ચેતવણી  / પાકિસ્તાનમાં નવાજૂનીના સંકેત! US-બ્રિટન, ઓસ્ટ્રેલિયા બાદ હવે આ દેશે પોતાના નાગરિકોને આપી વોર્નિંગ

• પાકિસ્તાન સ્થિત સાઉદી અરેબિયા દૂતાવાસે એક નિવેદન જાહેર કર્યું
• સાઉદી અરેબિયાએ આતંકી હુમલાની સંભાવના વ્યક્ત કરી નાગરિકોને સાવચેતી રાખવા કહ્યું
• અમેરિકા, બ્રિટન-ઓસ્ટ્રેલિયા ઈસ્લામાબાદમાં આતંકી હુમલાની સંભાવના વ્યક્ત કરી

પાકિસ્તાન સ્થિત સાઉદી અરેબિયાના એમ્બેસીએ સોમવારે પોતાના નાગરિકોને સાવચેત રહેવાની સલાહ આપી છે. ઈસ્લામાબાદમાં સત્તાવાળાઓ દ્વારા સુરક્ષા એલર્ટ જાહેર કર્યા બાદ સાઉદી અરેબિયાએ આ નિર્ણય લીધો છે. સાઉદી અરેબિયા પહેલા અમેરિકા, બ્રિટન અને ઓસ્ટ્રેલિયા સહિત વિશ્વના ઘણા દેશોએ પાકિસ્તાનની રાજધાની ઈસ્લામાબાદમાં આતંકી હુમલાની સંભાવના વ્યક્ત કરી છે અને પોતાના નાગરિકોને સાવચેતી રાખવા કહ્યું છે.

સાઉદી અરેબિયાએ શું કહ્યું?

પાકિસ્તાનમાં સાઉદી અરેબિયાના દૂતાવાસે ટ્વિટર પર એક નિવેદન જાહેર કરીને કહ્યું કે, "ઈસ્લામિક રિપબ્લિક ઓફ પાકિસ્તાનની રાજધાની ઈસ્લામાબાદમાં સત્તાવાળાઓએ સુરક્ષા એલર્ટને ઉચ્ચ સ્તરે વધાર્યું છે. તેથી સાઉદી અરેબિયાના દૂતાવાસે એક નિવેદન જાહેર કર્યું છે. અહીં રહેતા અને મુલાકાત લેતા તમામ નાગરિકોને સાવચેતી રાખવાની અને જો જરૂરી ન હોય તો બહાર ન જવાની સલાહ આપે છે. દૂતાવાસે લખ્યું છે કે, જો કોઈ પ્રકારની ઈમરજન્સી હોય તો કરાચીમાં દૂતાવાસ અથવા કોન્સ્યુલેટનો સંપર્ક કરો.

#تنبيه pic.twitter.com/6A7Q7z3lAl

— السفارة في باكستان - سعودی سفارت خانہ (@KSAembassyPK) December 26, 2022

અમેરિકાએ આતંકી હુમલાની આશંકા વ્યક્ત કરી 

પાકિસ્તાનમાં યુએસ એમ્બેસીએ રાજધાની ઇસ્લામાબાદની મેરિયટ હોટલમાં અમેરિકન નાગરિકો પર આતંકવાદી હુમલાની આશંકા વ્યક્ત કરી છે અને અમેરિકન કર્મચારીઓને પાકિસ્તાનની ફાઇવ સ્ટાર હોટલમાં પ્રવેશવા પર પ્રતિબંધ મૂક્યો છે. અમેરિકી દૂતાવાસે સુરક્ષા ચેતવણી જાહેર કરીને કહ્યું છે કે, સરકારને એવી માહિતી મળી છે કે, કેટલાક અજાણ્યા લોકો રજાઓ દરમિયાન ઈસ્લામાબાદની મેરિયટ હોટેલમાં અમેરિકન નાગરિકો પર હુમલો કરવાનું કાવતરું ઘડી રહ્યા છે. એડવાઈઝરીમાં સરકારે યુએસ નાગરિકોને રજાઓ દરમિયાન પ્રખ્યાત હોટેલ્સની મુલાકાત લેવા પર પ્રતિબંધ મૂક્યો છે. એમ્બેસીએ તમામ લોકોને રજાઓ દરમિયાન રાજધાની ઈસ્લામાબાદની બિનજરૂરી મુસાફરી ટાળવાની સલાહ આપી છે.

