રાજુલા જાફરાબાદ બેઠક પર શબ્દોનું વોર યુદ્ધ શરૂ થઈ ગયું છે. હીરા સોલંકીના નિવેદન પર અંબરીશ ડેરે જવાબ આપ્યો છે. જેનો વીડિયો વાયરલ થયો છે. જેમાં તેઓ કહી રહ્યા છે કે, ઘા કરો તો સામી છાતીએ ઘા કરો. છાતીએ ઘા ખાવા માટે તો બેઠા છીએ.
રાજુલા જાફરાબાદ બેઠક પર શબ્દોનું વોર યુદ્ધ
હીરા સોલંકી બાદ અંબરીશ ડેરનો વીડિયો વાયરલ
અંબરીશ ડેરે વિરોધીઓ પર કર્યા પ્રહાર
ઘા કરો તો સામી છાતીએ ઘા કરો: અંબરીશ ડેર
ગુજરાત વિધાનસભાની ચૂંટણી નજીક આવતા નેતાઓના વિવાદિત વીડિયો વાયરલ થવા શરૂ થયા છે. ગઈકાલે રાજુલા બેઠકના ભાજપના ઉમેદવાર હીરા સોલંકીનો વિવાદિત નિવેદનનો વીડિયો વાયરલ થયો હતો, જેના જવાબમાં આજે કોંગ્રેસ ઉમેદવાર અંબરીશ ડેરનો વીડિયો સામે આવ્યો છે.
મર્યાદામાં રહીને લડે એવો ખાનદાન દુશ્મન જોઈએ છેઃ અંબરીશ ડેર
વીડિયોમાં કોંગ્રેસના ઉમેદવાર અંબરીશ ડેર જાહેર સભામાં સ્ટેજ પરથી કહી રહ્યા છે કે, 'મર્યાદામાં રહીને લડે એવો ખાનદાન દુશ્મન જોઈએ છે. હીન કક્ષાનું રાજકારણ ન કરે એવો વિરોધી જોઈએ અને મારી આ ઈચ્છા પૂરી થાય એવી હું ભગવાન દ્વારકાધીશને પ્રાર્થના કરું છું કે આવો મેદાનમાં. ઘા કરો તો સામી છાતીએ ઘા કરો. છાતીએ ઘા ખાવા માટે તો બેઠા છીએ. મારાભાઈ પાઠળથી શું લલ્લુ પચ્ચું ની જેમ કામ કરો છો. એટલે જ કહું છું મર્દાનગીથી કામ કરવા માટે છીએ.'
ધાકધમકી દેનારાના ડબ્બા હું ગુલ કરવાનો છુંઃ હીરા સોલંકી
ગતરોજ રાજુલા બેઠકના ભાજપ ઉમેદવાર હીરા સોલંકીનો વિવાદિત વીડિયો વાયરલ થયો હતો. જેમાં કાર્યકર્તાઓને સંબોધન કરતી વખતે હીરા સોલંકીએ વિવાદિત નિવેદન આપ્યું હતું. વીડિયોમાં હીરા સોલંકીએ કહ્યું કે, 'ભાજપના કાર્યકર્તાઓએ કોઈનાથી ડરવાની જરૂર નથી. ધાકધમકી દેનારાના ડબ્બા હું ગુલ કરવાનો છું. અત્યારે જે લોકો માહોલ બગાડવાનો પ્રયાસ કરે છે, તે લોકોને ચૂંટણી બાદ હું જોઈ લઇશ. વિવાદિત નિવેદન આપવા સાથે હીરા સોલંકીએ આ નિવેદનને વાયરલ કરવા કાર્યકર્તાઓને અપીલ પણ કરી છે.' ઉલ્લેખનીય છે કે, ભાજપે રાજુલા બેઠક પર હીરા સોલંકીને ટિકિટ આપી છે.