ડરને કારણે દેશ છોડીને ભાગી રહેલા અફઘાની નાગરિકોને તાલિબાને ભયાનક પરિણામ ભોગવવાની ધમકી આપી દીધી છે.
અફઘાનમાં તાલબાની શાસન આવતા લોકો ભાગવા લાગ્યા
કાબુલ એરપોર્ટ પર ભીડ જામતા તાલિબાન આકરા પાણીએ
અફઘાની નાગરિકોના દેશ છોડવા પર મૂકી દીધો પ્રતિબંધ
દેશ છોડી જનારને આપી પરિણામ ભોગવવાની ધમકી
અફઘાનિસ્તાન પર કબજો જમાવનાર તાલિબાન અને સામે પક્ષે અમેરિકા સહિત જી-૭ના સભ્ય દેશો હવે આમનેસામને આવી ગયા છે. કાબુલ એરપોર્ટ પર હજારોની સંખ્યામાં લોકોની ભીડ જામતાં અને દેશ છોડવાના લોકોના પ્રયાસથી તાલિબાનની આબરૂના ધજાગરા થઈ રહ્યા છે. તેને જોઈને હવે તાલિબાનોએ અફઘાન નાગરિકોને એરપોર્ટ જવા પર પ્રતિબંધ મૂકી દીધો છે. એરપોર્ટ પર હવે માત્ર વિદેશીઓને જ જવાની મંજૂરી આપવામાં આવી રહી છે.
અફઘાન નાગરિકોને હવે એરપોર્ટ પર જવાની મંજૂરી નથી- તાલિબાની પ્રવક્તા
તાલિબાનના પ્રવક્તા જબીઉલ્લા મુજાહિદે જણાવ્યું છે કે, એરપોર્ટ પર એકત્ર થતી ભીડને રોકવા અને સુરક્ષાનું જોખમ ટાળવા અફઘાન નાગરિકોને હવે એરપોર્ટ પર જવાની મંજૂરી નથી. હવે માત્ર વિદેશી નાગરિકોને જ એરપોર્ટ જવા દેવામાં આવશે.
આ ઉપરાંત તાલિબાને અમેરિકાને ચેતવણી આપી છે કે, અફઘાનોને ત્યાંથી એરલિફ્ટ કરવાનું બંધ કરે. મુજાહિદે જણાવ્યું છે કે, દેશમાં જનજીવન સામાન્ય થઈ રહ્યું છે. માત્ર એરપોર્ટ પર જ અરાજકતા પ્રવર્તે છે. તેમણે વધુમાં જણાવ્યું કે, કાબુલ એરપોર્ટ પર જતા તમામ રસ્તાઓને બ્લોક કરી દેવામાં આવ્યા છે. માત્ર વિદેશીઓને જવા માટે એક માર્ગ ખુલ્લો રાખવામાં આવ્યો છે.
અમેરિકા સ્કિલ્ડ અફઘાન નાગરિકોને એરલિફ્ટ કરવાનું બંધ કરે
અમેરિકા હવે ખાસ કરીને સ્કિલ્ડ અફઘાન નાગરિકોને એરલિફ્ટ કરવાનું બંધ કરે. મુજાહિદે જણાવ્યું કે, આ દેશને ડોક્ટરો, એન્જિનિયરો અને શિક્ષિત લોકોની જરૂર છે. સાથે સાથે તાલિબાને અમેરિકાને ૩૧ ઓગસ્ટ સુધીમાં સેનાઓ હટાવી લેવાની પણ ચેતવણી આપી છે.તાલિબાનના આ ફરમાન પર વિશ્વના સાત સૌથી વિકસિત દેશોનાં સંગઠન જી-૭એ પ્રતિક્રિયા આપતાં જણાવ્યું છે કે, તેઓ ૩૧ ઓગસ્ટની સમયમર્યાદા સુધીમાં કાબુલ એરપોર્ટ ખાલી નહીં કરે. આ દેશોએ તાલિબાન સામે એવી શરત રાખી છે કે નિર્ધારિત સમયમર્યાદા બાદ પણ અફઘાનિસ્તાનમાંથી બહાર જવા માગતા અફઘાન નાગરિકોને તાલિબાનોએ સુરક્ષિત માર્ગ આપવો પડશે.
અમેરિકા તાલિબાનની કાર્યવાહી પર બાજનજર રાખશે
બીજી તરફ અમેરિકાના રાષ્ટ્રપ્રમુખ જો બિડેને જણાવ્યું છે કે, અમેરિકા તાલિબાનની કાર્યવાહી પર બાજનજર રાખશે. અમે તાલિબાનના વ્યવહારને ધ્યાનમાં લઈને યોગ્ય નિર્ણય કરીશું. ૩૧ ઓગસ્ટની ડેડલાઈન મુજબ અફઘાનિસ્તાનમાંથી લોકોને બહાર કાઢવાની પ્રક્રિયા ચાલુ છે. પરંતુ સેના વાપસીનો નિર્ણય તાલિબાનના સહકાર પર આધાર રાખશે. ૩૧ ઓગસ્ટ સુધીની પ્રક્રિયા તાલિબાનના સહકાર પર આધારિત છે અને તાલિબાનોએ અમારા ઓપરેશનમાં કોઈ વિઘ્ન નાખવું જોઈએ નહીં. જોકે, સાથે સાથે બિડેને એવો પણ સંકેત આપ્યો છે કે ૩૧ ઓગસ્ટ બાદ પણ અમેરિકાના સૈનિકો કાબુલમાં રહી શકે છે.