રાજ્યમાં ચાલી રહેલા રાજકીય ગરમાવા વચ્ચે ફરી એકવાર ઠંડીનો ચમકારો જોવા મળ્યો છે. ઉત્તર ભારતમાં પડી રહેલી ભારે હિમવર્ષાના પગલે રાજ્યમાં ફરી એકવાર શીત લહેર જોવા મળી છે. ઉત્તર ભારતમાં હિમાચલ પ્રદેશ અને જમ્મૂ-કાશ્મીરમાં ભારે હિમવર્ષાનો કહેર જોવા મળી રહ્યો છે. જેને લઇને તાપમાનમાં ભારે ઘટાડો જોવા મળ્યો છે.
રાજ્યમાં ફરી એકવાર જોવા મળ્યો ઠંડીનો ચમકારો
નલિયામાં તાપમાનનો પારો 8 ડિગ્રીએ પહોંચ્યો
પાટનગર ગાંધીનગરમાં પણ 10 ડિગ્રી તાપમાન
જ્યારે રાજ્યના અન્ય શહેરોની વાત કરીએ તો ભુજમાં 11 અને કંડલામાં 12 ડિગ્રી તાપમાન નોંધાયું છે. જ્યારે ડીસા અને રાજકોટમાં 10-10 ડિગ્રી તાપમાન નોંધાયું છે. રાજ્યમાં ઠંડીના ચમકારા વચ્ચે લોકો ઠુઠવાયા છે.
આ તરફ પાટનગર ગાંધીનગરમાં 10 ડિગ્રી તાપમાન નોંધાયું છે. બીજ તરફ ઈડરમાં 11 ડિગ્રી અને અમરેલીમાં 12 તેમજ અમદાવાદમાં 13 ડિગ્રી તાપમાન નોંધાયું છે.
હવામાન વિભાગની આગાહી મુજબ આગામી બે દિવસ સુધી રાજ્યમાં કડકડતી ઠંડી પડશે. આમ આકરી ઠંડીનો સામનો કરવા શહેરીજનો તૈયાર થઇ જાવ. 10 જાન્યુઆરી સુધી તાપમાનમાં ઘટાડો જોવા મળશે. રાજ્યમાં લઘુત્તમ તાપમાન ઘટતાં ઠંડીનું પ્રમાણ વધશે. જો કે બે દિવસ બાદ આકરી ઠંડીનું પ્રમાણ ઘટવાની શક્યતા છે.