલે કહ્યું, અમે જલ્દી જ સ્વઆકલનની પ્રક્રિયામાં છીએ અને સુપ્રીમ કોર્ટની હવે પછીની સુનાવણીથી પહેલા અમે આ પ્રક્રિયાને પૂર્ણ કરીને બાકી ચૂકવણી કરી દઇશું. એરટેલે કહ્યું કે બાકી ચૂકવણી કરવાના સમયે તે તમામ જાણકારી પણ આપશે.
ટેલીકોમ ડિપાર્ટમેન્ટે શુક્રવારે ટેલીકોમ કંપનીઓને આપેલ રાહત પાછી ખેંચી હતી. ઓક્ટોબર 2019માં સુપ્રીમ કોર્ટે પોતાના નિર્ણયમાં કહ્યું હતું કે 23 જાન્યુઆરીથી પહેલા ટેલીકોમ કંપનીઓ બાકી એજીઆર ચૂકવી દેશે. જોકે, કંપનીઓએ અત્યાર સુધીમાં ચૂકવણી કરી નથી અને સુપ્રીમ કોર્ટમાં મોડિફિકેશન અરજી દાખલ કરી છે. આ અરજીની સુનાવણી દરમિયાન સુપ્રીમ કોર્ટે ટેલીકોમ કંપનીઓ અને દૂરસંચાર વિભાગના અધિકારીને કારણ બતાવો નોટિસ મોકલી હતી.
ચૂકવણી વસૂલ ન કરવાને લઇને સુપ્રીમ કોર્ટે દૂરસંચાર વિભાગને પણ ફટકાર લગાવી હતી. આથી બાકી ચૂકવણી માટેની પ્રક્રિયા ઝડપી બનાવવા માટે દૂરસંચારે શુક્રવારે ટેલીકોમ કંપનીઓની તમામ રાહત ખતમ કરી હતી.
કઇ ટેલીકોમ કંપની પર કેટલુ AGR બાકી છે
એરટેલ પર લાઇસન્સ ફી સહિત લગભગ 35,586 કરોડની ચૂકવણી બાકી છે
વોડાફોન આઇડિયાની 53,000 કરોડ રૂપિયાની ચૂકવણી બાકી છે
ટાટા ટેલીસર્વિસેઝની લગભગ 13,800 કરોડની ચૂકવણી બાકી છે.
જ્યારે બીએસએનએલની 4,989 કરોડ રૂપિયા અને એમટીએનએલની 3,122 કરોડ રૂપિયા એજીઆર બાકી છે.