14 જેટલી માંગણી સાથે ભારતીય કિસાન સંઘ છેલ્લા 30 દિવસોથી આંદોલનના રસ્તે, ચૂંટણીમાં પરિણામ ભોગવવાની આપી ચીમકી
કિસાન સંઘનું આંદોલન
ધારાસભ્યોને કરી રજૂઆત
1 મહિનાથી ચાલી રહ્યું છે આંદોલન
'ચૂંટણીમાં પરિણામ ભોગવવા તૈયાર રહેજો'
ગાંધીનગર આંદોલનની રણભૂમિ થઈ ગયું હોય તેમ લાગી રહ્યું છે. ગાંધીનગરમાં હવે કિસાન સંઘે આંદોલન કર્યું. કિસાન સંઘના આગેવાનો ધારાસભ્યોના નિવાસસ્થાને પહોંચ્યા હતા. જ્યાં પોતાની માગો ધારાસભ્ય સમક્ષ રજૂ કરી. છેલ્લા એક મહિનાથી કિસાન સંઘ ગાંધીનગરમાં આંદોલન કરી રહ્યું છે.
સાફ સફાઇ કરી નોંધાવ્યો વિરોધ
આજે ભારતીય કિસાન સંઘના કાર્યકર્તાઓની અટકાયત કરીને મગોડી SRP કેમ્પ લઈ જવામાં આવ્યા હતા. સમાન વીજ દરને લઈને કિસાન સંઘ આંદોલન કરી રહ્યું છે.ત્યારે કાર્યકર્તાઓએ કેમ્પમાં સાફ સફાઇ કરી વિરોધ નોંધાવ્યો હતો.આમ તો વિવિધ 14 જેટલી માંગણી સાથે ભારતીય કિસાન સંઘ છેલ્લા 30 દિવસોથી આંદોલન કરી રહ્યું છે. છતાં ખેડૂતો સરકાર માંગ સ્વીકારતું નથી. ત્યારે હવે ખેડૂતોએ આગામી 2022ની ચૂંટણીમા જવાબ આપવાનું કહી રહ્યા છે અને ખુલ્લી ચીમકી ઉચ્ચારી રહ્યા છે કે ચૂંટણીમાં પરિણામ ભોગવવા તૈયાર રહેજો.
કિસાનસંઘની માગ શું છે?
કિસાન સંઘની માગ છે કે સમાન વીજદર અને વીજ મિટર મરજિયાત કરવામાં આવે. કિસાન સૂર્યોદય યોજનાનો તાત્કાલિક અમલ કરવામાં આવે. સ્કાય યોજના ફરીથી લાગુ કરવાની પણ માગ કરી છે. બગાયત વાવેતર હોય તે વિસ્તારમાં કેબલ લાઈન નાખવામાં આવે. પશુપાલકોને લીટર પર 2 રૂપિયા સહાય તેમના બેંક ખાતામાં મળે, ટ્રેક્ટર અને ટ્રોલીને બળદ ગાડાની માન્યતા આપીને ટેક્સમાં મુક્તિ આપવામાં આવે. ડ્રીપ ઇરિગેશન સિસ્ટટમમાં GST નાબૂદ કરી 90 ટકા સહાય આપવાની અને રી-સર્વે રદ કરવાની માગણી કરી છે.
ફક્ત દિલાસા મળ્યા પણ નિવેડો ન આવ્યો
ગત 9 સપ્ટેબરના રોજ ગૃહ રાજ્યમંત્રી હર્ષ સંઘવી સાથે ખેડૂતોની બેઠક થઈ હતી. જેમાં પડતર માગણીઓને લઈ ખેડૂતોએ ગૃહ રાજ્યમંત્રી હર્ષ સંઘવી પાસે પોતાની માગણીઓને લઈને રજૂઆત કરી હતી. સકારાત્મક દિશામાં વાતચીત થઈ હોવાનો કિસાન સંઘએ દાવો કર્યો હતો. માંગણીઓનું નિરાકરણ લાવવાનું આશ્વાસન અપાયું હતું. બીજી તરફ ગૃહ રાજ્યમંત્રી હર્ષ સંઘવીએ પણ સકારાત્મક ચર્ચાના સંકેત આપ્યા હતા. અને નિવેદન આપતા કહ્યું હતું કે ખેડૂતોની માંગણીને લઈ સકારાત્મક દિશામાં વિચારી રહ્યા છે. પ્રદેશ લેવલ પર ઉંડાણ પૂર્વક ચર્ચા ચાલી રહી છે. કોર કમિટીની બેઠકમાં વિજબીલ, MSP સહિતના મુદ્દે ચર્ચા કરીશું. પણ હજુ સુધી કોઈ જ નિર્ણય ન લેવામાં આવતા કિસાન સંધ અને આક્રમક મૂડમાં દેખાઈ રહ્યું છે.
મહત્વનું છે કે ભારતીય કિસાન સંઘના પ્રદેશ કારોબારી સભ્યની તબિયત 2 દિવસ પહેલા લથડી હતી. હિરાજી માળીની પોલીસ ધરપકડ દરમિયાન તબિયત બગડતા તેમણે સારવાર અર્થે હોસ્પિટલ ખસેડાયા હતા.