અમરેલીના એક ગામેથી આરોપીની ધરપકડ બાદ પોલીસે તેના ઘર નજીક ફાયરિંગ કર્યાનો વીડિયો વાઈરલ, પોલીસે કરવો પડ્યો ખુલાસો
અમરેલી ફાયરિંગનો વાયરલ વીડિયો મામલો
ફાયરિંગ વાઇરલ વીડિયો મુદ્દે અમરેલી પોલીસનુ નિવેદન
આરોપીના ઘર પાસે લોકોના ટોળા ભેગા થયા હતાઃ પોલીસ
અમરેલીમાં ફાયરિંગનો એક વીડિયો વાઈરલ થઈ રહ્યો છે. સાથે પોલીસ પર ફાયરિંગ કરવાને લઈ કેટલાક સવાલો પણ ઉભા થઈ રહ્યા છે. જે બાદ પોલીસ દ્વારા ફાયરિંગની ઘટના અંગ ખુલાસો અને વીડિયો વાઈરલ કરવા મામલે નિવેદન અપાયું છે. પોલીસે કહ્યું કે, ગેરમાર્ગે દોરવા વીડિયો ક્લિપ વાઈરલ કરવામાં આવી રહી છે. વીડિયો વાઈરલ કરનાર વિરુદ્ધ તપાસ પણ કરવાની વાત પોલીસ કરી રહી છે.
અમરેલીના લુવારા ગામેથી ગુજસીટોકના ગુનામાં આરોપી અશોક બોરીચાને 26 જાન્યુઆરીના રોજ ધરપકડ કરાઈ હતી. લોકલ પોલીસ અને LCB આરોપીની ધરપકડ કરવા વાડીએ પહોંચી હતી. ત્યારે આરોપી તરફથી ફાયરિંગની ઘટના સર્જાઈ હતી. જવાબમાં પોલીસે પણ ફાયરિંગ કર્યું હતું.ફાર્મ હાઉસથી આરોપીની ધરપકડ બાદ આરોપીને તેના ઘરે લઈ જવાયો હતો. જ્યાંથી પોલીસને મોટા પ્રમાણમાં કારતૂસ અને શસ્ત્ર મળી આવ્યા હતા.
આ દરમિયાન લોકોનું ટોળું ભેગું થઈ રહ્યું હતું. જે બાદ પોલીસે લોકોના ટોળાને વિખેરવા માટે હવામાં ફાયરિંગ કર્યું હતું. આ દરમિાયન સ્થાનિક રહીશે ફાયરિંગનો વીડિયો બનાવ્યો છે. જે બાદથી આ વીડિયો સોશિયલ મીડિયામાં અલગ-અલગ મેસેજ સાથે વાઈરલ થઈ રહ્યો છે. વીડિયો વાઈરલ થયા બાદ પોલીસે કેટલીક બાબતોની સ્પષ્ટતા કરવી પડી હતી.