ગુજરાત / આતંકી હુમલાના એલર્ટને લઈ રાજ્યના નિર્જન ટાપુઓ પર એજન્સીની નજર, CM રૂપાણી આજે કચ્છની મુલાકાતે

CM રૂપાણી આજે કચ્છની મુલાકાતે:

સુરક્ષા એજન્સીઓએ કચ્છમાં આતંકીઓ ઘુસવાનું એલર્ટ જાહેર કર્યું છે. જ્યારે આજે CM રૂપાણી કચ્છની મુલાકાતે જશે. જ્યાં CM રૂપાણી અછતની પુસ્તિકાનું વિમોચન કરશે અને અછતમાં કામગીરી અંગે પુસ્તકમાં માર્ગદર્શન અપાશે. આ ઉપરાંત ભૂજ સ્વામિનારાયણ મંદિરમાં મેઘ લાડુ અર્પણ કરશે. 

ગુજરાતના 56 નિર્જન ટાપુ પર એજન્સીઓની નજર:

આતંકી હુમલાની શક્યતાને લઈને ગુજરાતની દરિયાઈ સીમા પર એલર્ટ જાહેર કરાયું છે. જ્યારે હાલમાં ગુજરાતના 56 નિર્જન ટાપુ પર એજન્સીઓ દ્વારા નજર રાખવામાં આવી રહી છે. કચ્છથી વલસાડ સુધીના નિર્જન ટાપુ પર એજન્સીઓ નજર રાખી રહી છે. સાથે જ ગુજરાત મરીન પોલીસે ટાપુની સુરક્ષામાં વધારો કર્યો છે. નિર્જન ટાપુ પર આતંકીઓ છુપાવા માટેના સોફટ ટાર્ગેટ છે. 2008માં અરબી સમુદ્ર માટે આતંકીઓએ મુંબઈમાં હુમલો કર્યો હતો. ત્યારે હવે આતંકીઓ ગુજરાતના સમુદ્ર માર્ગથી હુમલો કરે તેવી શક્યતા છે. આતંકી હુમલાના એલર્ટને લઇને ગુજરાતમાં તમામ સલામતી એજન્સી સક્રીય થઈ છે.

1600 કિ.મી. લાંબા દરિયાકિનારાને કવર કરવા માટે વધુ ફોર્સની જરૂર:

ગુજરાતના ૧૬૦૦ કિમી લાંબા દરિયાકિનારામાં ૫૬ નિર્જન ટાપુઓ આવેલા છે. ૧૯૯૩માં મુંબઇમાં થયેલા સિરિયલ બોમ્બ બ્લાસ્ટ પ્રકરણમાં પણ આતંકીઓએ પોરબંદર પાસેના ગોસાબારામાં હથિયારો અને વિસ્ફોટકો ઉતાર્યા હતા. ત્યારબાદ મુંબઇમાં ટ્રેનમાં થયેલા બોમ્બ બ્લાસ્ટમાં પણ ગુજરાતનો દરિયાકિનારાનો ઉપયોગ થયો હતો. 1600 કિ.મી લાંબા દરિયાકિનારાને કવર કરવા માટે વધુ ફોર્સ અને તાલીમ લીધેલા સ્ટાફની જરૂર પડે છે.

2 શંકાસ્પદો ગુજરાતમાં પ્રવેશ્યા હોવાના ઇનપુટ:

કચ્છ સરહદ પર IB દ્વારા અલર્ટ જાહેર કરવામાં આવ્યું છે. આ એલર્ટની સાથોસાથ 2 શંકાસ્પદ શખ્સોની તસવીરો પણ જાહેર કરી છે. અક્રમ કુરેશી અને સજ્જાદ ભટ્ટી નામના શખ્સોના ફોટો ઇન્ટેલિજન્સ વિભાગ દ્વારા જાહેર કરવામાં આવ્યાં છે. નાની હોડીનો ઉપયોગ કરીને શખ્સોએ ગુજરાતમાં પ્રવેશ કર્યો હોવાની આશંકા છે. 

