BIG NEWS / તાલિબાની ફરમાન: અફઘાનિસ્તાનમાં ટિકટોક અને પબજી પર પ્રતિબંધ લગાવ્યો

• અફઘાનમાં તાલિબાન સરકારનો મોટો નિર્ણય
• અફઘાનિસ્તાનમાં ટિકટોક અને પબજી પર બેન લગાવ્યો
• પ્રશાસને કહ્યું- તેનાથી યુવા પેઢી અવળા રસ્તે જઈ રહી છે

તાલિબાન શાસને કહ્યુ કે, અફઘાનિસ્તાનમાં આગામી ત્રણ મહિનામાં ટિકટોક એપ અને પબજી ગેમિંગ એપ બેન કરી દેવામાં આવશે. મીડિયા રિપોર્ટ્સ અનુસાર, આ અગાઉ એપ્રિલમાં ઈસ્લામી ગ્રુપે આ એપ્સને બેન કરવાની ઘોષણા કરી હતી, જેમાં દાવો કર્યો હતો કે, આ એપ્સથી અફઘાની યુવકો ભટકી રહ્યા છે.

એક રિપોર્ટમાં જણાવ્યા અનુસાર, તાલિબાન પ્રવક્તા ઈનામુલ્લા સમાંગાનીએ કહ્યું કે, ટિકટોક અને પબજી પર બેન લગાવવું જરુરી છે. કારણ કે આ એપ્સથી યુવા પેઢી બરબાદ થઈ રહી છે. હાલમાં જ સુરક્ષાના ક્ષેત્રે અને શરિયા લૉ એન્ફોર્સમેન્ટ એડમિનિસ્ટ્રેશનના પ્રતિનિધિઓની બેઠકમાં નિર્ણય લેવાયો છે કે, આ એપ્સને 90 દિવસમાં બેન કરી દેવામાં આવે. સાથે જ ટેલીકોમ્યુનિકેશન અને ઈન્ટરનેટ સર્વિસ પ્રોવાઈડર્સને નિર્ધારિત સમયની અંદર આ દિશાનિર્દેશનું પાલન કરવા માટે કહેવાયુ છે .

2.3 કરોડ વેબસાઈટ્સ કરી ચુક્યા છે બ્લોક

આ અગાઉ તાલિબાને અફઘાનિસ્તાનમાં અશ્લીલ કંટેંટ વાળી 2.3 કરોડથી વધારે વેબસાઈટને બ્લોક કરી ચુક્યું છે. આ ઉપરાંત તાબિલાન મ્યૂઝિક, ફિલ્મ અને ટેલીવિઝનના કેટલાય એન્ટરટેનમેંન્ટ પ્રોગ્રામ્સ પણ બેન કરી ચુક્યું છે.