નિર્ણય / હવે અમદાવાદમાં કીટલીઓ પર 'ચા' નહીં મળે પાર્સલ, પેપર કપ બાદ હવે પ્લાસ્ટિકની થેલી પર પ્રતિબંધ

• અમદાવાદમાં પેપર કપ બાદ હવે પ્લાસ્ટિકની થેલીઓ પણ બંધ
• 60 માઈક્રોનથી ઓછી જાડાઈની થેલીઓ પર પ્રતિબંધ
• પ્લાસ્ટિકની થેલી બંધ કરાવવા AMC હાથ ધરશે તજવીજ

અમદાવાદ મ્યુનિસિપલ કોર્પોરેશન દ્વારા ગત 20મી જાન્યુઆરીથી પેપર કપ પર પ્રતિબંધ મૂકવામાં આવ્યો છે. AMCના અધિકારીઓ શહેરના વિવિધ વિસ્તારોમાં ચેકિંગ હાથ ધરી રહ્યા છે અને ચા કીટલીઓ પર પેપર કપમાં ચા આપતા વેપારીઓને દંડ ફટકારી રહ્યા છે. ત્યારે કોર્પોરેશન દ્વારા 60 માઈક્રોનથી ઓછી જાડાઈની પ્લાસ્ટિકની થેલીઓ ઉપર પ્રતિબંધ મૂકવામાં આવ્યો છે. 

પેપર કપ બાદ હવે ચાની થેલીઓ પણ બંધ થશે 
કીટલીઓ પર ચા પાર્સલ કરવા માટે જે 60 માઈક્રોનથી ઓછી જાડાઈની પ્લાસ્ટિકની થેલીનો વપરાશ કરવામાં આવે છે. તેના પર પણ પ્રતિબંધ મૂકવામાં આવ્યો છે. અમદાવાદ મ્યુનિસિપલ કોર્પોરેશન દ્વારા શહેરમાં સફાઈ અને ગંદકીને લઈને કડક કાર્યવાહી હાથ ધરી છે. જેના ભાગરૂપે ચાની કીટલીઓ ઉપર ચા પીવા માટે વાપરવામાં આવતા પેપર કપ  અને પાર્સલ માટે વપરાતી પ્લાસ્ટિકની થેલીઓ ઉપર પ્રતિબંધ મૂકવામાં આવ્યો છે. મહત્વનું છે કે, શહેરમાં મોટાભાગે ચા પાર્સલ કરવા માટે 60 માઈક્રોનથી ઓછી જાડાઈની પ્લાસ્ટિકની થેલી વાપરવામાં આવે છે જે પ્રતિબંધિત છે. છતાં પણ તેનો ઉપયોગ કરવામાં આવે છે. લોકો દ્વારા થેલીઓને પણ રોડ ઉપર કચરાની સાથે જ ફેંકવામાં આવે છે. 

ગંદકી મામલે કમિશનરનો નિર્ણય
મ્યુનિસિપલ કોર્પોરેશનના સોલિડ વેસ્ટ મેનેજમેન્ટ વિભાગ દ્વારા ચાની કીટલી પર પાર્સલ કરવા માટે આપવામાં આવતી થેલીઓના વપરાશ બંધ કરાવશે.  શહેરમાં ગંદકી મામલે કમિશનર દ્વારા કડક કાર્યવાહીના ભાગરૂપે નિર્ણય લેવામાં આવ્યા છે. 

પેપર કપ પર પ્રતિબંધ લગાવી દીધો
અત્રે ઉલ્લેખનીય છે કે, અમદાવાદ મ્યુનિસિપલ કોર્પોરેશને ચા માટે વપરાતા પેપર કપ પર પણ પ્રતિબંધ લગાવી દીધો છે. મ્યુનિસિપલ કોર્પોરેશનનું કહેવું છે કે, પેપર કપમાં અંદર લગાવાતું પડ આરોગ્ય માટે જોખમી છે. સાથે જ કીટલી પર ચા માટે વપરાતા પેપર કપથી કચરો ફેલાય છે. જે સ્થળો પર કચરો વધારે ઉત્પન્ન થતો હોય તેવા સ્થળોનો સર્વે કોર્પોરેશન દ્વારા કરાયો હતો. જેમાં કચરાનું વધુ સર્જન ચાના પેપર કપના કારણે થતું હોવાનું જાણવા મળ્યું હતું.