સુરતમાં યુવાનને માર મારતો વીડિયો વાયરલ થયા બાદ પોલીસે એક્ટિવ મોડમાં આવી ખુદ ફરિયાદી બની આરોપીને દબોચી લીધો હતો. હાલ આ મામલે વધુ તપાસ ચાલી રહી છે.
સુરતમાં યુવકને માર મારતો વીડિયો વાયરલ
કાકાના દિકરાને આરોપીએ માર્યો માર
પોલીસે જાતે ફરિયાદી બની આરોપીની કરી ધરપકડ
સુરત શહેરમાં અસામાજિક તત્વોનો આતંક આસમાને જોવા મળી રહ્યો છે. કામગીરી અને સબ સલામતીના દાવા વચ્ચે પણ મારામારી, લૂંટ, ચોરી સહિતની ઘટનાઓ છાશવારે સામે આવી રહી છે. જેથી પોલીસની ભૂમિકા સામે લોકોમાં રોષ વર્તાઈ રહ્યો છે. આવી સ્થિતિ વચ્ચે સુરતના અમરોલી વિસ્તારમાં યુવકને માર મારતો વીડિયો સોશિયલ મીડિયામાં વાયરલ થયો હતો. જેને પગલે પોલીસ તંત્ર દોડતું થયું હતું અને આ મામલે સુરતમાં પોલીસે દાખલારૂપ કાર્યવાહી કરી છે.
સુરતના અમરોલી વિસ્તારમાં યુવકને માર મારતો વીડિયો વાયરલ
તાજેતરમાં સુરતના અમરોલી વિસ્તારમાં યુવકને બેફામ માર મારતો હોવાનો વીડિયો વહેતો થયો હતો. જેમાં આરોપી લાકડી વડે આડેધડ યુવાનને માર મારતો નજરે પડે છે. જ્યારે અન્ય વ્યક્તિઓ પણ વીડિયોમાં દ્રશ્યમાન થઈ રહ્યા છે. એટલું જ નહીં ભોગગ્રસ્ત યુવાન જાહેરમાં આરોપીને પગે પડીને માફી માંગી કાકલૂદી પણ કરી રહ્યો છે. આ વાયરલ વીડિયોને લઈ પોલીસ હરકતમાં આવી હતી. જેમાં પોલીસે જાતે જ ફરિયાદી બની અને ગુન્હો નોંધ્યા બાદ તપાસના ચક્રો ગતિમાન કર્યા હતા. ત્યારબાદ આરોપી સુધી પહોંચવામાં પોલીસને સફળતા મળી હતી અને માર મારતા યુવકને અમરોલી પોલીસે દબોચી લીધો હતો. કોસાડ આવાસમાંથી આરોપી આશીનની અટકાયત બાદ પુછપરછ હાથ ધરવામાં આવી હતી.
માર મારતા યુવકની અમરોલી પોલીસે કરી ધરપકડ
પોલીસે વીડિયોના આધારે ગણતરીના કલાકમાં આરોપી આશીન શેખને ઝડપી પાડયા બાદ આશીન અહેરાર શેખની પ્રાથમિક પૂછપરછ હાથ ધરતા આરોપી પોતાના સગા કાકાના દિકરાને માર મારતો હોવાની વિગતો બહાર આવી હતી. જને પગલે પોલીસે માર મારવા પાછળનું કારણ સહિતની દિશામાં તપાસ લંબાવી છે.