આરોગ્ય નિષ્ણાતોએ દિનચર્યામાં કેટલીક હેલ્ધી હેબિટ્સ સામેલ કરવાની સલાહ આપી છે. જેની પાછળ પ્રમાણિત વૈજ્ઞાનિક તથ્યો પણ છે. આવી હેલ્ધી હેબિટ્સ અપનાવીને તમે પણ થોડા સ્વસ્થ બનીને એક્ટિવ જિંદગી જીવી શકો છો. આવી નાનકડી પણ હેલ્ધી આદતોને તમારા રુટિનમાં સામેલ કરો અને સ્ટ્રેસ ફ્રી, તરોતાજા જિંદગી જીવો
ખુલ્લા પગે ગાર્ડનમાં ફરો
શિકાગોની રશ યુનિવર્સીટી મેડિકલ સેન્ટર દ્વારા કરાયેલા અભ્યાસ મુજબ ખુલ્લા પગે ચાલવાથી ઘુંટણના સાંધા પર પડતું દબાણ 12 ટકા જેટલું ઘટી જાય છે. તેનાથી ઓસ્ટિયોઆર્થરાઇટિસથી થતો દુખાવો પણ ઘટે છે. એક અન્ય અભ્યાસ પરથી એ પણ જાણવા મળ્યુ છે કે મોબિલિટી શુઝ (જે ફ્લેટ અને ફ્લેક્સિબલ હોય છે) ઘુટણ પરના દબાણને 18 ટકા સુધી ઘટાડે છે. શરત માત્ર એટલી કે તેને 6 મહિના કે તેથી વધુ સમય સુધી પહેરેલા હોવા જોઇએ.
એક્ટિવ બનો
ઓસ્ટ્રેલિયાના આરોગ્ય નિષ્ણાતોએ 2,30,000 લોકોના ડેલી રુટિનનું વિશ્લેષણ કરીને જાણ્યુ કે જે લોકો બહુ વધુ એટલે કે નવ કલાક કરતા વધુ સુતા હોય તેમજ વધારે પડતુ બેસી રહેતા હોય (દિવસમાં સાત કલાકથી વધુ) અને પર્યાપ્ત રુપે ફિઝિકલ એક્ટિવિટી ન કરતા હોય તેમને પ્રિમેચ્યોર ડેથનો ખતરો ચાર ગણો વધી જાય છે.
ધીમા અવાજે બોલો
જો તમે મોટા અવાજે બોલો છો અને જોરજોરથી ઘાંટા પાડો છો તો એલર્ટ થઇ જાવ. વૈજ્ઞાનિકોનું માનવું છે કે ઉંચા અવાજે બોલવાથી ગળામાં વોકલ કોર્ડ પોલિપ બંધ થવાની શક્યતા રહે છે, તેથી સંયત સ્વરમાં વાત કરવાની આદત પાડો. વધુ મોટા અવાજે બોલવાથી માનસિક દબાણ પણ વધે છે અને લોકો સાથેના સંબંધો પણ બગડે છે. આ ખોટી આદતની કરિયર અને પ્રોફેશન પર પણ ખોટી અસર પડે છે.
લોકો સાથે હળો ભળો
આઉટ સ્માર્ટિંગ અલ્ઝાઇમર્સના લેખક ડો કેનીથ કોસિસે પોતાના પુસ્તકમાં લખ્યુ છે કે જે લોકો મોજમસ્તી કરતા હોય, લોકો સાથે હળતા ભળતા હોય અને વારંવાર પાર્ટીઓનું આયોજન કરતા હોય તેમને ડિમેંશિયા સહિત અન્ય માનસિક બિમારીઓ થવાનો ખતરો ઓછો રહે છે. ડો. કેનીથે જણાવ્યુ કે જ્યારે તમે પાર્ટી કરો છો ત્યારે તેના આયોજનમાં મગજની કસરત થાય છે. લોકો સાથે હળવા મળવાથી અને હસવા બોલવાથી તેમજ મસ્તી કરવાથી મગજ સ્ટ્રેસ ફ્રી રહે છે. આવામાં મગજની બિમારીઓ દુર થાય છે.