ચોમાસું / લાંબા વિરામ બાદ રાજ્યમાં ફરી મેઘરાજાનું આગમન, જાણો ક્યાં કેટલો વરસાદ

અમરેલી જીલ્લમાં ઠેર ઠેર વરસાદ:

અમરેલીના વડીયા, લાઠી, બગસરા, ધારી અને આસપાસના ગ્રામ્ય વિસ્તારોમાં વરસાદનું આગમન થયું છે. વડીયામાં એક કલાકમાં એક ઇંચ જેટવો વરસાદ ખાબક્યો છે. જેના કારણે બજારોમાં પાણી ભરાઇ ગયા છે. તો લાઠી ગ્રામ્ય વિસ્તારોમાં ધોધમાર વરસાદ પડી રહ્યો છે. રામપર, તાજપર સહિતના ગામોમાં વરસાદ પળતા નાળા છલકાઇ ઉઠ્યા છે. રામપર-નાનરાજકોટ રોડ પરના નદી-નાળામાં નવા નીર આવ્યા છે. ધારી અને આસપાસના ગ્રામ્ય વિસ્તારોમાં વરસાદનું આગમન થતાં વાવડી ગામની નદીમાં નવા નીર આવ્યા છે. જ્યારે બગસરા, લૂંધિયા તેમજ આજુબાજુના ગામોમાં ધોધમાર વરસાદ પડી રહ્યો છે. વરસાદના આગમનથી ખેડૂતોમાં ખુશી જોવા મળી છે.

જૂનાગઢમાં મનપા ચૂંટણી વચ્ચે ધોધમાર વરસાદ:

જૂનાગઢમાં મહાનગરપાલિકાની ચૂંટણી યોજાઈ છે. તો મનપા ચૂંટણી વચ્ચે ધોધમાર વરસાદ વરસી રહ્યો છે. જિલ્લાના કાળવા ચોક, ગીરનાર, મોતીબાગ, જાંઝરડા ચોકડી, મધુરમ વિસ્તાર, ગાંધીગ્રામ, મજેડી દરવાજા વિસ્તારમાં ધોધમાર વરસાદનું આગમન થયુ છે. ભારે વરસાદના કારણે મતદાન પર અસર થાય તેવી પણ શક્યતા છે.

સુરતમાં મોડીરાત્રે ગાજવીજ સાથે વરસાદ:

સુરત જિલ્લામાં લાંબા વિરામ બાદ મોડીરાત્રે ગાજવીજ સાથે વરસાદ પડી રહ્યો છે. સુરત સહિત ઓલપાડ, કીમ, કોસંબા, માંગરોળ સહિતના વિસ્તારોમાં વરસાદ પડી રહ્યો છે. વરસાદ પાછો ખેંચાયા બાદ ખેડૂતો ચિંતામાં હતા અને ઠેર ઠેર મેઘરાજાને રીઝવવા માટે પૂજા-પાઠ કરી રહ્યા હતા. ત્યારે વરસાદ શરૂ થતા લોકોએ રાહતનો શ્વાસ લીધો છે. સુરતના ઉમરા, વેસુ, અઠવાલાઇન સહિતના વિસ્તારમાં વીજળીના કડાકા સાથે ધોધમાર વરસાદ પડ્યો છે.

ભરૂચમાં વરસાદી માહોલ:

તો આ બાજુ ભરૂચમાં વરસાદી માહોલ છવાયો છે. ભારે પવન સાથે વરસાદ પડી રહ્યો છે. લાંબા સમયના વિરામ બાદ મેઘમહેર થઇ છે. વરસાદના આગમથી ખેડૂતોમાં ખુશીની લાગણી જોવા મળી છે.

નર્મદા:

નર્મદા જિલ્લાના 5 તાલુકામાં વરસાદી માહોલ જોવા મળી રહ્યો છે. મોડીરાતથી રાજપીપળામાં વરસાદ પડી રહ્યો છે. ત્યારે લાંબા વિરામ બાદ વરસાદ પડતા ખેડૂતોના પાકને જીવતદાન મળ્યું છે.

વડોદરા:

વડોદરામાં વરસાદનું આગમન થયું છે. વહેલી સવારથી વરસાદી માહોલ છવાયો છે. ગાજવીજ સાથે ધીમી ધારે વરસાદ શરૂ થઇ ગયો છે. શહેરના મોટાભાગના વિસ્તારોમાં વરસાદ પડી રહ્યો છે.

બોટાદ:

તો આ બાજુ બોટાદમાં વહેલી સવારથી વરસાદી માહોલ જોવા મળી રહ્યો છે. ગઢડામાં વીજળીના જોરદાર કડાકા શરૂ થઇ ગયા છે. અને ભારે પવન સાથે ધોધમાર વરસાદ પડી રહ્યો છે.

નવસારી:

નવસારીમાં લાંબા વિરામ બાદ મોડીરાતથી વીજળીના કડાકા ભડાકા સાથે ફરી વરસાદનું આગમન થયું છે. લંબાયેલા વરસાદ બાદ આગમન થતા ધરતીપુત્રોમાં ખુશીની લહેર જોવા મળી છે. જ્યારે લોકોને ગરમીથી રાહત મળી છે.

ભાવનગર:

ભાવનગરમાં વીજળીના ભારે કડાકા સાથે મોડીરાત્રે ધોધમાર વરસાદ પડ્યો છે. વરસાદના પગલે શહેરના કેટલાક વિસ્તારોમાં વિજળી ગુલ થઇ ગઇ હતી. તો લાંબા વિરામ બાદ મેઘો મંડાતા ખેડૂતોમાં હર્ષની હેલી જોવા મળી છે.

હવામાન વિભાગની આગાહી:

રાજ્યમાં વરસાદને લઇને હવામાન વિભાગે આગાહી કરી છે. આગામી 2 દિવસ હળવાથી મધ્યમ વરસાદની આગાહી હવામાન વિભાગે કરી છે. જેમાં અમદાવાદ, સૌરાષ્ટ્ર-કચ્છમાં હળવાથી ભારે વરસાદની આગાહી કરી છે. તો અમદાવાદમાં આજે અને આવતીકાલે છુટાછવાયા વરસાદની શક્યતા છે. જ્યારે આગામી 2 દિવસ દક્ષિણ ગુજરાતમાં ભારે વરસાદની આગાહી કરવામાં આવી છે.

સરદાર સરોવર નર્મદા ડેમની સપાટીમાં વધારો:

સરદાર સરોવર નર્મદા ડેમની સપાટીમાં વધારો નોંધાયો છે. પાણીની આવક થતા ડેમની જળસપાટીમાં વધારો થયો છે. છેલ્લા 12 કલાકમાં ડેમની સપાટીમાં 21 સેન્ટીમીટરનો વધારો થયો છે. ડેમની સપાટી વધીને 121.47 મીટર પર પહોંચી છે. હાલમાં ડેમમાં 44 હજાર 992 ક્યુસેક પાણીની આવક થઈ રહી છે. જ્યારે સિંચાઈ માટે ડેમમાંથી 9 હજાર 992 ક્યુસેક પાણી છોડવામાં આવી રહ્યુ છે. હાલમાં ડેમમાં 1340 MCM પાણીનો લાઈવ સ્ટોરેજ જથ્થો છે.