ઘટસ્ફોટ / લગ્નના 12 વર્ષ બાદ પૂજાએ કહ્યું 'હું તો હસીના બાનો છું', છુપાઈને દીકરાને પઢાવી રહી હતી નમાઝ 

• જગવીર નામના વ્યક્તિને લગ્નના 12 વર્ષ પછી ખબર પડી કે પત્ની મુસ્લિમ છે 
• પત્નીનું સત્ય બહાર આવ્યા બાદ જગવીર પર ઇસ્લામ કબૂલ કરવા માટે દબાણ 
• જગવીરે પોલીસ ફરિયાદ નોંધાવતા એક વ્યક્તિની ધરપકડ

ઉત્તરપ્રદેશમાં એક ચોંકાવનારો ઘટનાક્રમ સામે આવ્યા છે. વાત જાણે એમ છે કે, જગવીર નામના વ્યક્તિના લગ્ન 12 વર્ષ પહેલા પૂજા સાથે થયા હતા. તેને બે બાળકો પણ છે. પરંતુ હવે જગવીરને ખબર પડી રહી છે કે, તેની પત્ની પૂજા વાસ્તવમાં પૂજા નહીં પરંતુ હસીના બાનો છે. જગવીરે આ મામલે પોલીસમાં ફરિયાદ નોંધાવી છે. 

ફરિયાદી જગવીરે આરોપ લગાવ્યો છે કે, તેની પત્નીનું સત્ય બહાર આવ્યા બાદ તેના પર ઇસ્લામ કબૂલ કરવા માટે દબાણ કરવામાં આવી રહ્યું છે અને જો તે આમ નહીં કરે તો તેને જાનથી મારી નાખવાની ધમકી આપવામાં આવી રહી છે. જગવીરનું કહેવું છે કે, જો તે ધર્મ પરિવર્તન નહીં કરે તો તેને શિરચ્છેદ કરવાની ધમકી આપવામાં આવી રહી છે. આ કેસમાં પોલીસે ધમકી આપનાર વ્યક્તિની ધરપકડ કરી છે.

જગવીરને આ વાતની ખબર ત્યારે પડી કે જ્યારે એક દિવસ તેને હસીનાને બાળકોને નમાઝ શીખવતી વખતે જોઈ. જગવીરને શંકા જતાં તેણે તેની પત્ની સાથે વાત કરી. આ પછી બંને વચ્ચે ઝઘડો થયો અને પત્ની બંને બાળકોને લઈને યુપીના પ્રતાપગઢ સ્થિત તેના મામાના ઘરે ગઈ. પરત ફર્યા ત્યારે જગવીરને ખબર પડી કે તેના પુત્રની પણ સુન્નત કરવામાં આવી છે. જ્યારે જગવીરે આ અંગે વાંધો ઉઠાવ્યો તો વિવાદ વધી ગયો. આરોપ છે કે, હસીનાના માતા-પિતાએ સ્થાનિક દબંગ રાજુ ઉર્ફે નસીરનો સંપર્ક કર્યો અને જગવીરને ધર્મ પરિવર્તન માટે દબાણ કરવા કહ્યું. નસીરે જગવીર પર ઇસ્લામ સ્વીકારવા માટે દબાણ કર્યું અને જો તે ન કરે તો તેનું માથું કાપી નાખવાની ધમકી આપી. આ પછી જગવીરે પોલીસમાં ફરિયાદ નોંધાવી. 18 સપ્ટેમ્બરના રોજ પોલીસ દ્વારા નસીરની ધરપકડ કરવામાં આવી.

બંનેના લગ્ન કેવી રીતે થયા ? 

પ્રાથમિક વિગતો મુજબ જગવીરના જીજાજી રામ જન્મ કોરીને ફૈઝાબાદ રેલવે સ્ટેશન પર એક છોકરી મળી હતી, જેણે તેનું નામ પૂજા જણાવ્યું  હતું. યુવતીએ એમ પણ કહ્યું કે, તેના પરિવારમાં કોઈ નથી, તે અનાથ છે. રામ તે છોકરીને લઈને ઘરે આવ્યો અને જગવીરને તેની સાથે લગ્ન કરવા કહ્યું જેથી છોકરીને સપોર્ટ મળી શકે. આ પછી જગવીર અને પૂજાએ પહેલા કોર્ટ મેરેજ કર્યા અને ત્યાર બાદ 2012માં જગવીરે તેની સાથે હિંદુ રીતિ-રિવાજ મુજબ લગ્ન કર્યા. એવું કહેવામાં આવી રહ્યું છે કે, છોકરી તરફથી લગ્નમાં કોઈ સામેલ થયું ન હતું.