Read our travel advice for more: https://t.co/E5polKCJ45 pic.twitter.com/ewuLwk8hUn

— Neil Hawkins (@AusHCPak) December 26, 2022

નોંધનિય છે કે, બે દિવસ પહેલા ઈસ્લામાબાદના રહેણાંક વિસ્તારોમાં આત્મઘાતી બોમ્બ વિસ્ફોટ બાદ યુએસ એમ્બેસીએ આ એડવાઈઝરી જાહેર કરી હતી. શુક્રવારે આત્મઘાતી બોમ્બ વિસ્ફોટમાં એક પોલીસ અધિકારીનું મોત થયું હતું જ્યારે દસ અન્ય ઘાયલ થયા હતા. આ વિસ્ફોટ પોલીસ પેટ્રોલિંગ દરમિયાન ચેકિંગ દરમિયાન થયો હતો. પોલીસના જણાવ્યા અનુસાર જ્યારે પોલીસે ટેક્સીને રોકી ત્યારે પાછળની સીટ પર બેઠેલા એક મુસાફરે પોતાની જાતને ઉડાવી દીધી હતી.

ઓસ્ટ્રેલિયાએ પણ જાહેર કર્યું એલર્ટ 

ઈસ્લામાબાદમાં ઓસ્ટ્રેલિયન હાઈ કમિશને પણ પાકિસ્તાન માટે ટ્રાવેલ એલર્ટ જાહેર કર્યું છે. હાઈ કમિશને પાકિસ્તાનમાં સુરક્ષાના જોખમને ધ્યાનમાં રાખીને મુસાફરી ન કરવાની ચેતવણી આપી છે. ઓસ્ટ્રેલિયન હાઈ કમિશને યુએસ એમ્બેસીને ટાંકીને કહ્યું છે કે, કેટલાક અજાણ્યા લોકો રજાઓ દરમિયાન ઈસ્લામાબાદની મેરિયટ હોટલ પર હુમલો કરવાની યોજના બનાવી રહ્યા છે.

શું કહ્યું બ્રિટને ? 

બ્રિટનની ફોરેન, કોમનવેલ્થ એન્ડ ડેવલપમેન્ટ ઓફિસ (FCDO) એ પણ પાકિસ્તાનની મુલાકાત લેતા બ્રિટિશ નાગરિકો માટે ટ્રાવેલ એડવાઈઝરી જાહેર કરી છે. FCDOએ તેના નાગરિકોને ખૈબર-પખ્તુનખ્વા પ્રાંતના બાજુઆર, મોહમંદ, ખૈબર, ઓરકઝાઈ, કુર્રમ, ઉત્તર વઝિરિસ્તાન અને દક્ષિણ વઝિરિસ્તાન જિલ્લાઓમાં ન જવાની સલાહ આપી છે. આ સિવાય ખૈબર-પખ્તુનખ્વાના ચારસદ્દા, કોહાટ, ટાંક, બન્નુ, લક્કી, લોઅર ડીર અને પેશાવરની મુસાફરી ન કરવાની સલાહ આપવામાં આવી છે.

2008 મેરિયટ હોટેલ હુમલો

વર્ષ 2008માં મેરિયટ હોટલની સામે થયેલા વિસ્ફોટને કારણે તમામ દેશો એલર્ટ પર છે. 20 સપ્ટેમ્બર 2008ના રોજ ઇસ્લામાબાદના રેડ ઝોન વિસ્તારમાં મેરિયટ હોટલની સામે વિસ્ફોટકો વહન કરતી એક ડમ્પર ટ્રકમાં વિસ્ફોટ થતાં ઓછામાં ઓછા 54 લોકો માર્યા ગયા હતા.