દેશ વિરુદ્ધ ઝુંબેશ ચલાવતી ૪૦ વેબસાઇટ પર ભારત સરકારે આકરી કાર્યવાહી કરી છે. કેન્દ્રીય ગૃહ મંત્રાલયે તાત્કાલિક અસરથી ૪૦ વેબસાઇટ પર પ્રતિબંધ મૂકવાનો નિર્ણય લીધો છે.
ભારતમાં ૪૦ વેબસાઈટ પર રાષ્ટ્ર વિરોધી ગતિવિધિના કારણે પ્રતિબંધ
ખાલિસ્તાની પ્રવૃત્તિ સાથે જોડાયેલી વેબસાઈટ ઉપર પ્રતિબંધ
પ્રતિબંધિત સંગઠન શીખ ફોર જસ્ટિસ (SFJ) સાથે જોડાયેલી ૪૦ વેબસાઇટ પર અલગતાવાદી પ્રવૃત્તિઓનું સમર્થન કરવા બદલ સરકાર દ્વારા પ્રતિબંધ મૂકવામાં આવ્યો છે.
અમેરિકા સ્થિત શિખ ફોર જસ્ટિસ (SFJ) એક ખાલિસ્તાન સમર્થક જૂથ છે. ગૃહ મંત્રાલયના પ્રવક્તાએ કહ્યું કે ગેરકાયદે પ્રવૃત્તિઓ (નિવારણ) અધિનિયમ (UAPA), ૧૯૬૭ હેઠળ શીખ ફોર જસ્ટિસ (SFJ) ગેરકાયદે સંસ્થા છે. તેમણે તેમના હેતુ માટે સમર્થકોની નોંધણી કરવા માટે એક ઝુંબેશ શરૂ કરી હતી. ગૃહ મંત્રાલયની ભલામણ પર ઇલેક્ટ્રોનિક્સ અને માહિતી ટેકનોલોજી મંત્રાલયે માહિતી ટેકનોલોજી અધિનિયમ, ૨૦૦૦ની કલમ-૬૯-એ હેઠળ SFJની ૪૦ વેબસાઇટ પર પ્રતિબંધ મૂકવાનો આદેશ આપ્યો છે.
ગૃહ મંત્રાલયે SFJ પર દેશ વિરોધી પ્રવૃત્તિના આક્ષેપના કારણે પ્રતિબંધ મૂક્યો હતો
ઇલેક્ટ્રોનિક્સ અને માહિતી ટેકનોલોજી મંત્રાલય ભારતમાં સાયબર સ્પેસને મોનિટર કરવા માટેની નોડલ એજન્સી છે. ગત વર્ષે ગૃહ મંત્રાલયે SFJ પર દેશ વિરોધી પ્રવૃત્તિના આક્ષેપના કારણે પ્રતિબંધ મૂક્યો હતો. SFJએ તેના અલગાવવાદી એજન્ડા હેઠળ શીખ લોકમત સંગ્રહ પર ભાર મૂક્યો હતો. અન્ય એક અધિકારીએ કહ્યું કે આ સંગઠન ખાલિસ્તાનના ઉદ્દેશને ખુલ્લેઆમ સમર્થન આપે છે અને આમ કરવાથી ભારતની સાર્વભૌમત્વ અને પ્રાદેશિક અખંડિતતાને પડકારવામાં આવે છે.