IPLની સૌથી સફળ ટીમોમાંની એક ચેન્નઈ સુપર કિંગ્સ (CSK)ના હેડ કોચ સ્ટીફન ફ્લેમિંગે ટીમના કેપ્ટન મહેન્દ્રસિંહ ધોની અંગે કેટલીક મહત્ત્વપૂર્ણ વાત કરી છે.
ધોની ૨૦૧૯ના વિશ્વકપમાં ન્યૂઝીલેન્ડ સામે સેમિફાઇનલ રમ્યો હતો
ચેન્નઈના આ 'હેલિકોપ્ટર'ને ચાહકો આજથી 'ટેક ઓફ' થતું જોવા ઉત્સુક
બ્રેકના કારણે માહી વધુ ફિટ, માનસિક રીતે વધુ મજબૂત
ધોની ૨૦૧૯ના વિશ્વકપમાં ન્યૂઝીલેન્ડ સામે સેમિફાઇનલ રમ્યો હતો. માહી ૧૪ મહિના બાદ મેદાનમાં પાછો ફરી રહ્યો છે. આ દરમિયાન ધોનીએ ૧૫ ઓગસ્ટ, ૨૦૨૦ના રોજ આંતરરાષ્ટ્રીય ક્રિકેટને અલવિદા કહી દીધું હતું. ચેન્નઈના આ 'હેલિકોપ્ટર'ને ચાહકો આજથી અબુધાબીમાં 'ટેક ઓફ' થતું જોવા ઉત્સુક છે.
ફ્લેમિંગે જણાવ્યું, ''એકાદ વર્ષ જેટલો બ્રેક ધોની માટે ઘણો ફાયદાકારક છે. આ બ્રેકના કારણે માહી વધુ ફિટ, માનસિક રીતે વધુ મજબૂત અને તાજોમાજો નજરે પડી રહ્યો છે, જે ટૂર્નામેન્ટમાં તેની બેટિંગ અને કેપ્ટનશિપ માટે ફાયદાકારક રહેશે. બેશક માહીએ આંતરરાષ્ટ્રીય ક્રિકેટને અલવિદા કહી દીધું છે, પરંતુ તેનામાં કંઈ પણ બદલાયું નથી. તે અગાઉની જેમ જ નેટ્સમાં બેટિંગ અને વિકેટકીપિંગ કરી રહ્યો છે.'' આજે રાત્રે ભારતીય સમય અનુસાર ૭.૩૦ વાગ્યે અબુધાબીના શેખ ઝાયેદ સ્ટેડિયમમાં સીએસકેનો પ્રથમ મુકાબલો મુંબઈ ઇન્ડિયન્સ સામે થવાનો છે.
ફ્લેમિંગે મહેન્દ્રસિંહ ધોની ઉપરાંત સીએસકેના મોટી ઉંમરના ખેલાડીઓ અંગે પણ વાત કરી. ફ્લેમિંગે જણાવ્યું, ''સીએસકેમાં અન્ય ટીમની સરખામણીએ ૩૫ વર્ષથી મોટી ઉંમરના વધુ ખેલાડી છે, પરંતુ એ જ અમારા માટા ફાયદાકારક વાત છે, કારણ કે સિનિયર ખેલાડીઓનો અનુભવ ઘણો વધુ હોય છે. ગત સિઝનમાં આ જ ખેલાડીઓએ પોતાના પ્રદર્શનથી ટીકાકારોને આકરો જવાબ આપ્યો હતો. સિનિયર ખેલાડી મેચ દરમિયાન કોઈ પણ પરિસ્થિતિ અનુસાર પોતાની જાતને એડજસ્ટ કરી શકે છે અને દબાણનો સામનો પણ કરી શકે છે. હું સારી રીતે જાણું છું કે ધોની, શેન વોટસન, કેદાર જાધવ અને ઇમરાન તાહિર જેવા ખેલાડી કોઈ પણ સમયે એકલા હાથે મેચનું પાસું પલટી શકવા સક્ષમ છે.
ટીમની ઓપનિંગ જોડીનો મદાર શેન વોટસન અને અંબાતી રાયડુ પર રહેવાની શક્યતા છે. ફાફુ ડુ પ્લેસિસ પણ વોટસન સાથે ઇનિંગ્સની શરૂઆત કરતો નજરે પડી શકે છે, જોકે ફાફનું રમવું વિદેશી ખેલાડીઓના કોમ્બિનેશન પર નિર્ભર કરશે. નિયમ અનુસાર અંતિમ ઈલેવનમાં માત્ર ચાર વિદેશી ખેલાડીને સામેલ કરી શકાય છે. આમાં ડ્વેન બ્રાવો, વોટસનનું રમવું નક્કી છે. બોલિંગમાં લૂન્ગી એન્ગિડી અને જોસ હેઝલવૂડમાંથી એક મેદાનમાં ઊતરશે અને સ્પિનમાં ઈમરાન તાહિર અથવા મિચેલ સેન્ટનરમાંથી કોઈ એકને અંતિમ ઈલેવનમાં તક મળી શકે છે.