મહામારી / બંગાળમાં રેલીઓ મુદ્દે કોલકતા હાઈકોર્ટે બરાબર ઝાટકતા ચૂંટણી પંચ સફાળું જાગ્યુ, તાત્કાલિક કર્યુ આ કામ

• રેલીઓમાં કોરોનાના નિયમોના ધજાગરા
• કોલકાતા હાઈકોર્ટે ચૂંટણી પંચને કર્યો આદેશ
• રેલીઓમાં કોરોનાના નિયમોનું પાલન કરાવો
• પંચના ઠપકા બાદ ચૂંટણી પંચ જાગ્યું 

16 એપ્રિલે યોજનારી બેઠકમાં ચૂંટણી પંચ અને રાજકીય પક્ષો કોરોનાના નિયમોની ચર્ચા કરશે તથા રેલીઓમાં કેવી રીતે કોરોનાના નિયમોનું પાલન કરાવવું તે અંગે મંથન કરશે. સૂત્રો તો એવું પણ જણાવી રહ્યાં છે કે બેઠકમાં ચૂંટણી પંચના અધિકારીઓ રાજકીય નેતાઓને રેલીઓમાં કોવિડ ગાઈડલાઈનનું કડકાઈથી પાલન કરાવવાનું પણ જણાવશે.

કોલકાતા હાઈકોર્ટે ચૂંટણી રેલીઓમાં કોરોનાના નિયમોના ઘોર ઉલ્લંઘનનો કેસ હાથમાં લીધો હતો. હાઈકોર્ટે આ કેસની સુનાવણી કરતા તમામ જિલ્લા કલેક્ટરોને રાજકીય રેલીઓ પર નજર રાખવાનું તથા જરુરી લાગે તો સોશિયલ ડિસ્ટન્સિંગનું પાલન કરાવવા માટે કલમ 144 લાગુ પાડવાનો ઓર્ડર કર્યો હતો. હાઈકોર્ટે કોરોનાના નિયમોનું કડકાઈથી પાલન કરાવવાની જવાબદારી જિલ્લાધિકારી અને ચૂંટણી અધિકારીઓ પર નાખી. 

જરુર પડે તો કલમ 144 લાગુ પાડો
હાઈકોર્ટે વહિવટીતંત્રને કોરોનાની ભયાનકતા જોતા જો જરુર પડે તો ધારા 144 લાગુ પાડવાનો, લોકો પાસે માસ્ક પહેરાવવાનો તથા દરેક જગ્યાએ સેનિટાઈઝરની વ્યવસ્થા કરવાનો પણ ઓર્ડર આપ્યો છે. જસ્ટિસ અરજિત બેનરજીએ જણાવ્યું કે આપણે એક અસામાન્ય પરિસ્થિતિનો સામનો કરી રહ્યાં છીએ અને તેથી તેના નિવારણ માટે પણ અસામાન્ય પગલાં ભરવાનો વારો આવ્યો છે. સમાજના કેટલાક લોકોના અવિચારી, બેફ્રિક અને મનમાની ધોરણના વ્યવહારને કારણે લાખો લોકોનું જીવન જોખમાય તેવું ન થવા દેવાય. તેથી રાજકીય પક્ષો અને ઉમેદવારોને અમારો આદેશ છે કે તેઓ તેમની રેલીઓમાં લોકો પાસે માસ્ક પહેરાવે અને સોશિયલ ડિસ્ટન્સિંગના નિયમોનું પાલન કરાવે. 

પહેલી વાર દેશમાં રેકોર્ડ 1 લાખ 85 હજારથી વધારે કેસ આવ્યા 

ભારતમાં કોરોના સંક્રમણ બેકાબુ રફ્તાર ચાલુ છે. દેશમાં કોરોનાના દર્દીઓ અને મોતના આંકમાં સતત વધારો થઈ રહ્યો છે. પહેલી વાર દેશમાં રેકોર્ડ 1 લાખ 85 હજારથી વધારે કેસ આવ્યા છે. ભારતમાં કોરોનાના એક્ટિવ મામલા હવે 13 લાખને પાર થઈ ગયા છે. ઉલ્લેખનીય છે કે કેટલાક દિવસોમાં દેશમાં સતત દોઢ લાખથી વધારે કોરોનાના પોઝિટિવ કેસ આવ્યા છે.

24 કલાકમાં 1.85 લાખથી વધારે નવા કેસ આવ્યા

વર્લ્ડોમીટર અનુસાર ગત 24 કલાકમાં 1.85 લાખથી વધારે નવા કેસ આવ્યા બાદ સંક્રમિતોની કુલ સંખ્યા 1.38 કરોડને પાર પહોંચી ગઈ છે. જ્યારે 1 હજારથી વધારે મોત થતા કુલ મોતનો આંક 1, 72, 115 થઈ ગઈ છે. ગત દિવસોમાં સતત પોઝિટિવ આવનારા મામલાની સાથે કોરોનાથી સાજા થનારાના દરમાં ઘટાડો થયો છે.કોરોના પર કાબુ મેળવવા માટે મહારાષ્ટ્રમાં આજ રાત 8 વાગ્યાથી કડક નિયમો લાગૂ થશે. મહારાષ્ટ્રમાં બ્રેક ધ ચેન નામનુ અભિયાન હેઠળ 15 દિવસ સુધી કલમ 144 લાગૂ રહેશે. આ દરમિયાન ફક્ત જરુરી સેવાઓ માટે ઘરની બહાર નિકળી શકશો.