નિવેદન / અફઘાનિસ્તાનની પરિસ્થિતિ માટે બાયડને ગની પર ફોડ્યું ઠીકરું, કહ્યું લડ્યા વગર જ ભાગી ગયા

• અફઘાનિસ્તાનમાં તાલિબાન શાસન 
• પહેલીવાર સામે આવ્યું અમેરિકાનાં રાષ્ટ્રપતિનું નિવેદન 
• પોતાના નિર્ણયનો કર્યો બચાવ, તાલિબાનને આપી ધમકી 

અફઘાનિસ્તાનમાં તાલિબાનનાં રાજના કારણે આખા વિશ્વની ચિંતામાં વધારો થયો છે. દુનિયાભરનાં નિષ્ણાતો આ પરિસ્થતિ માટે અમેરિકાને દોષિત ઠેરવી રહ્યા છે અને બાયડન સરકારની બરાબરની ટીકા કરવામાં આવી રહી છે. લોકો કહી રહ્યા છે કે એક આતંકવાદી સંગઠન દેશ પર રાજ કરવા જઈ રહ્યું છે અને વીસ વર્ષ સુધી અફઘાનિસ્તાનમાં રહેનાર અમેરિકા હાથ પર હાથ મૂકીને જોઈ રહ્યું છે. એવામાં આ બધી પરિસ્થિતિની વચ્ચે રાષ્ટ્રપતિ જૉ બાયડન પહેલીવાર સામે આવ્યા છે. 

ગની પર ફોડ્યું ઠીકરું 
રાષ્ટ્રપતિ જૉ બાયડને પોતાના ભાષણથી વિશ્વભરમાં એક સંદેશ આપ્યો કે અમેરિકા હવે અફઘાનિસ્તાનમાં સૈનિકો મોકલશે નહીં. બાયડને અત્યારે જે હાલત થઈ છે તેનાં માટે અફઘાનિસ્તાનનાં રાષ્ટ્રપતિ અશરફ ગની પર ઠીકરું ફોડ્યું છે. સાથે તેમણે સ્પષ્ટ કર્યું કે અમેરિકા પોતાના સૈનિકોને જોખમમાં કેમ નાંખે? 

અશરફ ગનીને પૂછો સવાલ : બાયડન 
જૉ બાયડને કહ્યું કે આવી પરિસ્થિતિમાં ગની દેશ છોડીને ભાગી ગયા. તેમનાથી સવાલ પૂછાવવા જોઈએ, કે તે લડ્યા વગર જ કેમ ભાગી ગયા? 

અમારી સેના સતત જોખમ ન ઉઠાવી શકે : બાયડન 
અફઘાનિસ્તાનથી સૈનિકો પાછા બોલાવી લેવાના નિર્ણયને પણ બાયડને સાચો ગણાવ્યો. તેમણે કહ્યું કે અમારી સેના સતત જોખમ ન ઉઠાવી શકે. અમેરિકન સૈનિકોનાં પરિવારોએ પોતાના પરિવારનાં સદસ્યને અફઘાનિસ્તાનમાં ગુમાવ્યા છે. 

તાલિબાનને બાયડનની ધમકી 
નોંધનીય છે કે જૉ બાયડને પોતાના સંબોધનમાં તાલિબાનને ખુલ્લી ચેતવણી પણ આપી હતી. તેમણે કહ્યું કે અમેરિકાના સૈનિકોને નુકસાન પહોંચાડવામાં આવ્યું તો તાલિબાને તેની કિંમત ચૂકવવી પડશે.