ફિલ્મ જગત / 'આદિપુરુષ'નું બીજું ગીત 'રામ સિયા રામ' 5 ભાષાઓમાં રિલીઝ, સચેત-પરંપરાએ જીતી લીધા ચાહકોના દિલ

• 'આદિપુરુષ'ની રિલીઝને હવે ગણતરીના દિવસો જ બાકી
• ફિલ્મનું બીજું ગીત 'રામ સિયા રામ' રિલીઝ થયું છે
• આ ગીતને 5 ભાષાઓમાં રિલીઝ કરવામાં આવ્યું છે 

ઓમ રાઉતની ફિલ્મ 'આદિપુરુષ'ની રિલીઝને હવે ગણતરીના દિવસો જ બાકી છે. નોંધનીય છે કે થોડા દિવસો પહેલા જ ફિલ્મનું પહેલું ગીત 'જય શ્રી રામ' રિલીઝ થયું હતું, જેને લોકોએ ખૂબ પસંદ કર્યું હતું. હવે મેકર્સે ફિલ્મનું બીજું ગીત 'રામ સિયા રામ' રિલીઝ કર્યું છે. ગીતને લઈને ચાહકોની સારી પ્રતિક્રિયા મળી રહી છે. 

નોંધનીય છે કે આ પહેલા નિર્માતાઓએ અરિજીતના અવાજમાં 'જય શ્રી રામ' રિલીઝ કર્યું હતું. એવામાં હવે ફિલ્મનું બીજું ગીત 'રામ સિયા રામ' રિલીઝ થયું છે. બીજા ગીતની વાત કરીએ તો તેને સાચેત-પરંપરાએ ગાયું છે અને  ગીત 5 ભાષાઓ હિન્દી, તેલુગુ, તમિલ, કન્નડ અને મલયાલમમાં રિલીઝ કરવામાં આવ્યું છે. 

જણાવી દઈએ કે ઓમ રાઉતની આ પાન ઈન્ડિયા ફિલ્મ 'આદિપુરુષ' 16 જૂન, 2023ના રોજ રિલીઝ થશે. આ ફિલ્મમાં પ્રભાસ, સૈફ અલી ખાન, કૃતિ સેનન, દેવદત્ત ગજાનન નાગે, સોનલ ચૌહાણ, વત્સલ સેઠ વગેરે મુખ્ય ભૂમિકામાં છે. આ ફિલ્મ 600 કરોડથી વધુના બજેટમાં બની છે અને મેકર્સને તેના વિશે ઘણી આશા છે.

ફિલ્મમાં પ્રભાસનું પાત્ર ભગવાન રામથી પ્રેરિત છે અને કૃતિનું પાત્ર સીતા માતા પર આધારિત છે. સાથે જ ફિલ્મમાં સન્ની સિંહ લક્ષ્મણનો રોલ કરી રહ્યો છે. જણાવી દઈએ કે 'આદિપુરુષ' 3Dમાં બની રહી છે અને હાલ ફિલ્મ મેકર્સ VFX, સ્પેશિયલ ઇફેક્ટ્સનું કામ કરી રહ્યા હતા. નોંધનીય છે કે સૌથી પહેલા ઓગસ્ટ 2022 માં રિલીઝ કરવાના લક્ષ્ય હતો પણ ફિલ્મ સતત સ્થગિત થતી રહી એવામાં 2022માં દશેરાના અવસર પર ફિલ્મનું ટીઝર ટ્રેલર શેર કરવામાં આવ્યું હતું પણ લોકોને ફિલ્મમાં સ્પેશિયલ ઈફેક્ટનું કામ પસંદ આવ્યું નહતું અને લોકો કાર્ટૂન સાથે સરખામણી કરીને ટ્રોલ કરી રહ્યા હતા. એ સમયે ફિલ્મની રિલીઝ ડેટ 12 જાન્યુઆરી 2023 નક્કી કરવામાં આવી હતી પણ ટીઝરને નબળો પ્રતિસાદ મળ્યા બાદ મેકર્સે ફરી એકવાર ફિલ્મ મોકૂફ રાખી છે. 

'આદિપુરુષ'ની રિલીઝ ડેટ હવે 16 જૂન કરવામાં આવી હતી. હવે જોવાનું રહ્યું કે ફિલ્મ પર કામ કરવા માટે જનતાને વધુ 6 મહિનાનો સમય માંગ્યા પછી મેકર્સ શું ફેરફાર કર્યા છે..