મહેસાણાના ઊંઝા માર્કેટિંગ યાર્ડ બાદ બહુચરાજી માર્કેટયાર્ડ પણ વિવાદમાં સપડાયું છે. બહુચરાજી માર્કેટયાર્ડની આગામી 22 સપ્ટેમ્બરે ચૂંટણી યોજાનાર છે. જેમાં રજની પટેલ અને વર્તમાન ચેરમેન વિઠ્ઠલ પટેલ જૂથ સામસામે છે. પરંતુ કનોડા ગામની મંડળીના મતદારને લઇને વિવાદ થયો છે. ચમન પરમાર નામના મતદાર ગુમ થયા હતા.
મહેસાણાના બહુચરાજી APMC ચૂંટણીનો વિવાદ
કનોડા ગામની મંડળીના મતદારને લઇને વિવાદ
ચમન પરમાર નામના મતદાર થયા હતા ગુમ
ચમનભાઈ વર્તમાન ચેરમેન ગૃપના મતદાર છે. મોઢેરા પોલીસ મથકે અપહરણની અરજી આપી હતી. વર્તમાન ચેરમેનના જૂથના 2 વ્યક્તિઓની પોલીસે અટકાયત કરી છે. તો બીજી તરફ ચમન પરમાર મોઢેરા પોલીસ સ્ટેશનમાં હાજર થયા છે. અને પોતાનું અપહરણ ન થયું હોવાનું નિવેદન કર્યું છે. જોકે અટકાયત કરાયેલા 2 લોકોને પોલીસ છોડવા તૈયાર નહી. જેને લઇ ટેકેદારોએ પોલીસ મથકે હોબાળો મચાવ્યો હતો. સાથે જ રજની પટેલ પર સરકારી તંત્રનો દુરૂપયોગનો આક્ષેપ લગાવ્યા છે.
બહુચરાજી માર્કેટયાર્ડના વર્તમાન શાસકોની ટર્મ પૂરી થતાં 22 મી સપ્ટેમ્બરના રોજ 15 બેઠકો માટે ચૂંટણી યોજાવાની છે વર્તમાન ચેરમેન વિઠ્ઠલભાઈ લાટીવાળાના શક્તિ પ્રદર્શન બાદ પૂર્વ ગૃહમંત્રી રજની પટેલ જૂથે પણ શક્તિ પ્રદર્શન કરતાં સહકારી રાજકારણમાં ગરમાવો આવી ગયો છે. આ ચૂંટણીમાં ખેડૂત વિભાગની 10 બેઠકો મહત્વપૂર્ણ હોઇ બંને જૂથો તે કબજે કરવા મરણિયા બન્યા છે.
માર્કેટયાર્ડની 22 સપ્ટેમ્બરે યોજાનારી ચૂંટણીનું ચિત્ર સ્પષ્ટ થઇ ગયું છે. મંગળવારે ફોર્મ પરત ખેંચવાના અંતિમ દિવસે કુલ 24 ફોર્મ પાછા ખેંચાતાં હવે 15 બેઠકો માટે 31 ઉમેદવારો મેદાનમાં રહ્યા છે. રસપ્રદ બાબત એ છે કે, રજની પટેલ જૂથના એક સભ્યએ ફોર્મ પરત નહીં ખેંચતાં હવે તેમની પેનલમાં ભંગાણ પડ્યું છે.
બહુચરાજી માર્કેટયાર્ડની ચૂંટણીમાં ખેડૂત વિભાગની 10 બેઠક માટે 39 ફોર્મ ભરાયાં હતાં, જેમાં 18 ફોર્મ પરત ખેંચાતાં હવે 21 ઉમેદવારો મેદાનમાં રહ્યા છે. વેપારી વિભાગની 4 બેઠક માટે 12 ફોર્મ ભરાયાં હતાં, જેમાં 4 ફોર્મ પાછા ખેંચાતાં હવે 8 ઉમેદવારો અને સહકારી ખરીદ વેચાણ વિભાગની 1 બેઠક માટે કુલ 4 ફોર્મ ભરાયાં હતાં. જેમાં 2 ફોર્મ પરત ખેંચાતાં હવે 2 ઉમેદવારો ચૂંટણી લડશે. ઉલ્લેખનીય છે કે, આ ચૂંટણી ભાજપના બે દિગ્ગજ વર્તમાન ચેરમેન વિઠ્ઠલભાઇ લાટીવાળા અને પૂર્વ ગૃહમંત્રી રજની પટેલ જૂથ વચ્ચે જામી છે. જેમાં રજની પટેલ જૂથમાંથી ડમી તરીકે ઉમેદવારી કરનાર એક સભ્યએ ફોર્મ પરત નહીં ખેંચાતાં તેમને શોધવા દોડધામ મચી હતી.