એવું લાગી રહ્યું છે કે, હવે બોલિવૂડમાં પણ કોરોના પગપેસારો કરી રહ્યો છે. હાલમાં જ એવા સમાચાર મળ્યા હતા કે, બોલિવૂડના જાણીતા પ્રોડ્યૂસર કરીમ મોરાનીની બંને દીકરીઓ કોરોના પોઝિટિવ છે અને બંને હોસ્પિટલમાં સારવાર હેઠળ છે. જોકે, હવે કરીમ મોરાનીનો કોરોના રિપોર્ટ પણ પોઝિટિવ આવ્યો છે. જે બાદ કરીમ મોરાનીને પણ ઈલાજ માટે નાણાવટી હોસ્પિટલમાં દાખલ કરવામાં આવ્યા છે. તમને જણાવી દઈએ કે, કરીમ મોરાની તથા શાહરુખ ખાન ખાસ મિત્રો છે
બંને દીકરીઓ બાદ હવે પ્રોડ્યુસર કરીમ મોરાની કોરોના પોઝિટિવ
બંને દીકરીઓ અને પિતા હોસ્પિટલમાં સારવાર હેઠળ
તેમની બિલ્ડિંગને સીલ કરાઈ
એક અખબાર સાથેની વાતચીતમાં કરીમ મોરાનીના ભાઈ મોહમ્મદ મોરાનીએ કહ્યું કે, તેના ભાઈનો ટેસ્ટ પોઝિટિવ આવ્યો છે. કરીમ મોરાની બંને દીકરીઓ સાથે જ મુંબઈમાં રહે છે. ઘરમાં બંને દીકરીઓ પોઝિટિવ હોવાથી પરિવારનો ટેસ્ટ કરવામાં આવ્યો હતો.
ઉલ્લેખનીય છે કે કરીમ મોરાનીની નાની દીકરી શાઝા પણ આ જ હોસ્પિટલમાં સારવાર લઈ રહી છે. જ્યારે મોટી દીકરી ઝોયા કોકિલાબેન ધીરુભાઈ અંબાણી હોસ્પિટલમાં છે. જે બિલ્ડિંગમાં કરીમ મોરાનીનો પરિવાર રહે છે તે બિલ્ડિંગને સીલ કરી દેવામાં આવી છે. જ્યારે આસપાસના વિસ્તારમાં ભય જોવા મળી રહ્યો છે. જે વિસ્તારમાં કરીમ રહે છે ત્યાં અન્ય બોલિવૂડ સ્ટાર્સ પણ રહબે છે. આ પહેલાં બોલિવૂડથી જોડાયેલ કનિકા કપૂર કોરોના પોઝિટિવ આવી હતી અને હવે તે ઈલાજ કરાવીને ઘરે પરત આવી ગઈ છે.
કરીમની બંને દીકરીઓ શ્રીલંકાથી પરત મુંબઈ આવી હતી. કરીમના પરિવારજનો માટે આ ચિંતાની વાત છે ત્યારે કરીમે કહ્યું કે સૌથી પહેલાં તેની દીકરી ઝોયા કોરોના પોઝિટિવ આવી અને તેની દીકરી શાઝામાં તો કોરોનાના કોઈ લક્ષણો પણ નહોતા. તેમ છતાં તેનો રિપોર્ટ કોરોના પોઝિટિવ આવ્યો હતો. તમને જણાવી દઈએ કે, કરીમ મોરાની રા.વન, ચેન્નઈ એક્સપ્રેસ, હેપી ન્યૂ યર તથા દિલવાલે સહિતની ફિલ્મ પ્રોડ્યૂસ કરી છે.