અરબી સમુદ્રમાં ભારતની નેવીની જહાજો તૈનાત:

આઇબીના ઇનપુટને લીધે અરબી સમુદ્રમાં ભારતીય નેવીના જહાજો તૈનાત કરવામાં આવ્યા છે. દક્ષિણ ભારતથી નેવીના જહાજ અરબી સમુદ્ર લાવવાનું પ્લાનિંગ છે. દક્ષિણ ભારતના કોસ્ટ ગાર્ડના જહાજ પણ કચ્છ લાવવાનો પ્લાન છે. દરિયાઇ માર્ગે ત્રાસવાદી હુમલાને લઇને એલર્ટ જાહેર કરવામાં આવ્યું છે. સીરક્રીકમાંથી પાકિસ્તાની ત્રાસવાદી ઘુસ્યા હોવાની અલર્ટને લઇને તૈયારી કરવામાં આવી છે.

પાકિસ્તાનના મરીન કમાન્ડો કચ્છના દરિયાઇ વિસ્તારમાં પ્રવેશ્યા હોવાના અહેવાલ:

કચ્છનાં હરામીનાળા ક્રીક વિસ્તારમાંથી પાકિસ્તાને તૈયાર કરેલા મરીન કમાન્ડો કચ્છનાં દરીયાઈ એરિયામાં પ્રવેશ કરી ચુક્યા હોવાનાં ઇન્ટેલિજન્સ ઇનપુટથી ખળભળાટ મચી ગયો છે. પાંચ દિવસ પહેલા આ જ વિસ્તારમાંથી બે  પાકિસ્તાની બોટ પણ મળી આવી હતી. જેમાં માણસો મળ્યા ના હતા. હરામીનાળા ક્રીક વિસ્તારમાં બનેલી આ ઘટનાના પાંચ જ દિવસ બાદ ઇન્ડિયન ઇન્ટેલિજન્સ એજન્સી તરફથી મળેલા આ ઇનપુટને પગલે કચ્છ સહિતનાં ગુજરાતનાં દરિયાકાંઠા વિસ્તારમાં સુરક્ષા વ્યવસ્થા વધારી દેવામાં આવી છે.

હરામી નાળા નજીકથી મળી આવી પાકિસ્તાની ફિશિંગ બોટ:

બોર્ડર સિક્યુરિટી ફોર્સને કચ્છમાં ભારત-પાકિસ્તાન સરહદ નજીક માછીમારીની બે ખાલી બોટ મળી આવી છે. પાકિસ્તાનની આ ફિશિંગ બોટ મળવાને લીધે સનસનાટી ફેલાઇ છે. આ બોટ કચ્છના 'હરામી નાળા' નજીકથી મળી આવ્યા બાદ બીએસએફ દ્વારા આ વિસ્તારમાં સર્ચ ઓપરેશન શરૂ કરાયું છે. 

કચ્છમાંથી જ્યારે બોટ મળી હતી ત્યારે એવી વાત બહાર આવી હતી કે, બોટમાંથી માણસો ભાગી ગયા હતા. જોકે બોટના માણસો ભાગીને કઈ દિશામાં, એટલે કે પાકિસ્તાનમાં કે ભારત તરફ ભાગ્યા હતા તે જાણી શકાયું ના હતું. એક તરફ જયાં દરિયાઇ સીમાથી ભારતમાં  ધુસણખોરી વાત આવી રહી છે. ભારત-પાકિસ્તાન વચ્ચે વણસેલા સંબંધો વચ્ચે પાકિસ્તાની સરકારનાં મંત્રી તરફથી રોજ આપવામા યુદ્ધની ધમકીઓને કારણે પણ પાક મરીન કમાન્ડોનાં ઇનપુટને સુરક્ષાના જાણકારો ખૂબ જ મહત્વપૂર્ણ માની રહ્યા છે.