યુપીના બલિયામાં કમલેશ નામના એક શખ્સ પોતાની સવા વર્ષની દિકરીને છાતીએ બાંધીને રિક્ષા ચલાવી રહ્યાં છે.
યુપીના બલિયાના કમલેશની તસવીર થઈ વાયરલ
પત્નીના મોત બાદ સવા વર્ષની દિકરીના ઉછેરની આવી જવાબદારી
દીકરીને છાતીએ બાંધીને ચલાવે છે રિક્ષા
પોતાના કાળજાના કટકા એવા સંતાનો માટે માતાપિતા ગમે તે હદે જવા તૈયાર હોય છે અને જ્યારે તેમના ઉછેરની વાત આવે ત્યારે જરાય પાછી પાની કરતા નથી ભલેને ગમે તેવી આફત કેમ ન આવે. યુપીના બલિયા જિલ્લામાં રિક્ષા ચલાવતાં એક શખ્સ ચર્ચામાં આવ્યાં છે.
સવા વર્ષની દીકરીને છાતીએ બાંધીને રિક્ષા ચલાવે છે
બલિયા જિલ્લામાં એક ઈ-રિક્ષા ચાલક આજકાલ ખૂબ ચર્ચામાં છે. સોશિયલ મીડિયા પર તેમના કેટલાક વીડિયો અને તસવીરો વાયરલ થઇ રહી છે જેમાં તેઓ પોતાની સવા વર્ષની દીકરીને છાતીએ બાંધીને રિક્ષા ચલાવી રહ્યાં છે. હકીકતમાં કમલેશ નામના રિક્ષા ચાલકની પત્નીનું મોત થઈ જતાં સવા વર્ષની દીકરીના ઉછેરની જવાબદારી તેમને માથે આવી છે.
કમલેશની માતાનું મોતિયાનું ઓપરેશન, દીકરીને સાથે લઈ જવી પડે છે
40 વર્ષીય કમલેશ વર્મા બલિયાના ડોકતી પોલીસ સ્ટેશન વિસ્તાર હેઠળના ચિરંજી છાપરા ગામનો રહેવાસી છે. તેમને પરિવારમાં એક વૃદ્ધ માતા અને સવા વર્ષની પુત્રી છે. કમલેશની પત્નીનું છ મહિના પહેલા અવસાન થયું હતું અને તાજેતરમાં જ તેમની માતાએ આંખની સર્જરી કરાવી હતી. આવી સ્થિતિમાં કમલેશની સામે દીકરીની સંભાળ લેવાનો પડકાર ઉભો થયો હતો. અહીં પરિવારને ઉછેરવા માટે રિક્ષા ચલાવવી પડે છે. તો બીજી તરફ દીકરીનું પણ ધ્યાન રાખવું પડે છે. માતાની આંખની સર્જરીને કારણે તે દીકરીને ઘરે મૂકીને જઈ શકતા નથી તેથી તેમણે દીકરીને સાથે રાખીને ઈ-રિક્ષા ચલાવવાનું શરૂ કર્યું.
દીકરી પણ હવે ટેવાઈ ગઈ
કમલેશનું કહેવું છે કે શરૂઆતમાં દીકરીને સાથે લઈ જવામાં તેને ઘણી મુશ્કેલીનો સામનો કરવો પડ્યો હતો. દીકરી માત્ર એક વર્ષની છે, તેથી તેનું ધ્યાન રાખવું ખૂબ જ મુશ્કેલ છે. પહેલાં જ્યારે તે રડતી હતી ત્યારે તેને શાંત પાડવી ખૂબ જ મુશ્કેલ હતી. હવે વસ્તુઓ થોડી સરળ થઈ ગઈ છે. હું દરરોજ સવારે 6 વાગ્યે કામ પર જવા નીકળું છું. હું મારી પુત્રીને ખવડાવવા માટે દૂધની બોટલ મારી સાથે રાખું છું. હું મારી પુત્રીના માતા અને પિતા બંને છું. કમલેશે જણાવ્યું હતું કે આશરે છ મહિના પહેલા ટ્રેનમાંથી પડી જવાથી તેની પત્નીનું મોત નીપજ્યું હતું. ત્યારથી તેઓ આવી રીતે દીકરીને રાખી રહ્યાં છે.
ધારાસભ્યો, સાંસદો મદદ માટે આગળ આવ્યા
બલિયાના ડીએમ રવિન્દ્ર કુમારનું કહેવું છે કે કમલેશ વિશે માહિતી મળી છે. વહીવટીતંત્ર દ્વારા તેમને તમામ શક્ય મદદ પૂરી પાડવામાં આવશે. કમલેશને પેન્શન, રેશનકાર્ડ અને સરકારી યોજનાઓનો લાભ મળશે. હું તેમની સાથે વાત કરીશ અને બાળકના સારા ઉછેરની ખાતરી કરવાનો પ્રયાસ કરીશ. સ્થાનિક ધારાસભ્ય જય પ્રકાશ આંચલે જણાવ્યું હતું કે કમલેશ વર્માની પુત્રીને છાતી સાથે બાંધીને ઇ-રિક્ષા ચલાવતા હોય તેવી તસવીરો અને વીડિયો કોઇનું પણ હૃદય પીગળાવી શકે છે. તેમણે કહ્યું કે તેઓ વર્માને આર્થિક સહાય પૂરી પાડશે અને તેમને તમામ શક્ય મદદ કરશે. સાંસદ વિરેન્દ્રસિંહ મસ્તના અંગત સચિવ અમનસિંહે જણાવ્યું હતું કે તેઓ વર્માને પાકું ઘર અપાવવાનો પ્રયાસ કરશે. તેમજ બેંકમાંથી લોન મેળવીને કમલેશ પોતાની ઈ-રીક્ષા મેળવવા પ્રયાસ કરશે. સામાજિક કાર્ય સાથે જોડાયેલા એક એનજીઓ સાથે જોડાયેલા મનીષ સિંહે કહ્યું કે વર્માની મદદ માટે તેઓ લોકો પાસેથી દાન એકઠું કરશે.